Klei Aê Diê Blŭ: I Y-Samuel 8:10-18
Êlan kliăng: “Snei Yêhôwa lač: “Tăm pah hĕ pô knang kơ mnuih, leh anăn knang kơ klei ktang mơ̆ng kđeh, ai tiê ñu klah đuĕ leh mơ̆ng Yêhôwa.” (Y-Yêrêmi 17:5)
Klei êmuh ksiêm mĭn: Ya klei Aê Diê mtă brei Y-Samuel lač hŏng phung ƀuôn sang Israel? Ya klei sĭt nik yuôm bhăn mơ̆ng klei Khua Yang hưn lač? Thâo kral jih klei sĭt nik anei si klei đru drei êjai dôk ti anăp klei čuăn ngă hlăm klei hdĭp?
Êlan 10 brei ƀuh Y-Samuel gưt asăp Khua Yang kluôm dhuôm leh, “hưn jih jang klei Yêhôwa blŭ” wăt tơdah thâo leh klei anei phung ƀuôn sang Israel amâo čiăng hmư̆ ôh. Klei Khua Yang hưn êlâo kơ phung ƀuôn sang Israel brei răng bi êdah klei sĭt nik yuôm bhăn. Tal sa, amâo djŏ jih jang klei jing jăk siam sơăi msĕ si rup ƀuh ti êngao ñu ôh. Tơdah phung ƀuôn sang Israel hmăng hmưi čiăng mâo “Ară anei mjing bĕ kơ hmei sa čô mtao kiă kriê hmei, msĕ si jih jang phung găp djuê mkăn” (êlan 5) snăn brei diñu ăt mă tŭ mbĭt mơh “klei bhiăn mtao kiă kriê diih.” (êlan 11). Lăn ala mâo nanao klei ƀuăn jăk siam ƀiădah mdăp ti tluôn klei anăn jing boh jhat ktrŏ kjham mơ̆ng klei ƀuăn mplư luar. Y-Ađam leh anăn H’Êwơ čuăn ruah hmư̆ klei ƀuăn Pô Luar hĭn kơ gưt klei Pô Sĭt Kpă (Klei Mphŭn Dơ̆ng 3:4-5). Y-Lot ăt brei klei jăk siam ƀuh ti êngao “msĕ si war djam Khua Yang, msĕ si čar Êjip” mơ̆ng ƀuôn Sôđôm leh anăn Gômôrơ mplư ñu (Klei Mphŭn Dơ̆ng 13:10) kyuanăn bi rai luč jih klei hing ang, gŏ sang, mô̆ anak. Klei sĭt nik anei adôk djŏ kơ hruê anei msĕ mơh, leh anăn klei hưn êlâo brei răng anei jing yuôm čiăng kơ drei ksiêm mĭn hŏng klei sĭt êmĭt (I Y-Yôhan 2:15-17).
Tal dua, bi mlih dưm anak mnuih hrô kơ Aê Diê amâo tuôm mâo boh tŭ dưn ôh. Boh blŭ kñăm hlăm trăn Klei Aê Diê Blŭ anei jing: “mă”, “hrui” hlăm êlan 11, 13, 14, 16 ăt knŏng jing sa boh blŭ čiăng lač kơ klei “plah mă” amâodah “mă mđuĕ” sa mta mnơ̆ng mơ̆ng pô mkăn. Phung ƀuôn sang Israel ruăt djăl wơr bĭt, Khua Yang yơh jing Pô bi mtlaih leh diñu mơ̆ng klei jing hlŭn ti čar Êjip, leh anăn ară anei diñu akâo brei mjing kơ diñu sa čô mtao kiă kriê hrô kơ Aê Diê, leh anăn “diih pô srăng jing hlŭn ñu” (êlan 17). Hruê anei, lu phung đăo tui hlue Khua Yang ƀiădah ai tiê ăt ktrŏ, kyua mĭndah Khua Yang “mă” mđuĕ hĕ klei êngiê diñu, ƀiădah diñu amâo thâo, knŏng dôk hlăm Khua Yang kơh, diñu dưi thâo kral klei êngiê sĭt, mâo klei êngiê dưi hdĭp sa klei hdĭp hrih mrâo năng hdĭp, amâo lŏ jing hlŭn kơ klei kđeh tluh ôh (Y-Yôhan 10:10).
Tal tlâo, sa klei čuăn soh čhuai srăng atăt truh kơ boh jhat kjham leh anăn sui dlông. Aê Diê hưn êlâo leh brei phung ƀuôn sang Israel thâo kơ boh jhat diñu pô leh anăn phung anak čô diñu srăng tlă anăp, leh anăn tơdah diñu thâo kral boh jhat hlăk anăn jing êla đei leh, Aê Diê amâo srăng wĭt lač ôh klei phung ai tiê khăng ur krao (êlan 18).
Klei hưn êlâo brei răng anei jing khăng ktang êdi: drei srăng wiă boh tui si ya mta drei rah leh. Răng bĕ kơ ya klei drei čuăn ruah, “Đăm brei arăng mplư diih ôh; arăng amâo dưi mưč kơ Aê Diê ôh. Kyuadah ya mjeh arăng rah, ñu srăng wiă boh anăn mơh.” (Galati 6:7).
Ya klei drei čuăn ngă tơdah hmư̆ klei Khua Yang hưn êlâo brei răng mơ̆ng Klei Aê Diê Blŭ?
Wah lač: Ơ Khua Yang, pap brei kơ kâo leh anăn akâo Khua Yang brei klei hriăm mơ̆ng hƀuê ênuk anei bi hdơr kơ kâo êjai tŭ klei mplư ruah klei mkăn, mnuih mkăn hrô kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Klei Yăl Dliê 12
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
