Klei Aê Diê Blŭ: Y-Yakơ 1:1-4
Êlan kliăng: “2Ơ phung ayŏng amai adei, tơdah diih tuôm hŏng klei lông dlăng lu mta, brei diih yap klei anăn jing klei hơ̆k mơak sơăi. 3Kyuadah diih thâo leh klei lông dlăng kơ klei diih đăo mjing klei gĭr.” (Y-Yakơ 1:2-3).
Klei êmuh ksiêm mĭn: Ya klei Y-Yakơ mtă mtăn kơ phung đăo phung Israel dôk bra đuê̆ tar ƀar anôk? Ya ngă ñu mtă mtăn msĕ snăn? Hlei pô đa đa Klei Aê Diê Blŭ čih kơ klei Khua Yang mtô mjuăt hlăm klei lông dlăng êlâo kơ Khua Yang yua diñu? Ya klei brei drei ngă čiăng dưi mâo klei hơ̆k mơak hlăm klei lông dlăng?
Y-Yakơ čih hră mơĭt kơ phung anak Aê Diê phung Israel dôk bra hiu hlăm lu boh čar mdê mdê ƀiădah diñu mâo klei msĕ anăn jing dôk găn lu klei lông dlăng. Ñu amâo čih ôh “tơdah” tuôm hŏng klei lông dlăng ƀiădah sĭt yơh srăng tuôm hŏng klei lông dlăng, leh anăn lu mta klei lông dlăng mdê mdê, si tô hmô klei ƀun ƀin (2:6), klei ruă duam (5:14)… Tơdah tlă anăp hŏng klei lông dlăng, arăng khăng mâo klei kdơ̆ng wĭt jŭ jhat msĕ si blŭ dŭñ dŭñ ăl čôñ (I Kôrantô 10:10), amâodah êdu ai (Hêbrơ 12:5). Y-Yakơ brei klei mtă mtăn msĕ si bi mklăk hŏng klei bhiăn mĭn, brei yap klei dleh knap lông dlăng anăn jing klei hơ̆k mơak, leh anăn jing klei hơ̆k mơak sơăi, kluôm dhuôm amâo djŏ knŏng krah dưh ôh!
Y-Yakơ mblang klei lông dlăng kơ klei đăo yơh bi truh klei gĭr (Rôm 5:3-4). Msĕ si sa čô kahan hlăm kdrăn bi ep hriăm phung kahan, kyua hŏng klei bi hriăm mjuăt dleh knap yơh dưi mâo klei tŭ gĭr đĭ kdlưn hĭn êjai. Ñu ăt bi mđing kơ drei brei gĭr tŭ klei lông dlăng tơl truh ti knhal tuč, amâo djŏ lui phưi hĕ krah dưh ôh, msĕ si phung êran hung kñăm čiăng truh kơ anôk bi kčah tơl bi leh ênŭm klei êran diñu (Philip 3:14), snăn kơh drei dưi “jing klă kluôm, amâo mâo anôk kƀah ôh” leh anăn tơl jing mnuih tŭ dưn kơ lu mnuih. Boh blŭ “klă kluôm” tui si klei mblang phŭn jing dưi truh kơ anôk bi kčah, kyuanăn klei gĭr tŭ đru kơ klei hdĭp myang drei đĭ hriê kơ prŏng.
Hlăm klei blŭ phŭn, boh blŭ “klei mplư” leh anăn boh blŭ “klei lông dlăng” mblang jing sa boh blŭ. Tơdah Satan jing pô mtrŭt mčhur brei drei ngă soh snăn pia jing klei mplư. Tơdah klei dleh dlan hriê mơ̆ng Khua Yang čiăng bi hriăm mjuăt phung anak Ñu snăn pia jing klei lông dlăng. Hlăm Klei Aê Diê Blŭ amâo mâo ôh pô Aê Diê yua ƀiădah amâo tuôm găn hĕ klei lông dlăng, msĕ si Y-Yôp (Y-Yôp 1:12), amâodah Y-Abraham (Klei Mphŭn Dơ̆ng 22:1-2)… Klei lông dlăng klei đăo bi msĕ hŏng klei yua pui čiăng brei mah dưi jing doh hluôm mâo ênoh yuôm hĭn. Msĕ si Y-Yôsep, hlăk mrâo mâo pluh kjuh thŭn, Aê Diê brei kơ ñu ƀuh dua klei êpei, hưn êlâo kơ hruê êdei anăp ñu srăng jing khua djă bruă prŏng (Klei Mphŭn Dơ̆ng 37:1-11), ƀiădah tơl truh kơ ñu mâo tlâo pluh thŭn kơh ñu jing pô tal dua knŏng ti gŭ kơ Pharaôn čar Êjip (Klei Mphŭn Dơ̆ng 41:39-46). Hlŏng kơ jih pluh tlâo thŭn êgao ñu tŭ lu klei lông dlăng msĕ si klei phung ayŏng ñu pô čhĭ ñu jing hlŭn, tŭ klei mplư klei soh tlĕ piu, tŭ klei arăng mčeh luar, arăng krư̆ kđăl hlăm war mnă. Y-Yôsep jing msĕ si mah arăng bi doh leh, tŭ dưn kơ lu mnuih, bi guh kơang kơ Anăn Aê Diê. Brei drei lŏ dlăng wĭt kơ hrue gao leh hlăm klei hdĭp drei, brei thâo ƀuh klei čiăng jăk mơ̆ng Khua Yang găn hŏng klei lông dlăng truh, čiăng kơ drei dưi hơ̆k mơak bi mni lač jăk kơ Ñu.
Si ngă drei tuôm mâo klei bi knal jăk siam kơ klei lông dlăng truh leh kơ drei mơ̆?
Ơ Khua Yang, akâo kơ Ih pŏk mblang ală kâo čiăng kơ kâo thâo ƀuh klei čiăng jăk Ih hlăm jih klei lông dlăng, akâo kơ Ih đru kâo găn hŏng klei dưi hĭn leh anăn hơ̆k mơak bi mni lač jăk kơ Ih.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: Klei Yap 2
Kênh Youtube BHKTHN:
