Klei Aê Diê Blŭ: Klei Mtô Mñă Klei Bhiăn 19:15-21
Êlan kliăng: “Pô hưn soh hlăm sang phat kđi amâo srăng tlaih ôh kơ klei bi kmhal, leh anăn hlei pô blŭ luar kăn srăng tlaih ôh.” (Klei Bi Hriêng 19:5)
Klei êmuh ksiêm mĭn: Si ngă klei hưn bi sĭt mơ̆ng knŏng sa čô pô hưn amâo srăng dưi kčŭt kơ pô ba kđi? Ya jing boh tŭ kơ pô hưn luar? Mơ̆ng klei anăn, si klei Aê Diê čiăng kơ phung anak ƀuôn sang Ñu dôk hdĭp hdơ̆ng pô?
Ktuê jih Hdruôm hră Klei Aê Diê Blŭ, Aê Diê mñă nanao kơ phung anak ƀuôn sang Ñu brei blŭ klei kpă sĭt leh anăn dôk hdĭp kpă ênô hdơ̆ng pô. Klei bhiăn tal duapăn hlăm Pluh Mta Klei Bhiăn Aê Diê brei kơ phung ƀuôn sang Ñu čih snei “Đăm mčeh luar kơ pô riêng gah ih ôh” (Klei Kbiă 20:16). Leh anăn trăn Klei Aê Diê Blŭ hruê anei ăt kna ti atur klei kăm ghă hưn klei luar anăn, lŏ mblang čêč drêč hĭn kơ klei bhiăn pô hưn bi sĭt hlăm klei phat kđi hlăm ƀuôn sang phung Israel.
Ya mta klei bi kčŭt kđi mâo, klei blŭ pô hưn bi sĭt jing yuôm êdimi. Khua phat kđi khăng kna ti klei hưn bi sĭt srăng ksiêm dlăng, čiăng kơ klei phat kđi dưi djŏ klă hĭn. Lu mnuih kyua thâo săng kơ hnơ̆ng yuôm klei hưn bi sĭt, snăn diñu bi mjhua čiăng mâo klei tŭ dưn kơ diñu pô, leh anăn bi jhat luč liê kơ phung ayŏng adei mkăn. Kyuanăn klei bhiăn Aê Diê čoh čuăn, klei hưn bi sĭt mơ̆ng knŏng sa čô pô hưn amâo mâo klei dưi ôh pioh phat kđi kơ pô ba kđi. Hrô kơ klei anăn brei mâo ƀiă êdi dua amâodah tlâo čô pô hưn bi sĭt, hlăk anăn kơh dưi ksiêm dlăng. Ƀiădah, ăt adôk mâo mơh đa đa kđi, phung hưn bi sa ai hdơ̆ng diñu pô amâodah diñu blei pô hưn kăp kčŭt hưn luar kơ pô diñu čiăng ngă jhat. Kyuanăn, tơdah tuôm hŏng kđi dleh, tĭng kơ pô ba kđi leh anăn tĭng kơ pô hưn bi sĭt brei nao ti sang phat kđi phŭn, anôk doh jăk, čiăng kơ phung khua ngă yang leh anăn khua phat kđi ksiêm bi nik. Tơdah sang phat kđi ksiêm ƀuh pô hưn jing pô hưn luar čiăng ngă jhat kơ pô ba kđi snăn pô hưn luar anăn srăng tŭ kđi msĕ si kơ pô ba kđi tơdah ngă soh. Klei bhiăn anei srăng ngă kơ pô čiăng hưn luar mĭn bi klă êlâo kơ čiăng mčeh luar kơ mnuih amâo soh ôh.
Tơdah drei hưn sa klei amâo sĭt kpă amâodah amâo mâo phŭn knhal ôh kơ hlei pô drei čiăng bi jhat gơ̆, drei jing pô hưn luar yơh. Ƀiădah hlăm boh sĭt ară anei, lu mnuih dlăng hơăi mang kơ klei blŭ luar, hưn klei luar. Drei khăng mŭt hlăm internet bi blŭ jhat hdơ̆ng găp amâodah bi êmhač klei blŭ amâo sĭt čiăng bi lĕ hlei pô drei amâo khăp čiăng. Klei ngă anei bi jhat êka ai tiê pô tŭ klei ngă jhat, wăt bi luč klei thâo knang hdơ̆ng găp, atăt truh kơ klei bi rai klei bi mguôp hlăm êpul êya. Kyuanăn, akâo Khua Yang brei drei thâo ƀuh bruă klam hlăm klei blŭ, blŭ klei sĭt kpă nanao. Ya mta klei drei amâo thâo klă amâodah ka thâo klă đăm blŭ ôh čiăng đăm bi mčhuai hdơ̆ng găp, boh nik nak hlăm phung đăo Sang Aê Diê.
Si ngă drei tuôm bi ruă êka ai tiê pô mkăn kyua klei blŭ soh wê drei mơ̆?
Ơ Khua Yang, Ih jing Pô Kpă Ênô. Akâo Ih đru kâo blŭ knŏng ya klei jing kpă sĭt leh anăn dôk hdĭp kpă ênô hŏng ayŏng amai adei čiăng kơ kâo năng hŏng klei jing anak Pô Kpă Ênô.
Dlăng Klei Aê Diê Blŭ hlăm tlâo thŭn: Y-Êsêkiêl 32:7-28
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
