Jôsuê 24:14-15
“…inh păng hnam inh gô chu yom păng pơm kiơ̆ kơ Kră Yang.” (Jôsuê 24:15)
Nơ̆r jet tơchĕng pơwao:
– ‘Bok jôsuê pơm kiơ kơplah băt kơdih arih pă đunh?
– Nơ̆r tơbăt khan “…Inh păng hnam inh gô bơ̆jang kơ Kră Yang ‘Bok Kei-Dei” tơbôh tơdrong ‘bok Jôsuê hiơ̆k kơ akâu sư kơdih păng hnam dơnŏ sư noh kiơ?
– Hnam dơnŏ bơ̆n athri arih thoi yơ wă kơ gơh pơma pran thoi ‘bok Jôsuê?
Kơplah băt kodih wă wih brŏk tơ Kră Yang, ‘bok Jôsuê đei krao akŭm đĭ đăng adrĕch adrŭng Isơrael păng lu kră pơgơ̆r lu sư wă pơma dôm nơ̆r wă tơklah (Jôsuê 24:1-23).Đơ̆ng rŏng kơ tơ’blŏk tơdrong dŏng pơklaih kon pơlei Kră Yang lĕch đơ̆ng pơm đĭch Êyiptơ, sư đĭ jơhngơ̆m bơtho pơkă” thoi noh dang ei, athei chu yom bĕ kơ Kră Yang păng pơm kiơ̆ kơ Sư hăm đĭ jơhngơ̆m păng tơnăp, hŭt lê̆ bĕ yang mă ‘bok lu iĕm kơkuh tơgah hơlĕch tơ đak krong tih păng tơ lăm char Êyiptơ, athei chu yom bĕ kơ Kră Yang” (ttrong 14). Sư băt kơ kon pơlei adrĕch ‘nâu ưh kơ kĕ bơwei jơhngơ̆m tơnăp hăm Kră Yang, thoi noh sư iŏk hnam dơnŏ sư pơm kơmĭl, tơgŭm pơlung kon pơlei sư pơma pran hăm kon pơlei Kră Yang khan tơdrong rơih iŏk kơdih, mălei mă đơ̆ng lu sư rơih iŏk bu lei gah sư păng hnam dơnŏ sư gô bơ̆jang kơ minh ‘nu Kră Yang ‘Bok Kei-Dei đĕch” (trong 15).
‘Bok Jôsuê băt tơpă hnam dơnŏ bơih tơm hơdrol hloh lăm kọn pơlei pơla păng khul bơngai lui. Hnam dơnŏ arih ‘lơ̆ng tơpăt jơ̆ hnam dơnŏ chu yom păng kiơ̆ nơ̆r Kră Yang păng đĭ jơhngơ̆m bơ̆jang kơ Kră Yang jơ̆ hnam dơnŏ rơih iŏk tơdrong ‘lơ̆ng tơpăt. ‘Bok Jôsuê drơ̆ng pơkă hnam dơnŏ sư jơ̆ minh hnam dơnŏ arih ‘lơ̆ng tơpăt, hơdrol hloh đơ̆ng bơngai pơgơ̆r lăm hnam dơnŏ. Sư pơma tơpăt hloi hăm kon pơlei Isơrael khan: “Inh păng hnam dơnŏ inh gô bơ̆jang kơ Kră Yang ‘Bok Kei-Dei”. Nơ̆r pơma tơbăt ‘nâu tơ’bôh tơdrong hiơ̆k bơngai chĕp kơ̆l lăm hnam dơnŏ. “Inh…bơ̆jang kơ Kră Yang” jơ̆ adrol hloh, ưh kơ sĭ kơdih akâu sư đĕch bơwei jơhngơ̆m tơnăp hăm Kră Yang mă sư kư̆m oei hiơ̆k tơgŭm “hnam dơnŏ sư” chông anhăk kon akăn, kon sâu lăm hnam dơnŏ wang bơ̆jang kơ Kră Yang ‘Bok Kei-Dei. Mưh hnam dơnŏ arih pơm ‘lơ̆ng tơpăt, ‘mêm mơnat dih băl păng hơdai wang bơ̆jang kơ Kră Yang lei noh bơih tơm hơnă wă ba ăn kơ lơ hnam dơnŏ nai dơ̆ng lăm khul bơngai lui, kư̆m dai pơm kơmĭl ‘lơ̆ng pơchrang hơdah kơ kon pơlei pơla jum dăr.
Dang ei, wă kơ rim hnam dơnŏ lu bơ̆n gơh pơma thoi ‘bok Jôsuê khan: “Inh păng hnam inh gô bơ̆jang kơ Kră Yang ‘Bok Kei-Dei” Hơdrol hloh bơngai chĕp kơ̆l pơgơ̆r lăm hnam dơnŏ athei arih pơm kơmĭl ‘lơ̆ng, tơ’bưh kơjăp hăm Kră Yang pămg nơ̆r Kră Yang, wei jơhngơ̆m tơnăp hăm Kră Yang, arih ‘mêm mơnat, tơpăt tơpă lăm hnam dơnŏ. Nguaih kơnoh, kư̆m athei băt hiơ̆k tơgŭm khul bơngai lui iĕ mă Kră Yang pơjao kơ bơ̆n kơ bơ̆n lămm hnam dơnŏ wă wei rong tơdrong arih gah bơhngol kon sâu hăm tơdrong ‘măn jơ akŭm hnam dơnŏ, tơ’blŏk dih băl tơnăp akŭm kơkuh kơ Kră Yang păng rim ‘nu đĭ jơhngơ̆m bơ̆jang lăm tơdrong gơh hơgei mă Kră Yang ăn kơ bơ̆n. Hơpơi rim hnam dơnŏ lu bơ̆n pơm kơmĭl ‘lơ̆ng ăn kơ lơ hnam dơnŏ nai dơ̆ng gah tơdrong arih ‘lơ̆ng tơpăt păng ‘mêm mơnat lăm tơdrong chông anhăk đơ̆ng Kră Yang păng nơ̆r pơma Sư.
Ơ Kră Yang, apinh ăn kơ inh pơm kơmĭl lăm tơdrong arih ‘lơ̆ng tơpăt păng chông nhăk hnam dơnŏ inh yak năm hăm Kră Yang lăm tơdrong ‘lơ̆ng tơpăt. Apinh Kră Yang lăp đon yua inh păng hnam dơnŏ inh pơchrang Anăn Kră Yang đơ̆ng tơdrong arih ‘lơ̆ng tơpăt păng ‘mêm mơnat lăm hnam dơnŏ. Krao khan yua Anăn Kră Yang Yêsu Krist, Amen.
Đei gô pơma kiơ mưh lăng tơdrong arih lăm hnam dơnŏ bơ̆n?
Đŏk sơ̆p hla bơar Nơ̆r ‘Bok Kei-Dei lăm pêng sơnăm: Sachari 8
Kênh Youtube BHKTHN:
