Klei Aê Diê Blŭ: Klei Bi Hriêng 21:2-3
Êlan kliăng: “Ngă klei kpă ênô leh anăn klei djŏ jing klei Yêhôwa mơak lu hĭn kơ mnơ̆ng ngă yang.” (Klei Bi Hriêng 21:3)
Klei êmuh ksiêm mĭn: Hlei pô dưi ksiêm dlăng djŏ klă ai tiê anak mnuih? Mơ̆ng ya phŭn klei mtrŭt kbiă hriê čiăng Hdĭp djŏ leh anăn kpă bi mơak kơ Aê Diê brei? Ya klei brei drei mđing leh anăn bi mlih mơ̆ng klei hriăm hruê anei?
Anak mnuih knŏng dlăng ti êngao, knŏng Yêhôwa Aê Diê ƀuh klă klei mĭn, klei thâo săng hlăm lam ai tiê anak mnuih hŏng klei kluôm ênŭm. Klei Bi Hriêng 21:2 lŏ mñă wĭt Klei Bi Hriêng 16:2, bi mklă wăt tơdah anak mnuih mgang kơ êlan ñu pô jing djŏ, đăo amâodah čŏng lač knuih hdĭp pô jing djŏ klă, ƀiădah wăt tơdah thâo mĭn snăk dưn mơh, wăt mâo klei bi êdah mơ̆ng Aê Diê dưn, diñu ăt knŏng thâo sa kdrêč đuč klei mĭn hlăm ai tiê pô leh anăn pô mkăn (Klei Bi Hriêng 20:5). Knŏng Yêhôwa Aê Diê jing Pô ƀuh jih ai tiê klei mĭn drei, Ñu pô srăng ksiêm dlăng ai tiê anak mnuih.
Mơ̆ng klei mĭn hlăm ai tiê, anak mnuih srăng truh kơ bruă ngă. Phung mâo ai tiê kpă snăn bruă ngă srăng djŏ. Leh anăn dŭm bruă ngă hlue si klei kpă ênô leh anăn djŏ srăng bi mơak kơ Aê Diê. Ñu ksiêm dlăng bruă ngă hlue si klei kpă ênô mơ̆ng sa čô mnuih hĭn kơ mnơ̆ng pô anăn myơr kơ Ñu (êlan 3). Klei bi msĕ anei amâo bi mdlưh bruă myơr mnơ̆ng hdĭp amâodah mnơ̆ng ngă yang ôh, ƀiădah Klei Aê Diê Blŭ čiăng mtô drei mnơ̆ng ngă yang, klei bhiăn klei đăo knŏng mâo ênoh tơdah phung myơr kơ Aê Diê mâo ai tiê kpă leh anăn bruă ngă djŏ. Aê Diê pô thâo săng jih mơ̆ng klei mĭn truh kơ klei mtrŭt djăp mta bruă drei ngă. Anak mnuih dlăng leh anăn bi lač hdơ̆ng pô hlue si nah êngao ƀiădah Aê Diê mđing kơ ai tiê (I Y-Samuel 16:7). Kyua anăn phung ƀuôn sang Aê Diê brei hdĭp kpă ênô leh anăn djŏ hlue si Klei Aê Diê Blŭ mtô čiăng kơ klei hdĭp drei bi mơak kơ Ñu.
Khua Yang Yêsu čiăng kơ phung ƀuôn sang Aê Diê amâo djŏ knŏng bi êdah bruă kpă ênô mơ̆ng hdră ngă, klei kkuh mpŭ, ƀiădah brei klă sĭt mâo knuih hdĭp kpă leh anăn djŏ mơ̆ng klei mĭn truh kơ bruă ngă. Aê Diê mtô tơdah klei kpă ênô drei amâo kdlưn hĭn kơ klei kpă ênô phung khua čih hră leh anăn phung Pharisi, jing phung djă pioh leh anăn mtô klei bhiăn, snăn drei amâo dưi mŭt ôh hlăm Ƀuôn Ala Mtao (Y-Mathiơ 5:20). Akâo kơ Aê Diê đru djăp bruă drei ngă brei kbiă hriê mơ̆ng ai tiê khăp kơ Ñu. Nao sang Aê Diê, myơr jing klei jăk, ƀiădah đăm mĭn ôh kơ bruă “djă pioh klei bhiăn” jing ênŭm, myơr jing ngă leh kluôm klei bhiăn. Aê Diê thâo jih jang mta mtrŭt drei nao sang kkuh mpŭ, Aê Diê thâo klă ai tiê drei mĭn tơdah drei myơr. Aê Diê čiăng kơ drei nao kkuh mpŭ hŏng ai tiê khăp kơ Aê Diê, myơr hŏng ai tiê hdơr knga kơ Ñu. Grăp čô drei brei hdĭp djŏ hŏng ai tiê kpă ênô hlăm klei thâo kral Aê Diê jing Yêhôwa.
Mâo mơ̆ klei mĭn amâodah bruă ngă drei dôk mdăp hŏng phung mkăn, mdăp hŏng Aê Diê , amâo hdĭp hlue si klei kpă ênô leh anăn djŏ mơ̆ng Aê Diê?
Wah lač: Ơ Khua Yang, akâo kơ Ih pap brei kơ kâo kyua lu blư̆ kâo amâo hdĭp kpă ênô hŏng Ih, hŏng ayŏng amai adei kâo. Akâo kơ Ih đru kâo khăp nanao kơ Ih mơ̆ng klei mĭn truh kơ bruă ngă čiăng kâo hdĭp kpă ênô leh anăn djŏ klă bi mơak kơ Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mphŭn Dơ̆ng 21
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
