Klei Aê Diê Blŭ: Kôlôs 3:15
“Brei klei êđăp ênang Krist kiă kriê hlăm ai tiê diih. Kơ klei anăn Aê Diê iêu leh diih hlăm sa asei mlei. Leh anăn brei diih thâo hdơr knga.”
Klei êmuh ksiêm mĭn: Ya mta klei khua ƀĭng kna Y-Pôl akâo brei “kiă kriê hlăm ai tiê diih”? Si ngă klei mblang leh anăn klei yuôm kơ klei anăn? Si ngă čiăng kơ drei dưi djă pioh nanao klei êđăp ênang hlăm mngăt ai tiê?
Leh mtô kơ klei hdĭp mrâo hlăm Yang Krist (Kôlôs 3:1-14), khua ƀĭng kna Y-Pôl akâo “brei klei êđăp ênang Krist kiă kriê hlăm ai tiê” phung anak Aê Diê. Boh ngă “kiă kriê” jing ênhiang blŭ khăng yua hlăm mta klei pral ktang, mblang jing “pô krơ̆ng”. Klei khua ƀĭng kna Y-Pôl čiăng lač snei: phung anak Aê Diê brei bĕ klei êđăp ênang Aê Diê krơ̆ng leh anăn ngă pô krơ̆ng hlăm ai tiê drei. Ai tiê jing anôk klei djhưng ai leh anăn klei tluh bi blah, ngă kơ ai tiê drei mtŭk mtŭl luč klei êđăp ênang. Tinei, khua ƀĭng kna Y-Pôl mtă mtăn kơ drei brei klei êđăp ênang Aê Diê “kiă kriê”, mblang jing “pô krơ̆ng” čiăng bi klă leh anăn mghaih mkra hĕ klei bi blah hlăm ai tiê drei. Klei êđăp ênang hlăm ai tiê jing klei kñăm knăl đru brei drei thâo kral thâodah drei adôk gưt hluê tui si klei Aê Diê čiăng amâodah hơăi. Tơdah drei ngă tui hluê si klei Aê Diê čiăng snăn ai tiê drei dưi mâo klei êđăp ênang. Tơdah drei ngă mklăk mgar hŏng klei Aê Diê čiăng, drei srăng bi luč hĕ klei êđăp ênang mơ̆ng Aê Diê.
Khua Yang Yêsu lač leh: “Kâo lui klei êđăp ênang mbĭt hŏng diih; kâo brei kơ diih klei êđăp ênang kâo pô. Kâo brei kơ diih amâo djŏ msĕ si lăn ala brei ôh” (Y-Yôhan 14:27). Klei êđăp ênang mơ̆ng Aê Diê brei jing klei êđăp ênang amâo đuôm gam tui si klei truh amâodah klei djhưng ai ôh, ƀiădah jing klei êđăp ênang sĭt leh anăn khut khat tơdah drei mâo klei êđăp ênang hŏng Aê Diê leh anăn dôk hlăm klei Yang Mngăt Jăk Aê Diê kiă kriê.
Jing phung đăo, drei mâo klei êđăp ênang hŏng Aê Diê leh anăn dưi dưn klei êđăp ênang Aê Diê brei hlăm mngăt ai tiê. Mta klei anăn amâo djŏ ôh drei amâo srăng lŏ tuôm hŏng klei jhat klei rŭng răng hlăm klei hdĭp, ƀiădah drei ăt mâo klei êđăp ênang hlăm mngăt ai tiê wăt tơdah êjai dôk ti krah klei lông dlăng amâodah knap mñai. Anei jing klei êđăp ênang drei mâo klei iêu hriê čiăng bi mguôp sa hlăm asei mlei Yang Krist. Tơdah ai tiê drei mâo klei êđăp ênang, drei srăng dôk êđăp ênang nanao hŏng ayŏng adei hlăm Phung Sang Aê Diê. Leh anăn klei êđăp ênang anăn yơh đru drei thâo hdơr knga kơ Aê Diê nanao leh anăn hdĭp kkuh mpŭ kơ Anăn Aê Diê hŏng klei blŭ mpŭ mni kơ Aê Diê. Khădah snăn, drei ăt ênưih snăk bi luč hĕ klei êđăp ênang Aê Diê brei kyua mơ̆ng lu klei truh jŭm dar drei. Grăp hruê knŏng hmư̆ mă klei mrâo mrang jhat mơ̆ng lăn ala ăt ngă kơ drei ênguôt hnĭng rŭng răng mơh. Amâodah tơdah tlă anăp hŏng klei dleh dlan hlăm gŏ sang găp djuê drei ăt ênưih mơh bi luč hĕ klei êđăp ênang. Si ngă čiăng kơ drei dưi djă krơ̆ng kjăp klei êđăp ênang hlăm mngăt ai tiê? Knŏng hjăn sa ênhă êlan yơh, anăn jing knang kơ Yang Mngăt Jăk Aê Diê đru brei klei êđăp ênang mơ̆ng Aê Diê “kiă kriê” hlăm ai tiê drei.
Si ngă drei dôk bi knal mơ̆ klei êđăp ênang hlăm mngăt ai tiê?
Ơ Khua Yang, bi mni kơ Ih brei leh klei êđăp ênang kơ kâo. Akâo kơ klei êđăp ênang Aê Diê kiă kriê ai tiê kâo čiăng kơ mngăt ai tiê kâo dưi mâo klei êđăp ênang nanao wăt ya klei truh dưn mơh.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
