Klei Aê Diê Blŭ: I Bruă Mtao 20:37‑43
Êlan kliăng: “Leh anăn êjai dĭng buăl ih mâo bruă tinei tinăn, êkei anăn đuĕ hĕ.” Mtao Israel lač kơ ñu, “Msĕ snăn jing klei phat kđi kơ ih. Ih pô čuăn leh klei anăn.”” (I Bruă Mtao 20:40).
Klei êmuh ksiêm mĭn: Ya klei yăl dliê khua pô hưn êlâo yua nao bi tuôm hŏng mtao Y‑Ahap čiăng lač kơ klei soh mtao ngă leh? Ya bruă klam kơ mnuih hlăm klei yăl dliê anei? Ya klei soh ñu ngă leh anăn si boh ñu srăng tŭ? Hruê anei ya mta klei soh wê drei ngă msĕ si sa čô kahan anei?
Khua pô hưn êlâo nao bi tuôm hŏng mtao Y‑Ahap hlăm rup sa čô kahan êka êkeh. Pô kahan anei arăng jao brei kiă gak sa čô mnă, tơdah mnă tlĕ đuĕ snăn kahan kiă anăn yơh srăng hrô klei hdĭp ñu pô amâodah tla bi hnô sa talăng prăk (êlan 39). Sa talăng mdŭm hŏng 34kg, jing sa ênoh prăk lu snăk sơưn hŏng sa čô kahan, kyuanăn, klei bi kmhal jing klei hdĭp ñu pô yơh. Ƀiădah êkei mnă hlăm klei yăl dliê tlaih đuĕ leh mơ̆ng kngan kahan kiă (êlan 40).
Si ngă kahan anei lui hĕ êkei mnă tlaih đuĕ? Amâo djŏ ôh kyua amâo thâo săng kyuadah êlan 39 brei ƀuh ñu mă tŭ bruă jao klă mngač mbĭt hŏng klei hưn êlâo brei răng tơdah amâo bi leh bruă si klei bi kmhal ñu srăng tŭ. Kăn djŏ dôk pĭt gui kyua lu đei bruă rei, kyuadah arăng jao kơ ñu knŏng kiă sa čô mnă đuč. Êlan 40 brei thâo kyuadah kahan anei gun kpăk đei, amâo djŏ gun kpăk kyua bruă klam jao kơ ñu ôh ƀiădah gun kpăk kyua “mâo bruă tinei tinăn”. Klei soh kahan anăn kyua hmăng uêñ mĭn kơ bruă mkăn ƀiădah wơr bĭt hĕ bruă klam kơ ñu pô, kyuanăn ñu amâo mđing uêñ bi leh bruă jao kơ ñu ôh. Wăt tơdah “mâo bruă tinei tinăn” djŏ guôp leh anăn huĭ hyưt tơl ñu tŭ klei êka dưn, ƀiădah jih bruă anăn amâo djŏ bruă klam arăng jao kơ ñu ôh.
Msĕ si kahan anei, mtao Y‑Ahap leh anăn khua pô hưn êlâo tal dua amâo ngă klei soh wê ôh, hĭn mơh klei anăn jing klei thâo mĭn tui si ală anak mnuih, ƀiădah jih jang diñu tŭ klei bi kmhal sơăi kyuadah amâo ngă klei Khua leh anăn Mtao čiăng kơ diñu ngă. Bruă klam sa čô dĭng buăl amâodah sa čô kahan amâo mâo klei mkăn ôh jing klei gưt ngă klei mtă mơ̆ng khua amâodah mơ̆ng mtao (II Y‑Timôthê 2:3‑4). Sa čô dĭng buăl leh anăn sa čô kahan knŏng mâo hjăn sa bruă jao, ngă tui si klei mtă leh anăn gưt asăp khut khat. Hruê anei, drei khăng yap drei jing ding buăl Aê Diê, jing kahan Ñu hlăm kdrăn klei bi blah mngăt myang ƀiădah ăt khăng phưi lui nanao klei Khua Yang mtă. Tơdah msĕ snăn, drei adôk jing dĭng buăl leh anăn kahan Aê Diê sĭt mơ̆? Khua Yang brei kơ drei Klei Aê Diê Blŭ čiăng thâo klei Ñu čiăng. Klei yuôm jing brei drei dlăng răk leh anăn hriăm Klei Aê Diê Blŭ grăp hruê čiăng dưi thâo săng lu hĭn klei Khua Yang čiăng, ƀiădah klei čiăng hĭn mâo ai tiê klei mĭn đup gưt leh anăn hmiêt mkăp ngă tui si klei drei hriăm leh.
Si ngă drei thâo săng mơ̆ gưt ngă tui si klei Aê Diê čiăng jing klei drei pioh tal êlâo hĭn?
Wah lač: Ơ Khua Yang, akâo Ih pap brei klei soh kâo kyuadah lu blư̆ kâo amâo gưt asăp Ih kluôm dhuôm ôh. Akâo Ih đru kâo hriăm Klei Ih Blŭ grăp hruê leh anăn jing sa čô kahan đup gưt kluôm ênŭm.
Dlăng Klei Aê Diê Blŭ hlăm tlâo thŭn: Y‑Êsai 31:1–32:20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
