II Kevcai 19:15-21
Nqe cim:
“Tus uas ua timkhawv tsis tseeb hauv tsev tu plaub, nws yuav raug txim thiab khiav tsis dim li” (Pajlug 19:5)
Lus nug rau sawvdaws xav:
- Vim licas ib tug ua timkhawv xwb tsis tau txiav txim rau tus ua txhaum?
- Tus ua timkhawv tsis tseeb yuav tau sau dabtsi?
- Dhau qhov no, Vajtswv xav kom nws cov menyuam ua neej nrog sawvdaws licas?
Nyob hauv Vajluskub, Vajtswv yeej qhia kom nws tej menyuam yuav tsum hais lus tseeb rau sawvdaws. Nyob hauv nqe kevcai tim cuaj hauv Kaum Nqe Kevcai, Vajtswv hais rau Nws haivneeg hais tias: “Tsis txhob ua timkhawv tsis tseeb ntxo kwvtij zejzog” (Khiavdim 20:16). Ntu Vajluskub hnub no kuj yog hais txog txwv tsis pub ua timkhawv tsis tseeb yuam lwm tus hauv tsev tu plaub ntawm haivneeg Yixalayees.
Txhua lub rooj tu plaub, tus los ua timkhawv tej lus yog qhov uas tseemceeb. Rau qhov tus txiav txim saib tus ua timkhawv cov lus los txiav txim rau tus uas raug txim kom phim li nws qhov txhaum. Qee leej paub txog qhov tseemceeb li ntawd, thaum ua timkhawv hauv tsev tu plaub, vim lub siab tsuas xav txog tus kheej lawv thiaj hais lus timkhawv tsis tseeb ntxo lwm tus. Yog li ntawd, Vajtswv txojcai thiaj tsis pub ib leeg ua timkhawv hauv tsev tu plaub rau tus txiav txim kom rau txim rau tus ua txhaum. Tsawg kawg yuav tsum muaj txog ob lossis peb tug los ua timkhawv txog ib tug qhov txhaum thiaj paub txiav txim rau tus ua txhaum. Txawm li ntawd los yeej tseem muaj tus raug luag muab nyiaj xiab ua timkhawv tsis tseeb ntxo lwm tus. Yog li ntawd, tej rooj plaub uas tu nyuaj, tus raug kom thiab cov ua timkhawv yuav tau mus rau ntawm qhov chaw dawbhuv kom tus Povthawj Hlob thiab cov neeg tu plaub ntug ua zoo taug zaj ntawd kom meej. Thaum cov tu plaub paub hais tias tus ua timkhawv hais lus tsis tseeb kom lwm tus xwb, ces tus ntawd yuav raug rau lub txim hnyav li rau txim rau tus ua txhaum. Txojcai no ua rau txhua tus los ua timkhawv hauv tsev tu plaub yuav tau ua zoo xav ua ntej yog xav liam txim rau lwm tus.
Thaum peb hais lus tsis tseeb lossis tsis muaj timkhawv tseeb, ua rau lwm tus ntsib teebmeem nyuaj siab ces puavleej suav tau hais tias yog neeg ua timkhawv tsis tseeb. Txawm li ntawd los tseem muaj ntau leej tsis quav ntsej txog kev hais lus tsis tseeb thiab ua timkhawv tsis tseeb. Peb kheev siv tej xov tooj los hais lus tsis tseeb, los thuam tus uas peb tsis nyiam saum fuab cua kom rhuav luag meejthawj. Thaum peb ua li ntawd tsis yog ua rau lwm tus nyuaj siab xwb, tseem ua rau qee leej poob kev ntseeg thiab sawvdaws tsis muaj kev sib raug zoo. Yog li ntawd, thov Vajtswv pab kom peb nyias paub txog nyias tej lus hais, tsuas hais tej lus tseeb xwb. Yam twg paub tsis tau meej, lossis tsis tau paub ces tsis txhob muab hais tawm, thiaj tsis ua rau lwm tus xav yuam kev, tshwjxeeb yog thiaj tsis ua rau cov ntseeg ntxhov.
Thov Vajtswv,
Tus Tswv, Koj yog tus Tswv tseeb. Thov pab kom nyuam yaus paub hais lus tseeb thiab ua neeg tseeb nrog cov kwvtij ntseeg txhua tus kom phim yog tus Tswv tseeb li menyuam. Amees.
Peb puas muaj tej zaug hais lus tsis tseeb ua rau lwm tus tu siab lawm tau?
Nyeem Vajluskub hauv peb lub xyoo: Exekees 32:7-28
Kênh Youtube BHKTHN:
