II Kevcai 22:1-4
Nqe cim:
“Yog nej pom nej ib tug kwvtij Yixalayees twg tus nyuj lossis tus yaj yuam kev tuaj rau ntawm nej, nej tsis txhob ua tus tsis pom; nej cia li coj tus tsiaj ntawd mus rau tus tswv” (II Kevcai 22:1).
Lus nug rau sawvdaws xav:
– Ntu Vajluskub no hais txog txojcai twg?
– Txojcai no qhia kom cov Yixalayees yuav tsum ua lub neej licas rau cov neeg nyob ibncig?
– Qhov no qhia pom hais tias Vajtswv yog Tus zoo licas?
– Nej muab zaj kawm no los siv licas hauv lubneej?
Raws li Vajtswv tus uas ncajncees thiab dawbhuv, qhov uas khaws zais tej khoom txawm yus paub meej thiab tsis paub meej tias yog leejtwg tug, los puavleej suav li yog ua tub sab lawm. Yog li ntawd nyob hauv ntu Vajluskub no, Mauxes thiaj qhia tus Tswv haivneeg paub yuav ua licas thaum pom lwm tus ib tug tsiaj lossis ib yam khoom dabtsi twg. Yog leejtwg pom nws tus kwvtij ib tug tsiaj yuam kev tuaj, ces nws yuav tsum coj tus tsiaj ntawd rov mus rau nws tus kwvtij. Thaum tsis paub tus tsiaj ntawd tus tswv yog leejtwg, lossis vim nyob deb dhau lawm, tus uas pom tus tsiaj yuav tsum tu tus tsiaj ntawd mus txog thaum tus tswv tuaj nrhiav txog, tsis pub ua txuj tsis pom. Tsis tas li ntawd xwb, thaum tus Tswv haivneeg pom ib tug tsiaj twg ntog tom kev yuav tsum pab tsa tus tsiaj ntawd, txhob tsis quav ntsej lossis ua txuj tsis pom.
Saib mus rau kev ua neej, tej no qee zaus yuav ua tab kaum rau tus neeg uas pom tus tsiaj tuaj yuamkev lossis yam khoom uas poob lawm, vim lawv yuav tsum tso lawv tes haujlwm tseg los pab yus tus kwvtij uas tabtom nrhiav tus tsiaj lossis yam khoom uas ploj lawm ntawd. Tiamsis saib mus rau sab kev ntseeg, ces ntawd yog txojcai tus Tswv qhia rau Nws haivneeg ua neej qhia tshwm kev hlub cov kwvtij ibncig los ntawm tes haujlwm. Nrog rau qhov ntawd, txojcai no kuj qhia cov Yixalayees paub hais tias lawv yuav tsum sib pab, ua neeg zoo thiab muaj feemxyuam rau lwm tus ibncig. Vajtswv yog Tus puv npo txojkev hlub, yog li ntawd tej kevcai uas Nws pub rau Nws haivneeg kuj puv npo kev hlub.
Nyob rau lub neej vammeej tiam no, tibneeg tsis tshua xav txog lwm tus, tsis txaus siab pab lwm tus thaum muaj sijhawm. Muaj coob leej tsuas paub txog tus kheej lub neej xwb, tsis quav ntsej txog lwm tus ibncig. Lub neej qaug rau kev ua haujlwm ua rau sawvdaws tsis quavntsej txog lwm tus ibncig tej kev cheemtsum. Tej uas lawv siv los hais daws lawv zaj zoo li kuj yog thiab, tiamsis raws li Vajtswv, ntawd tsuas yog tej lus cuav npog lawv lub neej tsis muaj kev hlub xwb. Kev qia dub thiab tsis pab lwm tus ua rau tibneeg lub neej yim hnub yim phem. Yog li ntawd cheemtsum muaj cov ntseeg Yexus uas muaj lub siab kub lug, lub siab zoo, txaus siab hlo pab lwm tus, kom ua tau ntsev las thiab ua tau teeb ci rau lub ntiajteb uas tsaus ntuj nti. Los ntawm cov ntseeg lub neej sib hlub, coob tug yuav paub txog tus Tswv. Yuav tsum ua lub neej raws li Tswv Yexus qhia, hais tias: “Yog nej xav kom lwm tus ua li cas rau nej, nej yuav tsum ua ib yam li ntawd rau lwm tus. Ua li no thiaj raws li Mauxes txoj Kevcai thiab raws li cov cev Vajtswv lus tau qhia tseg lawm” (Mathais 7:12).
Thov Vajtswv,
Tus Tswv, Koj yog tus ua txhua yam zoo pub rau nyuam yaus. Thov pab nyuam yaus cev tes mus hlub cov neeg ibncig thaum lawv muaj kev cheemtsum. Amees.
Peb puas txaus siab hlo pab lwm tus thaum muaj sijhawm?
Nyeem Vajluskub hauv peb lub xyoos: Mathais 17:14-18:20
Kênh Youtube BHKTHN:
