Hơriso 3:1-8
“Mă-lei, Ơ Kră Yang! Ih boih khêl pĕng tăp kơ inh; Ih jing tơdrong mă inh ư-ang, păng Ih ăn kơ inh gơh ngơk kơ̆l.” (Hơriso 3:3)
Nơ̆r jet tơchĕng pơwao:
– Pơtao Đa-wĭt đei tơ’bơ̆p tơdrong kiơ ‘bơ̆t jơ âu?
– Sư đei pơma hơđăl kơ tơdrong sư tơ’bưh hăm Kră Yang thoi yơ?
– ‘Bai pơhrăm tơgŭm lu bơ̆n kơplah tơ’bơ̆p tơdrong pơlong lăng tăp dăr thoi yơ?
Hơriso 3 noh jơ̆ nơ̆r ôr krao ‘Bok Pơtao Đa-wĭt kơplah sư đei tơdrong truh đơ̆ng kon sư kơdih Apsalôm pơm tơdrong blah plơ̆, wă pơrăm pơlôch sư. Kơplah akâu jăn sư đe wă pơrăm, tơdrong sơ’ngon dêh lăm jơhngơ̆m sư noh jơ̆ đơ̆ng kon sư pơjing kơdih mă sư ‘mêm dêh mă lei jơ âu wă pơlôch sư. Pơtao Đa-wĭt đei lơ bơngai pơma che bơle, pơma tơblĕk: “Kră Yang ‘Bok Kei-Dei ưh kơ đei pơklaih sư ôh” (trong 2). Mă lei, kơ plah đei tơbơ̆p tơdrong noh, sư ưh kơ đei kơdŭn dah ưh kơ đei tơdrong sơmĕng ôh mă lei sư đei jơhngơ̆m lui gơnang păng băt kơ Kră Yang gô wei lăng chăl arih sư, Kră Yang nhen thoi khêl pĕng sư. Kră Yang đei ăn bơih kơ sư tơdrong ư-ang noh jơ̆ dan sư đei pơm pơtao Israel. Kră Yang gô ba ăn kơ sư tơdrong kĕ jei, pơm ăn kơ sư gô ngơk tơpăt kơ̆l sư đơ̆ng lu bơngai ayăt (trong 3).
Kơplah ‘bơm lăm tơdrong pơmat tat dêh, pơtao Đa-wit ưh kơ gơnang kơ kon bơngai mă lei sư lăng tơ Kră Yang păng krao apinh Sư dŏng pơklaih. Lăm tơdrong tơ’bưh jê̆ Kră Yang, sư đei mơn kơ Kră Yang ling lang tơl nơ̆r sư krao khan. Sư đei mơn kơ Kră Yang dŏng sư đơ̆ng lu sem bri, đơ̆ng bơngai kơjung Gôliat, păng dôm tơdrong mă sư đei tơblah hăm lu bơngai ayăt (I Samuel 17:37, 50; II Samuel 8). Lăm tơdrong mơn đơ̆ng dôm tơdrong hlôi bơih, sư đei gơh teo hiôk mă khan đei dôm tơdrong ưh kơ thoi sư wă yua kơ sư băt Kră Yang oei pơgơ̆r tôm tơdrong; Kră Yang oei dơ̆ng gah sư păng bơwei tơdrong arih sư. Sư ling lang kơ krao khan kơ Kră Yang yua kơ Kră Yang tơpăt sĭt, Kră Yang gô toblah dŏng sư păng gô ăn kơ sư tơdrong ư-ang dơ̆ng. Lăm nơ̆r pơtôch, Pơtao Đa-wĭt đei pơma pran Kră Yang bơih jơ̆ tu tơm kơ tơdrong pŭn hiôk tuh ăn kơ lu kon pơlei pơla Sư. “Tơdrong dŏng pơklaih đơ̆ng Kră Yang, Apinh Ih ăn tơdrong pŭn hiôk tih kơ kon pơlei pơla Ih. Sêla” (trong 8).
Pơtao Đa-wit ăn kơ lu bơ̆n ‘bôh tơdrong tơbưh hăm Kră Yang mă khan đei tơdrong pơlong lăng tơdrong lui bơ̆n gô đei hơđơ̆ng hiôk chơt. Lăm tơdrong krê hơmơt, kial dơhlu poh yă lăm chăl arih bơ̆n noh jơ̆ nhen thoi teh ‘lơ̆ng ba ăn kơ đon lui lu bơ̆n gô wơ̆ pran. Kơplah đon lui dơ̆ng kơjăp lăm Kră Yang, lu bơ̆n gô pơjao dôm tơdrong lăm tơpang ti Kră Yang, păng gô đei mơn kơ tơdrong đei dŏng tơgŭm đơ̆ng Kră Yang, păng tơdrong hơđơ̆ng hiôk đơ̆ng Sư gô mơ̆t ‘bĕnh blai kơ lăm jơhngơ̆m lu bơ̆n. Tơdrong hơđơ̆ng hiôk đơ̆ng Kră Yang gô ba ăn kơ bơ̆n mă đei tơdrong tơ’bơ̆p đơ̆ng rŏng kơnh kư̆m gô đei tơdrong hơđơ̆ng, păng rim năr lu bơ̆n rai băt kơ Kră Yang rai hloh, păng băt kơ kơdih rai hloh, păng pơjing tơiung tơ’bưh hăm Kră Yang rai đunh rai jê̆ băl hloh. Kơplah lu bơ̆n đei tơdrong wă tơ’bưh lăm tơdrong poh yă kial hơbŭt lăm chăl arih, athei kŭp kơ̆l ‘bơ̆t anăp Kră Yang, na sư gô dui pơngơk kơ̆l bơ̆n tơpăt dơ̆ng.
Ơ Kră Yang, inh bơnê kơ Ih yua kơ Ih ling lang mơ̆ng nơ̆r inh krao khan păng dŏng pơklaih inh trŏ kơ jơphŭt Ih. Kră Yang Ih băt kơ inh kăl kơ Ih dêh kơplah đei tơdrong pơlong lăng lăm chăl arih. Apinh tơdrong Ih oei hơdai păng tơdrong hơđơ̆ng hiôk đơ̆ng Ih pơm ăn kơ inh pran jăng păng bơhngol inh ling lang gơnang kơ Kră Yang. Yua anăn Kră Yang Yêsu Krist. Amen
Lu bơ̆n hăm oei dơ̆ng kơjăp lăm Kră Yang kơplah đei tơdrong pơlong lăng tăp pang ưh?
Đŏk Sơ̆p Hla Bơar nơ̆r ‘Bok Kei-Dei lăm pêng sơnăm: Hôsia 10
Kênh Youtube BHKTHN:
