Klei Aê Diê Blŭ: I Y‑Pêtrôs 3:15
Êlan kliăng: “Ƀiădah hlăm ai tiê diih brei diih mpŭ kơ Krist jing Khua Yang, kăp răng nanao čiăng mgang diih pô čiăng dưi lŏ wĭt lač kơ hlei pô êmuh čiăng thâo săng kơ klei diih čang hmăng;” (I Y‑Pêtrôs 3:15)
Klei êmuh ksiêm mĭn: Ya êlan hdră yuôm Khua ƀĭng kna Y‑Pêtrôs brei tinei?
Si knuih brei Phung đăo kơ Krist mâo tơdah arăng êmuh kơ Klei Mrâo Mrang Jăk? Mơ̆ng ya anôk drei dưi ngă klei anei?
Êlan hdră tal tlâo jing êlan hdră yuôm hĭn kơ klei hdĭp đăo kơ Krist, anăn jing “ƀiădah hlăm ai tiê diih brei diih mpŭ kơ Krist jing Khua Yang” , mblang jing, bi ktlah hě phung mnuih amâodah dŭm klei jhat mkăn bi kbưi hŏng Yang Krist leh anăn knŏng yap Ñu yơh jing Pô pioh hjăn kơ klei khăp, klei mpŭ, klei sĭt suôr, čiăng đup gưt klei Khua Yang kiă kriê atăt gai, mblang jing msĕ hŏng klei đup gưt kơ klei ktang myang Aê Diê Pô ti dlông hĭn, leh anăn huĭ mpŭ knŏng hjăn kơ Aê Diê. Blŭ mdê, “Mpŭ kơ Krist jing Khua Yang… hlăm ai tiê drei” čiăng lač đup gưt kơ Khua Yang kluôm dhuôm leh anăn hdĭp knŏng kñăm čiăng bi mơak leh anăn bi guh kơang kơ Anăn Ñu, huĭ ngă bi ênguôt kơ Khua Yang, hĭn kơ huĭ mnuih dưi ngă kơ drei (Y‑Mathiơ 10:28). Drei amâo srăng lŏ huĭ kơ klei truh amâodah kơ mnuih ôh (Klei Bi Hriêng 29:25) wăt tơdah tŭ klei arăng ngă jhat ktang amâodah klei mplư jŭm dar dưn.
Đăo knang kơ Khua Yang amâo djŏ jing mta čuăn knŏng hlăm ai tiê ôh ƀiădah wăt hlăm klei mĭn msĕ mơh, Khua ƀĭng kna Y‑Pêtrôs mtô: “kăp răng nanao čiăng mgang diih pô čiăng dưi lŏ wĭt lač kơ hlei pô êmuh čiăng thâo săng kơ klei diih čang hmăng”. Brei drei thâo klă sĭt kơ klei drei “čang hmăng” (I Y‑Pêtrôs 3:15), leh anăn bi kjăp klei thâo săng, čiăng dưi lŏ wĭt lač kơ hlei pô êmuh. Blŭ mdê, klei Aê Diê čiăng leh anăn Klei Ñu Blŭ brei jing klei ktang myang ti dlông hĭn hlăm klei hdĭp Phung đăo kơ Krist leh anăn brei drei khut khat đup gưt.
Tơdah tlă anăp hŏng klei arăng êmuh kơ klei đăo, brei drei “kăp răng nanao… čiăng dưi lŏ wĭt lač”, mblang jing brei kriăng hriăm čiăng bi mđĭ hĭn klei thâo săng Klei Aê Diê Blŭ leh anăn lu mta čuăn kơ klei đăo. Ƀiădah lĕ, brei wĭt lač hŏng knuih “êdu êun leh anăn huĭ mpŭ”, amâo djŏ ôh hŏng klei mgao, bi mđĭ pô. Brei hŏng klei “huĭ mpŭ” mblang jing, drei dôk tlă anăp hŏng klei arăng êmuh, tăng mgăl kơ klei đăo, leh anăn drei thâo Aê Diê dôk mđing hmư̆ drei. Brei hdơr nanao snei, drei jing phung hưn bi sĭt, amâo djŏ jing pô mgaih kđi bi tăng mgăl hlăm sang phat kđi ôh.
Khua pô mtô Warren W. Wiersbe čih hlăm hdruôm hră mblang hră čih mơĭt msĕ snei: “Khua ƀĭng kna Y‑Pêtrôs amâo djŏ čiăng lač kơ Phung đăo kơ Krist bi mgăl hŏng phung ka đăo kơ Khua Yang ôh, ƀiădah djŏ hĭn jing brei drei sĭt suôr, hŏng klei khăp hưn kơ digơ̆ kơ ya klei drei đăo, leh anăn ya ngă drei đăo. Klei kñăm amâo djŏ ôh čiăng kơ dưi hĭn hlăm klei mgăl, ƀiădah jak ba wĭt mngăt rai luč kơ Yang Krist”.
Đup gưt kơ Yang Krist leh anăn Klei Ñu Blŭ, êdu êun leh anăn huĭ mpŭ êjai hưn klei đăo, anăn yơh jing êlan hdră găn klei lông dlăng čiăng dưi jak ba wĭt mngăt mnuih soh kơ Khua Yang.
Ya klei drei mprăp čiăng dưi jing pô hưn bi sĭt tŭ dưn?
Wah lač: Ơ Khua Yang, jing Khua Yang kơ klei hdĭp kâo, Pô hrih mjing leh anăn bi mtlaih kâo. Kâo čiăng huĭ mpŭ leh anăn kkup mpŭ kơ Khua Yang, gưt ngă klei Ih čiăng, boh nik nak êjai kâo hưn bi sĭt kơ Khua Yang kơ jih jang mnuih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: I Y‑Samuel 8
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
