I Vajntxwv 20:37-43
Nqe cim:
“‘Tiamsis kuv muaj haujlwm ntau heev, mas tus neeg ntawd txawm cia li khiav lawm.’ Vajntxwv teb hais tias, ‘Koj yuav raug txim xwb, rau qhov koj yeej lees koj li ntawd lawm.’” (I Vajntxwv 20:40).
Lus nug rau sawvdaws xav:
- Tus cevlus uas tuaj cuag vajntxwv Ahaj tau ua zaj twg los taw qhia rau vajntxwv pom nws tej kev txhaum?
- Tus tubrog hauv zaj no tau txib ua dabtsi?
- Nws ua txhaum dabtsi thiab thaum kawg raug dabtsi?
- Niaj hnub nimno peb puas tseem ua qee yam txhaum li tus tubrog no?
Tus cevlus tuaj cuag vajntxwv Ahaj hnav zoo li ib tug tubrog uas raug mob sab. Tus tubrog no tau luag txib zov ib tug tubrog uas lawv ntes tau, yog zov tsis zoo thiab ua dim, ces nws yuav raug muab nws txojsia los pauj lossis yuav raug them ib tala nyiaj (nqe 39). Ib tala hnyav 34kg, yog ib cov nyiaj uas loj dhau rau ib tug tubrog them taus, yog li ntawd, yog zov tsis zoo ua dim, nws yuav tsum muab txojsia los them. Tiamsis thaum kawg tus tubrog uas nws tau txib zov ntawd khiav dim ntawm nws mus lawm tiag (nqe 40).
Vim licas tus tubrog no cia tus neeg nws tau txib zov dim taus lawm? Tsis yog vim nws tsis paub, rau qhov nqe 39 qhia meej txog qhov uas nws lees tes haujlwm no thiab muaj lus ceebtoom hais tias yog ua tsis tiav yuav raug txim dabtsi. Kuj tsis yog vim nws tsaug zog tsis hnov lossis vim ua ntau txoj haujlwm, rau qhov nws tsuas tau txib ua ib teg haujlwm uas yog zov tus txivneej no xwb. Nqe 40 qhia hais tias tus tubrog no muaj haujlwm ntau rau qhov nws tabkaum ua qhov ub qhov no. Qhov txhaum ntawm tus tubrog no, yog hnov qab tes haujlwm tseemceeb uas luag txib, nws ho mus ua lwm yam haujlwm, nws thiaj ua tsis tiav tes haujlwm uas tau txib. Txawm yog lwm yam haujlwm yuav cheemtsum heev, ua rau nws sab thiab nkees, los tej ntawd tsis yog teg haujlwm uas nws tau txib kom ua.
Kuj zoo ib yam li tus tubrog no, vajntxwv Ahaj thiab tus cevlus tus phoojywg tsis tau ua dabtsi txhaum cai, tej uas lawv ua tseem tau lwm tus qhuas, tiamsis lawv raug txim vim tsis ua tes haujlwm uas tus Tswv thiab vajntxwv txib kom ua. Lub luag haujlwm ntawm tus qhev thiab tus tubrog yog ua raws nws tus tswv lossis vajntxwv tej lus (II Timautes 2:3-4). Ib tug tubqhe thiab ib tug tubrog tes haujlwm yog mloog lus thiab ua raws tuag nthi. Niaj hnub nimno, peb pheej qhuas tias peb yog Vajtswv cov tubqhe, yog ib tug tubrog nyob hauv kev tsov rog sab ntsujplig, tiamsis peb pheej tsis ua raws li tus Tswv tej lus samhwm. Yog zoo li ntawd, peb puas tsimnyog ua Vajtswv tus tubqhe thiab Vajtswv tus tubrog? Vajtswv pub rau peb muaj Vajtswv Txojlus kom peb paub Nws lub siabnyiam. Peb yuav tsum nyeem thiab kawm txhua hnub thiaj yuav paub Vajtswv lub siab nyiam heev dua qub; tiamsis qhov tseemceeb dua tej ntawd, yog qhov uas peb yuav tsum muaj lub siab txo hwjchim mloog lus thiab txaus siab hlo ua raws li tej uas peb kawm tau.
Thov Vajtswv
Vajtswv, thov zam txim rau nyuam yaus vim muaj ntau zaug tsis tau ua tiav raws li Koj lub siabnyiam. Thov pab nyuam yaus kawm tau Koj Txojlus txhua hnub thiab ua tau ib tug tubrog uas mloog Koj lus. Amees.
Peb puas zeem paub hais tias qhov uas ua raws li Vajtswv lub siabnyiam yog yam tseemceeb kawg nkaus hauv peb lubneej lawm tau?
Nyeem Vajluskub hauv peb lub xyoos: Yaxayas 31:1-32:20
Kênh Youtube BHKTHN:
