Klei Aê Diê Blŭ: Hêbrơ 2:10‑18
Êlan kliăng: “Kyuadah jing djŏ leh Aê Diê Pô mjing leh anăn krơ̆ng jih jang mnơ̆ng, hlăm klei Ñu atăt lu anak kơ klei guh kơang, srăng brei Yêsu Pô atăt diñu kơ klei bi mtlaih jing jăk klă hŏng klei knap mñai Gơ̆ tŭ” (Hêbrơ 2:10).
Klei êmuh ksiêm mĭn: Si mblang klei Khua Yang Yêsu “hŏng klei knap mñai Gơ̆ tŭ snăn dưi jing jăk klă”? Klei Khua Yang Yêsu dưi jing Khua Ngă Yang Prŏng si klei djŏ tuôm hŏng drei hlăm klei bi mtlaih leh anăn hlăm klei hdĭp grăp hruê?
Pô čih hră Hêbrơ lač kơ Khua Yang Yêsu jing “Pô atăt kơ klei bi mtlaih jing jăk klă hŏng klei knap mñai Gơ̆ tŭ” (êlan 10). Pô atăt kơ klei bi mtlaih mblang, Ñu mkra mjing klei bi mtlaih, pŏk êlan kơ jih jang mnuih dưi truh kơ klei bi mtlaih. Snăn, klei “jăk klă” tinei amâo lač kơ knuih Khua Yang Yêsu ôh, ƀiădah lač kơ bruă bi mtlaih Ñu ngă. Khua Yang Yêsu jing Pô jăk klă nanao. Ñu jing jăk klă dơ̆ng mơ̆ng êlâo kơ trŭn hriê ti lăn ala. Ñu jing jăk klă hlăk adôk jing hđeh điêt dôk đih hlăm kniêm rơ̆k. Ñu jing jăk klă êjai ênuk hlăk krah hdĭp ti ƀuôn Nasaret. Ƀiădah, knŏng tơl hlăk Ñu ngă bi leh bruă jao, tŭ klei knap mñai êbat ti êlan nao kơ kyâo bi kal snăn bruă jao bi mtlaih mnuih Ñu dưi jing jăk klă.
Čiăng kơ bruă bi mtlaih dưi jing jăk klă, Pô Hrih Mjing Dôk Hdĭp Hlŏng Lar amâo thâo djiê ôh, gui leh kđeh leh anăn êrah kơ asei mlei Ñu pô, jing sa čô mnuih kluôm dhuôm čiăng dưi djiê leh anăn dưi hĭn kơ yang jhat jing pô mâo klei myang klei djiê (êlan 14). Kyuadah Khua Yang Yêsu jing mnuih kluôm dhuôm snăn Ñu dưi bi ala kơ jih jang mnuih ti anăp Aê Diê Ama hlăm bruă jing Khua Ngă Yang Prŏng. Hlăm ênuk Klei Bi Mguôp Hđăp, phung ƀuôn sang Israel knang kơ khua ngă yang jing pô ti krah diñu hŏng Aê Diê. Êjai khua ngă yang dôk mkra hdră bhiăn bi tui klei soh kơ grăp čô mdê mdê snăn knŏng hjăn păn khua yang prŏng kơh dưi mkra hdră bhiăn bi tui klei soh kơ jih jang phung ƀuôn sang.
Hŏng bruă Khua Ngă Yang Prŏng, Khua Yang Yêsu mgaih mkra klei soh phung mnuih. Ƀiădah, êngao kơ klei čiăng prŏng hĭn jing klei bi mtlaih snăn anak mnuih ăt adôk lu lĭn mta klei boh mkăn hlăm klei hdĭp grăp hruê. Lu blư̆ tlă anăp hŏng klei ruă knap, phĭ ai tiê, drei čiăng krao ‘si ngă amâo mâo pô thâo săng brei kơ kâo đa ôh?’ drei bi ƀuh klei bi juh mơ̆ng anak mnuih, klei mgaih mkra mơ̆ng hră mơar, đĭng mđŭng asăp… amâo dưi wĭt lač mta klei mâo hlăm lam ai tiê drei ôh. Grăp blư̆ msĕ snăn, brei drei hdơr kơ KhuaYang Yêsu pô “tŭ leh klei knap mñai êjai tuôm hŏng klei mplư, snăn ñu dưi đru phung tuôm hŏng klei mplư” (êlan 18). Ñu amâo knŏng ƀuh ôh ƀiădah wăt găn leh mơh klei dleh dlan drei tlă anăp. Hriê bĕ kơ Khua Yang čiăng mă tŭ klei bi mtlaih mơ̆ng Ñu.
Si ngă drei čiăng mă tŭ mơ̆ klei bi mtlaih mơ̆ng Pô “hŏng klei knap mñai Gơ̆ tŭ snăn dưi jing jăk klă”?
Wah lač: Bi mni lač jăk kơ Khua Yang Yêsu tŭ ư leh klam klei ruă knap leh anăn djăp mta klei dleh dlan hlăm asei mlei mnuih čiăng thâo săng leh anăn dưi bi mtlaih jih jang mnuih. Hlăk kâo ƀuh amâo mâo pô dưi đru kâo ôh, akâo Khua Yang brei kâo jhŏng êran nao kơ Ih čiăng mă tŭ klei bi mtlaih mơ̆ng Khua Ngă Yang Prŏng kâo, Pô hŏng klei knap mñai Gơ̆ tŭ snăn jih jang klei dưi jing jăk klă.
Dlăng Klei Aê Diê Blŭ hlăm tlâo thŭn: Y‑Êsai 37:1‑20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
