Klei Aê Diê Blŭ: Klei Mtô Mñă Klei Bhiăn 22:1-4
Êlan kliăng: “Tơdah ih ƀuh êmô amâodah biăp ayŏng adei diih wơr dliê, đăm diih ngă klei amâo uêñ ôh; brei diih lŏ đoh ba wĭt gơ̆ kơ ayŏng adei diih” (Klei Mtô Mñă Klei Bhiăn 22:1)
Klei êmuh ksiêm mĭn: Kơ ya klei bhiăn trăn anei bi êdah? Klei bhiăn anei mtô si ngă phung Israel srăng dôk dơ̆ng ƀơ̆ng huă hŏng phung riêng gah? Klei bhiăn anei brei thâo si Aê Diê jing? Si ngă diih mă yua klei hriăm anei kơ diih pô?
Hŏng Aê Diê Pô doh jăk leh anăn kpă ênô, djă pioh mnơ̆ng duñ wăt tơdah thâo amâodah amâo thâo ôh hlei jing pô kơ mnơ̆ng anăn yap msĕ si tlĕ sơăi. Kyuanăn hlăm trăn Klei Aê Diê Blŭ anei, Y-Môis mtô kơ phung ƀuôn sang Aê Diê êlan msir mkra tơdah ƀuh hlô mnơ̆ng rông amâodah amâo răk sa mta mnơ̆ng ôh jing dŏ pô mkăn. Tơdah sa čô mnuih ƀuh sa drei hlô mnơ̆ng rông wơr dliê, brei mnuih anăn đoh ba wĭt hlô mnơ̆ng anăn kơ pô gơ̆. Bi tơdah amâo thâo kral ôh pô gơ̆, amâodah pô gơ̆ kbưi đei, pô ƀuh mnơ̆ng rông anăn srăng čiêm rông gơ̆ tơl pô gơ̆ êmuh duah, amâo dưi ngă klei amâo uêñ ôh. Amâo djŏ knŏng dŭm anăn ôh, tơdah phung ƀuôn sang Aê Diê ƀuh sa drei hlô mnơ̆ng rông lĕ buh ti êlan ăt brei đru rŭ gơ̆ mơh, amâo dưi hngah ôh.
Ksiêm klă nik, jih klei bhiăn anei tăp năng bi êmăn kơ pô ƀuh hlô mnơ̆ng wơr dliê amâodah mnơ̆ng arăng bi lĕ, kyuadah digơ̆ srăng mdei hĕ bruă digơ̆ dôk ngă čiăng đru phung ayŏng adei dôk rŭng răng tui duah hlô mnơ̆ng digơ̆ rông amâodah mnơ̆ng digơ̆ bi lĕ. Ƀiădah tĭng kơ klei hdĭp myang, anei jing êlan Aê Diê bi hriăm phung ƀuôn sang Ñu khăp kơ phung riêng gah hŏng bruă ngă. Ti djiêô anăn, jih jang klei bhiăn anei ăt čiăng bi hriăm phung Israel thâo bi đru, dôk dơ̆ng hŏng klei jăk leh anăn thâo đru gui klam hdơ̆ng phung ƀuôn sang mâo klei bi mguôp hŏng Aê Diê. Aê Diê jing Pô bŏ hŏng klei jăk, kyuanăn jih jang klei bhiăn Ñu brei kơ phung ƀuôn sang Ñu ăt bŏ hŏng klei jăk mơh.
Hlăm klei hdĭp mrâo ênuk anei, anak mnuih amâo uêñ ôh hdơ̆ng găp, amâo čiăng bi đru ôh tơdah mâo mông găl. Lu mnuih knŏng thâo mă kơ klei hdĭp ñu pô ƀiădah amâo mđing mĭn ôh kơ phung riêng gah. Klei hdĭp mñik mñak tơl jih jang mnuih ngă ngai ti anăp klei dleh dlan phung riêng gah. Phŭn knhal kơ klei ngă ngai anăn hmư̆ msĕ si djŏ, ƀiădah hŏng Aê Diê, klei ngă anăn jing knŏng klei mgang mă kơ klei hdĭp kƀah klei khăp. Knhuah hdĭp čuôt klih leh anăn kƀah klei thâo đru gui klam hŏng jih jang mnuih mjing klei truh hlăm ƀuôn sang ƀrư̆ hruê ƀrư̆ jhat kjham hĭn êjai. Kyuanăn čiăng snăk mâo phung đăo mâo klei hur har, mâo ai tiê jăk, jih ai tiê đru pô mkăn čiăng jing hra kơ lăn leh anăn klei mngač kơ lăn ala mmăt tĭt anei. Găn hŏng knhuah phung đăo dôk dơ̆ng ƀơ̆ng huă hŏng klei thâo khăp lu mnuih srăng thâo kral Khua Yang. Ngă bĕ tui si klei Khua Yang Yêsu mtă leh snei: “Snăn ya klei diih čiăng phung mnuih ngă kơ diih, brei diih ngă msĕ snăn mơh kơ digơ̆; kyuadah klei anăn jing djŏ tui si klei bhiăn leh anăn klei phung khua pô hưn êlâo čih leh” (Y-Mathiơ 7:12).
Drei srăng đru mnuih mkăn mơ̆ tơdah mâo mông găl?
Wah lač: Ơ Khua Yang, Pô đru kâo bŏ hŏng klei jăk leh anăn klei thâo pap. Đru kâo mâo ai tiê jăk hur har đru phung riêng gah kâo hlăk digơ̆ čiăng. Mđing mĭn, bi đru, bŏ hŏng klei khăp
Dlăng Klei Aê Diê Blŭ hlăm tlâo thŭn: Y-Mathiơ 17:14-18:20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
