II Hơ’mon 34:22-33
“Na gah tơdrong mơ̆ng đe bơtho tơdrong ‘Bok Kei-Dei pơkă, bơngai bu mơ̆ng hăm pơm kiơ̆, ưh kơ hiơt dôm tơdrong đe bơtho, bơngai noh hiôk tơpă boih, yua kơ tơdrong ‘Bok Kei-Dei ‘lơ̆ng tơpă ăn kơ kon bơngai bơ̆n klaih rơngei đơ̆ng tơdrong yoch.” (Yakơ 1:25)
Nơ̆r jet tơchĕng pơwao:
– Yă Hulda bơngai mă pơtruh nơ̆r ‘Bok Kei-Dei noh pơma kiơ?
– Pơtao Jôsia, Kră Yang mơnat kơ Sư thoi yơ?
– Pơtao Jôsia pơpôi đĭ-đăng kon pơlei wă pơkă kiơ?
– Bơ̆n đŏk, hŏk pơhrăm nơ̆r Kră Yang păng pơm kiơ̆ thoi yơ?
Khul bơngai mă ‘bok Pơtao wơh năm tơ yă Hulda bơngai pơtruh nơ̆r Kră Yang noh lu sư wă kơ hlôh hơđăl kơ Nơ̆r Kră Yang. Yă Hulda roi ăn kơ lu sư, khan “Kră Yang Yêhôwa khan thoi âu”, sư roi nơ̆r ‘noh truh tơ ‘bar ‘măng wă pơma tơpăt khan đơ̆ng Nơ̆r Kră Yang tơpă thoi noh bơih.Kră Yang tơbăt kơ lu sư lăm hla bơar mă đe chih bơih khan lu sư gô pŭ hơngiap, đe kư̆m đŏk ăn kơ ‘bok pơtao Jôsia mơ̆ng kơtơ̆ng bơih, yua kơ lu sư achăng lê̆ Kră Yang, soh pơgang ‘bâu phu ăn kơ yang kơnê̆, lei na tơdrong Kră Yang hil mĭl gô tuh tơ teh đak sư. Lu sư hlôi pơm glăi hăm tơdrong juăt Kră Yang, lei na lu sư khŏm pŭ hơngiap (Bơtho Khôi Juăt 28:15-68). Tơdrong Kră Yang sek tơlang ưh kơ jor ôh, kư̆m ưh kơ đei bơngai bu gơh klĕnh hlot đơ̆ng tơdrong Sư sek tơlang noh. Mă-lei yă Hulda đei roi ăn kơ pơtao Jôsia nơ̆r hơmĕng yua kơ Kră Yang hlôi lăng ‘bôh jơhngơ̆m pơtao âu rơmuăn,tơjur akâu,tơbral tơdrong yoch đĭ jơhngơ̆m tơpă. Pơtao Jôsia âu lăp sư mơ̆ng kơtơ̆ng đe đŏk ăn kơ sư Nơ̆r Kră Yang, na sư tơwih hăm jơhngơ̆m tơbral hloi, tơwih thoi noh ‘lơ̆ng dêh, trŏ dêh. Yua kơ thoi noh na tơdrong Kră Yang wă hil phak lu bơngai Juđa mă Sư yua lu bơngai Babilôn rôp chông lu sư pơm bơnă tơ char Babilôn noh đơ̆ng rŏng kơ pơtao Jôsia lôch bơih,noh tơ’bôh tơdrong Kră Yang mơnat huay kơ jô̆ yo, huay kơ phak pơtao Jôsia thoi Sư khan wă phak noh yua kơ pơtao Jôsia tơbral tơdrong yoch sư bơih noh.
Đơ̆ng rŏng kơ mơ̆ng kơtơ̆ng dôm lu nơ̆r noh, pơtao Jôsia, jơhngơ̆m sư rơih iŏk hơmet ming ‘nao plơ̆ng dơ̆ng tơdrong bơngai Juđa pơgơ̆p pơkă hăm Kră Yang. Sư krao pơpôi đĭ-đăng kon pơlei, na năm tŏk tơ hnam akŭm ‘Bok Kei-Dei, kơdih sư hloi đŏk ăn kơ lu kon pơlei mơ̆ng Nơ̆r ‘Bok Kei-Dei pơgơ̆p pơkă hăm lu sư sơ̆ mă đe đei chih lê̆ lăm Hla bơar, Hla bơar noh sư chă ‘bôh đơ̆ng lăm Hnam akŭm. Pơtao Jôsia pơgơ̆p pơkă wă kiơ̆ Kră Yang păng đĭ jơhngơ̆m, tơdrong tơchĕng wei răk khôi juăt, pơm keh Nơ̆r pơgơ̆p pơkă mă đe đei chih bơih lăm hla bơar. Sư kư̆m pơm kơ đĭ-đăng bơngai lăm dêh char Isơrael khŏm kơkuh bơ̆jang kơ Kră Yang. Đĭ lăm chăl pơtao Jôsia pơgơ̆r noh, lu sư ưh kơ đei achăng lê̆ Kră Yang.
Tơdrong pơtao Jôsia hơmet ming dơ̆ng tơdrong pơgơ̆p pơkă plơ̆ng ‘nao ‘nâu đei ‘bar pah: lăm jơhngơ̆m păng lăm tơdrong arih jang, pơm. Mă minh, hăm đĭ jơhngơ̆m tơdrong tơchĕng, sư pơkă wă wei răk khôi juăt, nơ̆r Kră Yang tơtă. Mă ‘bar, sư pơkă pơm keh dôm nơ̆r pơgơ̆p pơkă hăm Kră Yang, pơkeh hăm tơdrong sư chu jang, chu pơm hloi. Đĭ chăl arih sư, sư athei kon pơlei Kră Yang khŏm pơm kiơ̆ Nơ̆r pơgơ̆p pơkă hăm Kră Yang noh. (tr 32-33).
Lăp pơtao Jôsia kơtơ̆ng đe đŏk Nơ̆r Kră Yang, sư ưh kơ pôm sơ’ngon, tơbral tơdrong yoch đĕch ôh, mă-lei sư wă mă hlôh nhen, rơđah hơđăl hloh dơ̆ng dôm lu Nơ̆r mă sư hlôi mơ̆ng kơtơ̆ng bơih noh.Ưh kơ dơ̆ng ‘bơ̆t doh, ba sư khŏm truh tơ pơkă pơm kiơ̆ hloi dôm Nơ̆r mă sư hlôi kơtơ̆ng đe đŏk bơih noh. Đơ̆ng nơ̆r lu sư pơkă, đơ̆ng lu sư wei răk pơm kiơ̆ kơ nơ̆r lu sư pơkă noh bơih na minh jơhnơr arih lu sư ei klaih đơ̆ng tơdrong Kră Yang hil phak. Na tơdrong mă Kră Yang wă hil phak, Sư wă yua lu bơngai Babilôn rôp chông bơngai Isơrael pơm bơnă tơ char lu sư noh, Kră Yang pơhiơ̆ lê̆ dĭng truh tơ lu bơngai Isơrael hơlơ̆k pơm yoch dơ̆ng đơ̆ng rŏng kơ pơtao Jôsia lôch bơih noh.
Dang ei, bơ̆n đei Hla bơar Nơ̆r ‘Bok Kei-Dei, chĕp tơ ti bơ̆n, bơ̆n athei tơnăp pơnam kơ đŏk, hŏk pơhrăm, tơchĕng pơwao dĭng mă hlôh păng pơm kiơ̆ Nơ̆r Kră Yang.
Tơdah tam mă tôm, oei kơ’bah tơdrong kiơ, bơ̆n athei hơlơ̆k pơkă dơ̆ng hăm Kră Yang, đơ̆ng noh đĭ jơhngơ̆m, đĭ tơdrong tơchĕng bơwei păng pơm kiơ̆ Nơ̆r Kră Yang.
Ơ Kră Yang, apinh Ih tơgŭm inh đĭ jơhngơ̆m đŏk, hŏk pơhrăm Nơ̆r Ih,ưh kơ pôm mơ̆ng kơtơ̆ng lăm đon đĕch khan tôm bơih, wă kơ inh mơ̆ng, hlôh păng pơm kiơ̆ hloi,wă kơ inh đei pŭn hiôk đơ̆ng inh pơm kiơ̆ Nơ̆r Ih noh. Inh krao khan yua anăn Kră Yang Yêsu Krist, Amen!
Hăm đei pang yơ bơ̆n tam mă chu pơm kiơ̆ kơ Nơ̆r Kră Yang ưh?
Đŏk Sơ̆p Hla bơar ‘Bok Kei-Dei lăm pêng sơnăm: Tơdrong Jang 14.
Kênh Youtube BHKTHN:
