Feem Xyuam Rau Lwm Tus – 14/3/2023

599

 

 

II Kevcai 21:1-9

Nqe cim:

Tus Tswv, thov koj zam txim rau koj haivneeg Yixalayees uas koj tau cawm lawv dim nram tebchaws Iziv los; thiab thov tsis txhob pub tus neeg uas tsis muaj txim no cov ntshav los raug koj haivneeg Yixalayees.” (II Kevcai 21:8).

Lus nug rau sawvdaws xav:

  • Thaum ib tug neeg raug tua tuag thiab tsis paub tus tua, leejtwg yog cov uas muaj feem xyuam thiab cheemtsum ua dabtsi?
  • Lub homphiaj thiab ntsiab lus ntawm cov kevcai ntawd yog li cas?
  • Yam twg yog Pawg Ntseeg feem xyuam nyob hauv lub ntiajteb no?

Thaum pom ib tug neeg raug tua tuag thiab tsis paub tus tua, tsis yog tso dhau mus, tiamsis cov Yixalayees txoj kevcai hais kom yuav tsum ua qee yam haujlwm. Cov txwjlaug thiab cov nomtswv yuav tsum nqis tes ua haujlwm ua ntej, lawv muab rau lub nroog uas nyob ze ntawd pab. Tom qab ntawd, cov txwjlaug uas nyob ze lub nroog ntawd nrog cov povthawj sawv nres, ntes ib tug nyuj coj mus lov caj dab ntawm tus dej tsis nqhuab, ntxuav tes rau saum tus nyuj thiab hais tias peb tsis tau tua tus neeg no, thov tus Tswv zam txim rau cov pejxeem.

Qhov kev tua neeg uas nrhiav tsis tau tus neeg tua yuav ua rau cov pejxeem ntxhov siab, txajmuag, ua xyem xyav, txhawj ntshai. Tus Tswv tsis txaus siab thaum muaj ib tug tuag tsis muaj timkhawv nyob hauv lub tebchaws (Teev Npe 35:33) rau qhov tagnrho lub tebchaws yuav tsum raug tus Tswv txojkev chim. Tagnrho txhua tus, cov thawjcoj, cov nomtswv thiab cov pejxeem puavleej muaj feem xyuam rau tus neeg tuag ntawd. Ua tej kab ke kevcai kom cov pejxeem pom lawv qhov feem xyuam rau tus neeg raug tua tuag nyob ze lawv. Cov thawjcoj thiab cov pejxeem sib pab kom ua rau sawvdaws kaj siab, tawm lus rau sawvdaws paub hais tias tagnrho cov pejxeem tsis ua txhaum tua neeg. Tsis tas li xwb, lawv kuj muab qhov uas tsis paub ntawd fij rau tus Tswv los ntawm lub siab ntseeg. Kevcai thiab feem xyuam ua rau tus Tswv tsis chim thiab cov pejxeem kuj kaj siab, tsis ua xyem xyav, ntxhov siab, txoj kevcai tswj lub tebchaws nyob thajyeeb. Tus Tswv haivneeg yuav tsum yog ib npoj neeg ua neej ncaj ncees, tiv thaiv tej yam tsis zoo rhuav lub tebchaws thiab ua kho kom zoo. Qhov tseemceeb ntawm kev kho kom zoo yog tus Tswv uas ncaj ncees.

Tus Tswv haivneeg tabtom ua neej nyob rau tiam muaj kev kub ntxhov, tsis ncaj ncees thiab ua phem kawg nkaus. Ua rau peb yoojyim thaub rov lossis tsis quav ntsej txog tej teebmeem hauv lub tebchaws. Tus Tswv txojkev ncaj ncees qhia kom peb muaj feem xyuam rau lub tebchaws. Tsis txhob saib peb cuag li tsis muaj feem xyuam, tiamsis cheemtsum qhia tawm tus Tswv txojkev ncaj ncees los ntawm peb kev ua neej, kev hlub thiab kev ua haujlwm coj cai ncaj ncees. Vajtswv Pawg Ntseeg yuav tau siv zog ua rau lub tebchaws muaj txojkev ncaj ncees dhau los ntawm yus txojkev ua ncaj ncees, cia siab rau tus Tswv uas pub txojkev zoo siab rau txhua tus neeg.

Thov Vajtswv,

Tus Tswv ncaj ncees uas nyuam yaus pehawm thiab hlub, thov Koj pab kom nyuam yaus ua lub neej ncaj ncees rau qhov chaw koj cia nyuam yaus nyob, kom qhia tawm Koj txojkev ncaj ncees rau lwm tus. Amees.

Peb ua li cas kom qhia tawm yus feem xyuam rau lub tebchaws uas yus tabtom nyob?

 Nyeem Vajluskub hauv peb lub xyoo: Hauxeyas 6:1-7:16

Kênh Youtube BHKTHN:

https://www.youtube.com/c/bhkthn

Bài trướcHội Thảo Dành Cho Diễn Giả Trại Hè Thiếu Niên
Bài tiếp theoBruă Klam Hŏng Phung Ƀuôn Sang – 14/3/2023