Klei Aê Diê Blŭ: Klei Mtô Mñă Klei Bhiăn 17:14‑20
Êlan kliăng: “Hră klei bhiăn srăng dôk mbĭt hŏng ñu, leh anăn ñu srăng dlăng gơ̆ jih jang hruê ñu dôk hdĭp, čiăng kơ ñu dưi hriăm huĭ mpŭ kơ Yêhôwa Aê Diê ñu, êjai djă pioh jih jang klei blŭ mơ̆ng klei bhiăn leh anăn klei mtă anei, leh anăn ngă tui hlue klei anăn” (Klei Mtô Mñă Klei Bhiăn 17:19).
Klei êmuh ksiêm mĭn: Si ngă Aê Diê brei phung ƀuôn sang Isrel mdưm sa čô mtao? Ya hnơ̆ng čuăn leh anăn knuih čiăng mdưm sa čô jing mtao? Hƀuê ênuk brei ƀuh si phung mtao Israel jing? Ya klei hriăm mñă kơ Phung Sang Aê Diê hruê anei?
Israel jing čar Aê Diê kiă kriê, Aê Diê ruah diñu leh anăn Ñu jing Mtao kiă kriê diñu, kyuanăn klei mdưm sa čô mtao kiă kriê amâo djŏ klei Aê Diê čiăng ôh. Ƀiădah Aê Diê thâo êlâo leh phung ƀuôn sang Israel čiăng mâo sa čô mtao kiă kriê msĕ si čar mkăn snăn Aê Diê brei diñu dưi mâo klei diñu čiăng. Tinei Aê Diê mtô lač diñu kơ hnơ̆ng čuăn leh anăn knuih sa čô mtao čiăng kơ mtao leh anăn phung ƀuôn sang mâo klei jăk mơak. Tal sa, Aê Diê pô ruah mtao amâo djŏ ruah tui si klei phung ƀuôn sang khăp čiăng ôh. Tal dua, brei ruah mtao mơ̆ng phung ayŏng adei diñu, amâo dưi mdưm sa čô tue ôh, kyuadah mtao srăng kiă kriê klei mĭn diñu. Tal tlâo, amâo dưi bi mâo lu aseh čiăng bi yưng klei ktang lĭng kahan kyua huĭ atăt phung ƀuôn sang Aê Diê lŏ wĭt kơ čar Êjip, jing čar hing ang mâo lu aseh. Tal pă, amâo dưi bi mâo lu mô̆ huĭdah ai tiê ñu lui wir Aê Diê. Tal êma, amâo dưi mkăm pioh lu prăk mah kyuadah ñu srăng knang kơ mnơ̆ng mnuă. Tal năm, jing klei yuôm hĭn kơ jih jang, brei mtao djă pioh hră čih mơ̆ng hdruôm hră klei bhiăn, dlăng leh anăn ksiêm mĭn hruê mlam čiăng huĭ mpŭ kơ Aê Diê leh anăn răng ngă tui hlue jih Klei Blŭ mơ̆ng klei bhiăn.
Aê Diê khăp kơ phung ƀuôn sang Ñu snăn Ñu mtô lač êlâo djăp mta klei. Hlăk Y‑Samuel mduôn awăt, phung ƀuôn sang Aê Diê akâo brei mdưm sa čô mtao msĕ si phung găp djuê mkăn (I Y‑Samuel 8:1‑22). Êdei kơnăn, păt čiăng jih jang phung mtao hlăm hƀuê ênuk Israel ngă soh hŏng klei Aê Diê kăm ghă. Mtao Salômôn mâo lu lĭn aseh, lu lĭn mô̆, leh anăn prăk mah… phung mtao čuê êdei lu kơ tui hlue lăn ala, gao klei bhiăn Aê Diê, amâo mă yua klei bhiăn Aê Diê ngă atur kiă kriê lăn čar ôh, kyuanăn atăt truh kơ klei jhat ktrŏ kjham kơ phung ƀuôn sang Aê Diê.
Klei jing klei soh ngă kơ anak mnuih khăp tui msĕ si lăn ala hĭn kơ gưt asăp Aê Diê. Čiăng tlaih đuĕ mơ̆ng klei lăn ala kă kơ̆ng, snăn Klei Aê Diê Blŭ brei jing jar jing giê mkă yuôm bhăn kơ phung khua kiă kriê wăt kơ jih jang phung anak Aê Diê msĕ si Klei Aê Diê Blŭ mtô kơ Y‑Yôsuê: “Hdruôm hră klei bhiăn anei đăm bi đuĕ kbưi mơ̆ng ƀăng êgei ih ôh, brei ih ksiêm dlăng hruê mlam, snăn kơh ih dưi răng čiăng tui hlue jih klei čih leh hlăm anăn. Snăn ih srăng čăt jing hlăm êlan ih, leh anăn ih srăng mâo klei dưi sĭt ” (Y‑Yôsuê 1:8). Khua gĭt gai Phung Sang Aê Diê amâo dưi kbưi hŏng Klei Aê Diê Blŭ ôh, amâo knang kơ klei ktang klei dưi, prăk mah mnơ̆ng mnuă ôh. Brei čiêm rông nanao ai tiê klei mĭn huĭ mpŭ kơ Aê Diê leh anăn djă pioh Klei Aê Diê Blŭ kluôm jih klei hdĭp čiăng dưi atăt phung ƀuôn sang Aê Diê mŭt hlăm kdrăn rơ̆k mda êa êngeh êđăp ênang.
Si drei bi êdah klei huĭ mpŭ kơ Aê Diê leh djă pioh Klei Aê Diê Blŭ?
Wah lač: Ơ Khua Yang, Ih jing Pô ti dlông hĭn kơ phung yang ti lăn ala. Akâo Ih mtô kâo knŏng knang hjăn kơ Khua Yang leh anăn grăp hruê kâo dưi mâo klei jăk mơak hlăm klei gưt asăp.
Dlăng Klei Aê Diê Blŭ hlăm tlâo thŭn: Y‑Êsai 40:1‑26
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
