Klei Aê Diê Blŭ: II Klei Yăl Dliê 34:22-33
Êlan kliăng: “Ƀiădah hlei pô ksiêm dlăng klei bhiăn klă ênŭm, klei bhiăn kơ klei êngiê, leh anăn gĭr tŭ ngă, amâo jing ôh mnuih knŏng hmư̆ hlŏng wơr bĭt hĕ, ƀiădah jing sa čô tui ngă, mnuih anăn srăng mâo klei jăk jĭn hlăm bruă ñu” (Y-Yakơ 1:25)
Klei êmuh ksiêm mĭn: Ya klei khua pô hưn êlâo mniê H’Hulda lač leh? Si Aê Diê pap leh kơ Mtao Jôsia? Mtao bi kƀĭn phung ƀuôn sang čiăng ƀuăn ya klei? Si drei dlăng, hriăm leh anăn hlue ngă Klei Aê Diê Blŭ?
Êpul bi ala kyua Mtao Jôsia tiŏ nao bi tuôm hŏng Khua pô hưn êlâo mniê H’Hulda čiăng thâo săng hĭn kơ Klei Aê Diê Blŭ. Ñu lač hŏng digơ̆ “Snei Yêhôwa Aê Diê Israel lač” truh dua blư̆ čiăng bi mklă anei djŏ jing klei blŭ Aê Diê. Aê Diê brei thâo diñu srăng tŭ klei tăm pah čih leh hlăm hdruôm hră mtao dlăng leh kyua lui Aê Diê, čuh mnơ̆ng ƀâo mngưi kơ phung yang soh, kyua anăn klei Aê Diê ngêñ srăng tuh ti lăn diñu. Diñu ngă soh hŏng klei bhiăn Aê Diê kyua anăn tŭ klei tăm pah (Klei Mtô Mñă Klei Bhiăn 28:15-68). Klei phat kđi jing klei amâo dưi tlaih ôh. Ƀiădah ñu mâo klei čang hmăng kơ Mtao Jôsia kyua Aê Diê ƀuh leh ai tiê kpă ênô, êdu êun, luă gŭ, kmhal klei soh, ênguôt hnĭng mtao kyua klei soh. Mtao mâo leh klei ngă djŏ klă tơdah hmư̆ dlăng Klei Aê Diê Blŭ. Kyua anăn, klei phat kđi kơ Yuđa jing diñu srăng tŭ klei arăng mă jing hlŭn ti čar Ƀaƀilôn, srăng truh tơdah leh mtao djiê.
Leh hmư̆ klei anei, Mtao Jôsia čuăn ai tiê lŏ bi mrâo klei bi mguôp hŏng Aê Diê. Ñu bi kƀĭn phung ƀuôn sang, nao ti Sang yang Aê Diê, ñu pô dlăng kơ digơ̆ ya Klei Blŭ hlăm hdruôm hră Klei bi mguôp ƀuh leh hlăm Sang yang. Mtao mkŏ mjing klei bi mguôp ƀuăn êbat tui hlue Aê Diê, jih ai tiê, jih mngăt djă pioh klei bhiăn, bi sĭt Klei bi mguôp čih leh hlăm hdruôm hră. Mtao ăt ngă kơ phung dôk ti Yêrusalem leh anăn Êpul Ƀenjamin gưt hlue si klei bi mguôp anăn leh anăn ăt ngă kơ grăp čô mnuih hlăm ala čar Israel brei gưt mă bruă kơ Aê Diê. Jih klei hdĭp Mtao Jôsia, diñu amâo lui Aê Diê ôh.
Klei bi mrâo klei bi mguôp anei mâo dua mta: hlăm ai tiê leh anăn hlăm bruă ngă. Tal sa, hŏng jih ai tiê pô, mtao ƀuăn jih ai tiê djă pioh klei bhiăn Aê Diê. Tal dua, mtao ƀuăn hlue ngă ya Klei bi mguôp hlăm bruă ngă gưt asăp. Jih klei hdĭp pô, mtao brei jih jang phung ƀuôn sang brei hlue ngă klei bi mguôp anăn (êlan 32-33).
Amâo djŏ knŏng kmhal, ênguôt hnĭng kơ klei soh tơdah hmư̆ Klei Aê Diê Blŭ, Mtao Jôsia lŏ čiăng thâo săng êlam hĭn kơ Klei Blŭ hmư̆ leh. Kyua klei bi mguôp anei mtao hŏng phung ƀuôn sang, sa ênuk mâo klei bi mtlaih mơ̆ng klei phat kđi. Klei jing hlŭn dưi bi kdung tơl tơdah diñu lŏ ngă soh hŏng Aê Diê leh Mtao Jôsia djiê.
Hruê anei drei mâo Klei Aê Diê Blŭ hlăm kngan, brei jih ai tiê dlăng leh anăn hriăm Klei Aê Diê Blŭ hŏng klei sĭt suôr leh anăn hlue ngă Klei Aê Diê Blŭ. Tơdah adôk kƀah ya klei, brei lŏ ƀuăn rơ̆ng hŏng Aê Diê, jih ai tiê, jih mngăt djă pioh Klei Aê Diê Blŭ leh anăn hlue ngă.
Mâo mơ̆ ya bruă drei ka gưt Klei Aê Diê Blŭ?
Wah lač: Ơ Khua Yang, akâo kơ Ih đru kâo jih ai tiê dlăng, hriăm Klei Aê Diê Blŭ leh anăn hlue ngă Klei Aê Diê Blŭ, amâo djŏ knŏng hjăn hmư̆ jing djăp leh ôh, čiăng kơ kâo mâo klei hơêč hmưi hlăm klei gưt asăp. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 14
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
