Klei Aê Diê Blŭ: Y‑Mathiơ 8:28-34
Êlan kliăng: “Brei ih khăp kơ Khua Yang Aê Diê ih hŏng jih ai tiê, hŏng jih mngăt, hŏng jih klei mĭn, leh anăn hŏng jih ai ktang ih.’ Anei klei bhiăn tal dua, ‘Brei ih khăp kơ pô riêng gah ih msĕ si kơ ih pô.’ Amâo lŏ mâo klei bhiăn prŏng hĭn kơ dua mta anăn ôh.” (Y‑Markôs 12:30-31).
Klei êmuh ksiêm mĭn: Si ngă Khua Yang Yêsu suôt yang jhat mơ̆ng dua čô mnuih ƀuôn sang Gađara? Ya ngă phung ƀuôn sang ti Gađara suôt Khua Yang kbiă mơ̆ng krĭng diñu dôk? Ya mta drei mdưm êlâo hĭn hlăm klei hdĭp pô?
Leh dưi ghă angĭn êbŭ, Khua Yang Yêsu leh anăn phung ƀĭng kna nao kơ hang nah dih Êa ksĭ Galilê, hlăm krĭng lăn Gađara, jing krĭng Gêrasen (Y‑Markôs 5:1). Anei jing krĭng phung amâo đaŏ ôh. Tinăn, Khua Yang tuôm hŏng dua čô mnuih yang jhat ngă dôk hlăm msat, jhŏng snăk, grăp čô huĭ leh anăn ñĕ đuĕ. Klei tuôm amâo tuôm bi kčah êlâo hŏng Khua Yang Yêsu mơ̆ng dua čô amâo thâo anăn anei đru kơ klei hdĭp diñu pŏk sa êlan mrâo. Leh phung yang jhat ƀuh Khua Yang Yêsu, diñu thâo kral Khua Yang jing Yang Mêsia snăn diñu ur leh anăn bŏ hŏng klei huĭ, hlăk mphŭn êlâo dih phung ƀuôn sang huĭ kơ diñu tơ găn tinăn. Phung Yuđa tuôm thâo kơ hruê phat kđi, Aê Diê leh anăn Yang Mêsi srăng bi djiê jih phŭn agha phung yang jhat. Anăn jing mta phŭn leh ƀuh Khua Yang Yêsu, phung yang jhat lu dôk hlăm dua čô anei huĭ, diñu huĭ kơ Khua Yang srăng bi kmhal diñu êlâo kơ hruê bi kčah. Khua Yang Yêsu amâo bi blŭ hrăm amâodah ngă ya mta bruă ôh hŏng phung yang jhat lu anei, Ñu knŏng lač hŏng klei blŭ: “Nao bĕ!”. Klei blŭ bŏ hŏng kơhưm dưi bi mtlaih klei hdĭp dua čô digơ̆ mơ̆ng sui leh yang jhat krư̆ kđăl kă tling. Khua Yang brei diñu mŭt hlăm êpul ŭn leh anăn jih êpul ŭn huĭ kdjăt êran trŭn mơ̆ng čư̆ dơ̆ng kdâo hlăm êa ksĭ djiê jih.
Leh hmư̆ êpul ŭn djiê jih, jih ƀuôn sang êran nao bi tuôm hŏng Khua Yang akâo Ñu kbuă mơ̆ng čar diñu kyua huĭdah êpul ŭn mkăn srăng luč liê. Drei ƀuh sa klei amâo djŏ tinei. Hlăk phung ƀuôn sang Gađara êran nao dlăng, diñu ƀuh amâo djŏ knŏng hjăn Khua Yang ôh, ƀiădah lŏ ƀuh dua čô mnuih yang jhat ngă jhŏng ktang snăk mơ̆ng êlâo dih, bi ară anei dôk gŭ tinăn, ênang êưih, mngač tač. Diñu amâo mơak ôh kyua dua čô mnuih ƀuôn sang diñu dưi hlao, ăt kăn mâo rei sa klei bi mni lač jăk kơ Khua Yang đru leh diñu mơ̆ng ară anei dưi găn tinăn amâo lŏ huĭ hyưt ôh, ƀiădah diñu knŏng hơưi kơ ŭn diñu đuč. Kyua anăn, diñu suôt Khua Yang kbiă mơ̆ng čar. Diñu dlăng kơ mnơ̆ng dhơ̆ng yuôm hĭn kơ klei mơak Pô Bi Mtlaih ba brei kơ diñu, dlăng kơ ŭn yuôm hĭn kơ dua čô mnuih ƀuôn sang pô.
Khua Yang Yêsu bi hriăm leh:“ ‘Brei ih khăp kơ Khua Yang Aê Diê ih hŏng jih ai tiê, hŏng jih mngăt, hŏng jih klei mĭn, leh anăn hŏng jih ai ktang ih.’ Anei klei bhiăn tal dua, ‘Brei ih khăp kơ pô riêng gah ih msĕ si kơ ih pô.’ Amâo lŏ mâo klei bhiăn prŏng hĭn kơ dua mta anăn ôh.” (Y‑Markôs 12:30-31). Ti krah ala ƀuôn arăng khăng dlăng kơ mnơ̆ng dhơ̆ng jing yuôm hĭn kơ Khua Yang leh anăn klei khăp mnuih, arăng jhŏng bi čăm bi mdjiê mnuih wăt hlăm gŏ sang kyua prăk, ƀiădah phung đaŏ kơ Krist amâo dưi brei ôh ya mta mnơ̆ng yuôm hĭn kơ Khua Yang leh anăn klei khăp mnuih, anăn jing klei bhiăn yuôm bhăn hĭn Khua Yang Yêsu bi hriăm leh.
Drei srăng bi liê mơ̆ prăk mah, mnơ̆ng dhơ̆ng čiăng mâo Khua Yang leh anăn klei khăp mnuih?
Wah lač: Ơ Khua Yang, jing Pô myang hĭn kâo kkuh mpŭ leh anăn mă bruă. Akâo kơ Khua Yang đru kâo hdĭp huĭ mpŭ kơ Aê Diê, khăp kơ pô mkăn čiăng kâo amâo dlăng kơ mnơ̆ng dhơ̆ng yuôm hĭn ôh hlăm klei hdĭp kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: I Bruă Mtao 11:1-25
Kênh Youtube BHKTHN:
