Klei Aê Diê Blŭ: Klei Mmuñ Hđăp 1:1-6
Êlan kliăng: “Kyuadah Yêhôwa răng kriê êlan phung kpă; ƀiădah êlan phung ƀai srăng rai tuč” (Klei Mmuñ Hđăp 1:6)
Klei êmuh ksiêm mĭn: Arăng brei thâo si “phung ƀai” jing? “Êlan phung soh” ya jing? Phung ƀai bi msĕ hŏng adrăng ya čiăng lač? Si drei srăng hdĭp tơdah brei Khua Yang jing Khua kơ klei hdĭp drei?
Klei Mmuñ Hđăp 1:1-2 brei thâo “phung ƀai” jing phung jhat, phung soh leh anăn phung mưč. Phung anei bi kdơ̆ng hŏng Aê Diê hlăm klei mĭn, klei blŭ leh anăn bruă ngă. Phung ƀai čiăng lač wăt kơ jih jang phung amâo djă pioh klei Aê Diê bi mguôp mơh.
“Êlan phung ƀai” amâodah “êlan phung soh” jing êlan phung amâo đăo kơ Aê Diê ôh. Diñu mưč kơ klei bhiăn Aê Diê, mgao, ngă tui si klei kđeh tluh, leh anăn tŭ klei bi hmăi mơ̆ng klei mĭn lăn ala. Diñu mčhur ai ngêñ Aê Diê hŏng klei blŭ mưč, djă pioh klei bhiăn kkuh mpŭ soh phung tue (II Klei Yăl Dliê 33:1-9). Diñu ruah klei dôk dơ̆ng ƀơ̆ng huă hŏng klei čuôt klih, mluk, gao klei bhiăn. “Klei knhal tuč diñu srăng jing klei rai luč. Tian diñu pô jing yang kơ diñu. Diñu mgao hlăm klei bi hêñ diñu, êjai mĭn kơ mnơ̆ng ti lăn ala” (Philip 3:19). Phung ƀai bi msĕ jing msĕ si adrăng amâodah asăr mdiê bô amâo mâo klei tŭ ôh, angĭn kpuh mđung hĕ. Ti knhal tuč, diñu amâo srăng dôk kjăp ôh ti hruê phat kđi, kăn dưi dôk rei hlăm klei bi kƀĭn phung kpă (êlan 5).
Phung bi kdơ̆ng hŏng Aê Diê amâo djŏ knŏng hjăn phung knĕ, phung bi mdjiê mnuih, amâodah phung luar ôh, ƀiădah wăt phung hdĭp hŏng klei ênuah ƀiădah amâo đăo ôh kơ Aê Diê jing Pô Hrih Mjing, Pô brei klei bhiăn leh anăn srăng phat kđi lăn ala. Diñu amâo kmhal kơ klei soh msĕ si klei Khua Yang mtă ôh ƀiădah diñu mdăp klei soh, blŭ mgang kơ klei soh, amâodah ngă bruă jăk čiăng dưi mâo klei yap kpă.
Khua pô hưn êlâo Y-Êsai lač leh snei, “Jih jang hmei jing leh msĕ si pô amâo doh, leh anăn jih bruă kpă ênô hmei jing msĕ si čhiăm ao čhŏ leh…” (Y-Êsai 64:6). Amâo mâo pô mâo klei yap kpă jưh kna ti djuê ana ñu, klei mta klei đăo ñu amâodah bruă jăk ñu ngă ôh, knŏng klei khăp leh anăn klei kpă ênô Aê Diê yơh dưi yap kpă hlei pô đăo kơ Yêsu Krist, Pô klam hrô leh klei soh lăn ala. “Yêsu lač kơ gơ̆, “Kâo jing êlan, klei sĭt nik, leh anăn klei hdĭp; amâo mâo pô dưi nao kơ Ama, knŏng hŏng Kâo” (Y-Yôhan 14:6). Bruă pioh brei pô kơ klei đăo, klei ngă bruă jăk čiăng mâo klei bi mtlaih tơdah hmư̆ jing msĕ si djŏ, Klei Aê Diê Blŭ lač, klei anăn hơăi amâo mâo klei yuôm kơ klei bi mtlaih mngăt ôh. “Mâo sa bĭt êlan mnuih yap jing kpă, ƀiădah knhal tuč êlan anăn jing hĕ klei djiê” (Klei Bi Hriêng 16:25).
Brei grăp čô drei ksiêm dlăng wĭt kơ drei pô, tơdah brei Yêsu Krist jing Khua kơ klei hdĭp drei, brei drei lui hĕ jih klei mĭn, klei blŭ amâodah bruă ngă dôk bi kdơ̆ng hŏng Aê Diê, lui hĕ jih jang klei mĭn mgao dôk hlăm ai mĭn drei, đăm brei mâo sa boh blŭ mưč kbiă mơ̆ng ƀăng êgei drei ôh, brei drei êbat hlăm êlan kpă ênô leh anăn weh đuĕ mơ̆ng êlan phung ƀai.
Klei hriăm anei đru drei bi mlih ya mta klei hlăm klei hdĭp?
Wah lač: Ơ Khua Yang, kâo jing knŏng sa čô mnuih soh Ih pap, bi tui leh anăn brei klei dưi jing anak Ih. Akâo Ama đru kâo khăp kơ klei hriăm Klei Ih Blŭ, khăp hmư̆ asăp Ih, ksiêm dlăng nanao kơ klei hdĭp kâo pô, kmhal kơ klei soh leh anăn weh đuĕ mơ̆ng êlan soh. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yêrêmi 39
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
