Leejtwg yuav mus qhia? – 7/12/2021

1133

 

Loos 10:13-17

  • Vajtswv txojlus hais tias, “Txhua tus uas thov tus Tswv pab yuav dim.”
  • Tiamsis yog lawv tsis tau ntseeg, lawv yuav ua li cas thov nws? Thiab lawv yuav ua li cas ntseeg tus uas lawv tsis tau hnov dua? Yog tsis muaj neeg mus qhia txojmoo zoo rau lawv, lawv yuav ua li cas hnov? 15 Yog tsis muaj leejtwg txib lawv mus, lawv yuav ua li cas mus qhia txojmoo zoo? Vajtswv txojlus hais tias, “Cov neeg uas mus qhia txojmoo zoo txhais kotaw zoo kawg li!” 16 Tiamsis tsis yog txhua tus yuav ntseeg txojmoo zoo ntawd; rau qhov Yaxayas hais tias, “Tus Tswv, leejtwg thiaj yuav ntseeg tej uas peb qhia?” 17 Yog li ntawd, twb yog lawv hnov txojmoo zoo, lawv thiaj ntseeg, thiab txojmoo zoo uas lawv hnov ntawd yog Yexus Khetos tej lus.

 

Nqi cim: 

“Vajtswv Txojlus hais tias, ‘Txhua tus uas thov tus Tswv pab yuav dim.’  Tiamsis yog lawv tsis tau ntseeg, lawv yuav ua li cas thov nws? Thiab lawv yuav ua li cas ntseeg tus uas lawv tsis tau hnov dua? Yog tsis muaj neeg mus qhia txojmoo zoo rau lawv, lawv yuav ua li cas hnov?” (Loos 10:13-14).

 

Lus nug rau sawvdaws xav:

  • Timthawj Paulus hais tawm ntau lo lus nug sib raws ntsaws li cas?
  • Lub ntsiab yog nws xav hais txog dabtsi?
  • Kev ntseeg muaj los ntawm qhov twg los?
  • Leejtwg muaj feem tshajtawm Vajtswv Txojlus?
  • Peb tabtom ua tes haujlwm uas tus Tswv txib licas?

Tomqab uas Timthawj Paulus siv Yau-ees tej lus hais tseg nyob hauv Yau-ees 2:32 uas hais tias: “Tiamsis txhua tus uas thov tus TSWV pab yuav dim.” Nws hais txuas ntxiv tej uas nws xav los ntawm ntau lo lus nug sib raws ntsaws hais hnav txog lub nra hnyav lossis tes haujlwm rau tus neeg tshajtawm Txojmoo Zoo. Nws nug hais tias lawv yuav ua li cas thov tus uas lawv tsis tau ntseeg? Lawv yuav ua li cas ntseeg tus uas lawv tsis tau hnov dua? Lawv yuav ua li cas hnov taus yog tsis muaj neeg mus qhia Txojmoo Zoo rau lawv? (nqi 14). Txawm yog hais tias tsis yog txhua tus hnov Txojmoo Zoo puav leej ntseeg, zoo ib yam li cov Yudais uas pheej ua siab tawv tsis ntseeg Vajtswv tej lus dhau ntawm cov cev Vajtswv lus (Yaxayas 53:1). Ntau zaus Vajtswv siv cov cev lus, cev ntawm Nws nyob hauv tiam Vajluskub Qub thiab siv cov tub qhia Txojmoo Zoo nyob hauv tiam Vajluskub Tshiab los qhia rau cov Yudais thiab tibneeg sawvdaws paub hais tias Tswv Yexus yog Tus Mexiyas. Txawm tias cov Yudais twb hnov tej lus qhia no los txog niaj hnub nimno, tiamsis coob tug tibneeg Yudais tseem pheej tsis ntseeg. Lawv tseem niaj hnub tos ntsoov tus Mexiyas uas Vajtswv cog lus yuav pub los cawm lawv dim. Txawm li ntawd los, Timthawj Paulus qhuab ntuas Vajtswv cov menyuam hauv nroog Loos yeej meem tas siab tas ntsws ua tiav tes haujlwm tshajtawm Txojmoo Zoo rau cov uas yuav raug kev puastsuaj vim “yog lawv hnov Txojmoo zoo, lawv thiaj ntseeg”, thiab yuav kom lawv hnov ces yuavtsum muaj neeg mus qhia rau lawv (nqi 17).

Yog li ntawd, niaj hnub nimno leejtwg yuav yog tus uas muaj feem tshajtawm txog Cawmseej Yexus rau lwm tus? Ntawm no yog tes haujlwm uas Tswv Yexus xub muab cob rau cov thwjtim ua ntej uas Nws rov mus saum ntuj thiab kuj yog muab cob rau txhua tus uas yog Vajtswv cov menyuam (Mathais 28:18-19; Malakaus 16:15). Yuav kom txhua tus hnov Txojmoo Zoo thiab txais yuav Tswv Yexus, ces yuavtsum muaj neeg mus qhia rau lawv paub. Vajtswv xav kom txhua tus uas yog nws cov menyuam yuavtsum ua lubneej qhia tshwm Vajtswv lub npe rau lwm tus dhau los ntawm kev noj nyob txhua hnub, tsis yog tos txog thaum twg npaj muaj rooj tshajtawm Txojmoo Zoo mam qhia. Qhov tseemceeb tes haujlwm no tsis yog cov tub xa Txojmoo Zoo, lossis Xibfwb lossis tej pab xa Txojmoo Zoo tes haujlwm xwb, tiamsis kuj yog txhua tus uas ntseeg lawm tes haujlwm thiab.

Yuav kom lwm tus hnov thiab ntseeg Tswv Yexus, ces yuavtsum muaj neeg tau txib mus qhia Txojmoo Zoo. Peb puas txaus siab teb Vajtswv lo lus nqua hu ib yam li Yaxayas tau teb Vajtswv hauv Yaxayas 6:8 hais tias: “Kuv nyob ntawm no! Thov txib kuv mus!”? Timthawj Paulus siv Yaxayas tej lus uas hais hauv Yaxayas 52:7 coj los txhawb peb lub zog hais tias: “Cov neeg uas mus qhia txojmoo zoo txhais kotaw zoo kawg li!” (nqe 15). Thov Vajtswv pab kom peb pom txog peb lub nra thiab peb tes haujlwm kom xwv peb paub vamkhom Vaj Ntsujplig lub fwjchim mus qhia txog Tswv Yexus zaj rau coob leej tau hnov thiab tau txais kev cawmdim.

Peb puas txaus siab tawm mus qhia txog Tswv Yexus txojkev hlub thiab kev cawmdim pub rau lwm tus?

 

Thov Vajtswv:

Vajtswv, thov pab nyuamyaus niaj hnub zeem paub lub luag haujlwm uas Tswv Yexus muab cob rau nyuamyaus thiab nyuamyaus tus kheej yuav yog tus uas qhia Koj lub npe rau cov uas tsis tau txais kev cawmdim nyob hauv nyuamyaus kev ua neej txhua hnub. Ameeg.

Kênh Youtube BHKTHN:

https://www.youtube.com/c/bhkthn

Bài trướcThơ: Bình An Dưới Đất
Bài tiếp theoHlei Pô Srăng Nao Hưn Mtô? – 7/12/2021