Klei Aê Diê Blŭ: Klei Mmuñ Hđăp 3:1-8
Êlan kliăng: “Ƀiădah ih, Ơ Yêhôwa, jing khil kâo; ih jing klei guh kơang kâo, leh anăn pô brei kâo kngưr boh kŏ” (Klei Mmuñ Hđăp 3:3)
Klei êmuh ksiêm mĭn: Mtao Đawit dôk hlăm ya boh klei ? Ya ñu bi mklă klei bi mguôp plah wah Aê Diê hŏng ñu? Ya klei đru leh ñu mơ̆ng klei găn klei đăo hlăm thŭn mlan êgao? Ya klei hriăm đru drei tơdah tlă anăp hŏng klei lông dlăng jŭm dar?
Klei Mmuñ Hđăp 3 jing klei Mtao Đawit akâo jih ai tiê leh anak êkei mtao Y-Apsalôm bi kdơ̆ng, tiŏ mdjiê. Hlăk êjai klei hdĭp arăng ktư̆ juă, ñu lŏ tuôm hŏng klei ênguôt hnĭng jih ai tiê kyua pô roh jing anak êkei ñu khăp hơiêng. Arăng mưč mač kơ ñu, mčhur snei: “Aê Diê amâo srăng bi mtlaih ñu ôh” (êlan 2). Khădah snăn, hlăm boh klei anăn, ñu amâo êdu ai amâodah luč klei čang hmăng ôh ƀiădah jih ai tiê lač Aê Diê jing pô răng kriê klei hdĭp ñu, Aê Diê jing khil răng mgang ñu. Aê Diê ăt brei leh kơ ñu klei guh kơang tơdah brei ñu jing mtao Israel. Aê Diê srăng brei kơ ñu klei dưi, brei ñu dưi kngưr boh kŏ hŏng jih jang phung roh (êlan 3).
Hlăk êjai knap mñai hĭn, Mtao Đawit amâo lŏ knang ôh kơ klei thâo anak mnuih ƀiădah dlăng kơ Aê Diê leh anăn akâo klei bi mtlaih. Hlăm klei bi mguôp siă suôr hŏng Aê Diê, ñu thâo leh Aê Diê jing pô hmư̆ nanao klei ñu kwưh akâo. Aê Diê bi mtlaih leh ñu mơ̆ng kkâo êmông gu, pô jhŏng ktang Y-Gôliat, leh anăn klei bi blah hŏng dŭm ala čar ti êngao (I Y-Samuel 17:37, 50; II Y-Samuel 8). Hŏng klei tuôm mâo klei đăo hlăm thŭn mlan êgao, ñu dưi đih leh anăn pĭt êđăp ênang ti krah klei truh kyua thâo Aê Diê dôk kiă kriê; Aê Diê dôk phă ñu leh anăn răng kriê klei hdĭp ñu. Ñu lŏ dơ̆ng kwưh akâo hŏng Aê Diê jing Pô kpă ênuah, bi blah kyua klei mtăp mđơr leh anăn brei klei guh kơang kơ ñu. Hlăm klei mjưh ruĕ, Mtao Đawit hưn ktang Aê Diê jing phŭn klei jăk mơak brei kơ mnuih ƀuôn sang Ñu: “Klei bi mtlaih jing dŏ Yêhôwa dê; brei ih brei klei jăk jĭn kơ phung ƀuôn sang ih!” (êlan 8).
Mtao Đawit brei drei ƀuh klei bi mguôp plah wah klei lông dlăng, klei đăo leh anăn klei êđăp ênang. Dŭm klei knap mñai, angĭn êbŭ hlăm klei hdĭp jing klei jăk kơ klei đăo drei dưi bi hriăm leh anăn hriê kơ prŏng. Tơdah klei đăo kjăp hlăm Khua Yang, drei srăng jao jih djăp mta klei hlăm kngan Ñu, thâo kơ klei Aê Diê bi mtlaih, leh anăn klei êđăp ênang yuôm bhăn Aê Diê srăng kiă kriê mngăt ai tiê drei. Klei êđăp ênang hlăm Khua Yang đru drei tuôm hŏng klei lông dlăng mkăn, leh anăn nanao snăn grăp hruê thâo Khua Yang hĭn, thâo klă pô hĭn, leh anăn mkŏ mjing klei bi mguôp hŏng Khua Yang ƀrư̆ hruê sĭt suôr hĭn leh anăn kjăp hĭn. Tơdah drei tuôm hŏng dŭm angĭn êbŭ hlăm klei hdĭp, brei kui kŏ kơ Aê Diê, Ñu srăng đru kơ drei dưi kngưr kŏ.
Drei đăo kjăp kơ Aê Diê ti anăp ya klei lông dlăng jŭm dar mơ̆?
Wah lač: Ơ Khua Yang, kâo bi mni lač jăk kơ Ih mđing hmư̆ klei kâo wah lač leh anăn hmao bi mtlaih kâo. Aê Diê thâo si kâo čiăng kơ Ih ti anăp klei lông dlăng hlăm klei hdĭp. Akâo kơ Ih kiă kriê leh anăn klei êđăp ênang Ih đru kâo dôk kjăp leh anăn mngăt kâo knang nanao kơ Ih. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Ôsê 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
