Klei Aê Diê Blŭ: Rôm 10:13-17
Êlan kliăng: “Kyuadah “Hlei pô iêu kwưh kơ anăn Khua Yang srăng tlaih.” Ƀiădah si mnuih dưi iêu wah lač kơ Pô diñu amâo đăo ôh? Leh anăn si diñu dưi đăo kơ Pô diñu ka tuôm hmư̆ ôh? Leh anăn si diñu dưi hmư̆ tơdah amâo mâo pô mtô ôh?” (Rôm 10:13-14).
Klei êmuh ksiêm mĭn: Ya jing dŭm mta klei khua ƀĭng kna Y‑Pôl êmuh? Ya klei ñu čiăng lač anăn? Mơ̆ng anôk mâo hĕ klei đăo? Hlei pô mâo bruă klam nao mtô Klei Aê Diê Blŭ? Si drei dôk ngă bruă klei mtă Khua Yang jao?
Leh hrêč mă klei blŭ khua pô hưn êlâo hlăm Y‑Yôel 2:32: “Hlei pô iêu kwưh kơ anăn Khua Yang srăng tlaih.” Khua ƀĭng kna Y‑Pôl lŏ čuê mbĭt klei mĭn ñu pô hŏng dŭm klei êmuh kñăm ktang kơ bruă klam pô hiu mtô. Ñu êmuh si mnuih dưi iêu wah lač kơ Pô diñu amâo đăo ôh? Si diñu dưi đăo kơ Pô diñu ka tuôm hmư̆ ôh? Si diñu dưi hmư̆ tơdah amâo mâo pô mtô ôh? (êlan 14). Khădah amâo djŏ ôh jih jang mnuih hmư̆ Klei Mrâo Mrang Jăk đăo sơăi, msĕ si phung Yuđa ăt khăng ai tiê amâo đăo ôh kơ Klei Aê Diê Blŭ hŏng phung Ñu tiŏ nao (Y‑Êsai 53:1). Lu blư̆ Aê Diê yua phung khua pô hưn êlâo, phung mnuih Ñu tiŏ nao hlăm Klei Bi Mguôp Hđăp leh anăn wăt hŏng phung hiu hưn klei đăo hlăm Klei Bi Mguôp Mrâo nao kơ phung Yuđa čiăng hưn bi êdah Yang Mêsi jing Khua Yang Yêsu Pô yơh. Khădah hmư̆ mtô msĕ snăn dưn ƀiădah bă truh kơ ară anei lu phung Yuđa ăt kăn đăo rei. Diñu ăt dôk čang guôn Yang Mêsi Aê Diê ƀuăn brei čiăng bi mtlaih diñu. Wăt snăn dưn, khua ƀĭng kna Y‑Pôl mñă kơ phung anak ƀuôn sang Aê Diê ti ƀuôn Rôm ăt hŏng jih ai tiê ngă bi leh bruă klam hiu hưn Klei Mrâo Mrang Jăk bi mtlaih kơ phung mnuih dôk rai luč kyuadah “klei đăo kbiă hriê mơ̆ng klei arăng hmư̆”, snăn čiăng arăng dưi hmư̆ brei mâo pô hiu mtô (êlan 17).
Snăn hruê anei hlei jing pô mâo bruă klam hiu mtô kơ Khua Yang Yêsu Pô Bi Mtlaih kơ jih jang mnuih? Anei jing klei mtă prŏng Aê Diê jao kơ phung khua ƀĭng kna êlâo kơ Ñu đĭ wĭt ti adiê leh anăn ăt jing bruă jao kơ jih jang drei jing phung anak Aê Diê mơh (Y-Mathiơ 28:18-19; Y‑Markôs 16:15). Čiăng kơ jih jang mnuih mâo klei wĭt lač kơ Klei Mrâo Mrang Jăk leh anăn mă tŭ Khua Yang Yêsu, snăn brei mâo mnuih hiu mtô kơ diñu thâo. Khua Yang čiăng kơ grăp čô phung anak Aê Diê hdĭp bi êdah nanao Anăn Khua Yang kơ jih jang mnuih hŏng klei dôk dơ̆ng ƀơ̆ng huă grăp hruê, amâo djŏ ôh dôk guôn mơ̆ng mâo hdră prŏng pioh hưn mtô Klei Mrâo Mrang Jăk. Boh nik nak, klei anei amâo djŏ ôh knŏng jing bruă klam kơ phung hiu hưn klei đăo, phung khua pô mtô amâodah êpul hiu hưn mtô, ƀiădah wăt jing bruă klam kơ grăp čô phung đăo msĕ mơh.
Čiăng kơ arăng dưi hmư̆ leh anăn đăo kơ Khua Yang, snăn brei mâo mnuih hiu mtô, brei mâo mnuih tiŏ nao. Si ngă drei dôk kăp wĭt lač kơ klei Khua Yang iêu mthưr leh anăn lač: “Tinei kâo, tiŏ nao kâo bĕ” msĕ si khua pô hưn êlâo Y‑Êsai wĭt lač leh hŏng Aê Diê hlăm Y‑Êsai 6:8 mơ̆? Khua ƀĭng kna Y‑Pôl lŏ mñă klei blŭ khua pô hưn êlâo Y‑Êsai 52:7 čiăng bi mđĭ ai grăp čô drei: “Siam jăk yơh jơ̆ng phung nao hưn klei mrâo mrang jăk!” (êlan 15). Akâo kơ Khua Yang brei drei thâo ƀuh bruă klam pô čiăng hŏng jih ai tiê knang kơ klei ktang myang Yang Mngăt Jăk hưn mtô kơ Khua Yang Yêsu kơ lu mnuih dưi hmư̆ leh anăn dưi mâo klei bi mtlaih.
Si ngă drei kăp čiăng kbiă nao hưn mtô klei khăp klei bi mtlaih Khua Yang kơ arăng mơ̆?
Wah lač: Ơ Khua Yang, akâo Ih đru kâo thâo săng nanao klei mtă prŏng Khua Yang jao, leh anăn kâo pô yơh srăng hiu mtô Anăn Ih kơ phung mnuih ka mâo klei bi mtlaih hŏng klei hdĭp kâo dôk dơ̆ng ƀơ̆ng huă grăp hruê.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Dlăng Klei Aê Diê Blŭ hlăm tlâo thŭn: II Bruă Mtao 6
Kênh Youtube BHKTHN:
