Klei Aê Diê Blŭ: Y-Nêhêmi 4:1-9
Êlan kliăng: “Hmei wah lač kơ Aê Diê hmei, hruê leh anăn mlam hmei dưm phung gak čiăng mgang.” (Y-Nêhêmi 4:9)
Klei êmuh ksiêm mĭn: Hŏng ya klei bi kdơ̆ng phung Yuđa dôk tlă anăp? Si klei Y-Nêhêmi lŏ wĭt ngă? Ya klei hriăm kơ drei mơ̆ng klei Y-Nêhêmi bi hmô dôk gĭr wah lač?
Y-Sanbalat jing sa čô khua prŏng mâo kơhưm hlăm čar Samari, hlăm anăn mâo ƀuôn prŏng Yêrusalem. Tơdah hmư̆ hing Y-Nêhêmi lŏ wĭt iêô mthưr phung ƀuôn sang Yuđa lŏ mdơ̆ng mnư̆ ƀuôn Yêrusalem, snăn Y-Sanbalat ăl ngêñ snăk. Ñu djă djik djak leh arưp aram bi huĭ čiăng bi kgăn bruă. Mmông anei, tơdah bruă dơ̆ng kčưm, ñu ăl ngêñ hĭn êjai leh anăn ăt lŏ djă djik djak phung Yuđa. Ti djiêô ñu mâo wăt Y-Tôbia, êkei Amôn, jih diñu dua duah êlan ngă čiăng bi êdu ai phung ƀuôn sang Yuđa hŏng klei mưč mač, blŭ bi hlă jhat hmư̆ snăk.
Dôk ti anăp klei djă djik djak leh anăn bi kdơ̆ng mơ̆ng phung roh, Y-Nêhêmi amâo bi tăng mgăl, amâo mblang ôh. Hŏng klei amâo mâo wĭt lač, Y-Nêhêmi kluôm dhuôm amâo mâo tŭ klei bi hmăi jhat mơ̆ng klei blŭ leh anăn klei ngă mơ̆ng mnuih mkăn ôh. Ñu thâo săng snei, klei ngă wĭt kơ phung djă djik djak knŏng ngă bi weh hĕ êlan bruă ñu dôk ngă. Hrô kơ klei anăn, ñu wah lač hŏng Khua Yang. Hŏng Y-Nêhêmi, klei wah lač jing akŏ phŭn klei ktang êlâo hĭn, amâo djŏ êlan hdră knhal tuč ôh. Y-Nêhêmi wĭt lač kơ klei bi kdơ̆ng hŏng klei wah lač sĭt êmĭt. Ñu akâo kơ Khua Yang bi blah hŏng phung roh brei kơ phung ƀuôn sang, leh anăn ñu wĭt ngă kơ klei bi kdơ̆ng anăn hŏng klei ñu dôk gĭr hlăm bruă ngă, amâo mjưh amâodah phưi lui ôh. Ñu thâo Khua Yang yơh iêô ñu kơ bruă anei, kyuanăn ñu amâo brei ôh hlei pô amâodah ya mta klei ngă bi kgăn hĕ ñu mơ̆ng bruă Aê Diê čiăng brei ñu ngă. Tơdah leh wah lač, Y-Nêhêmi bi mbha bruă djŏ guôp hŏng grăp čô, čiăng kơ bruă ăt ngă nanao amâo mdei ôh. Ñu bi mđĭ ai leh anăn gĭt gai phung ƀuôn sang hlăm klei ngă bruă lŏ mdơ̆ng mnư̆ ƀuôn, leh anăn jih jang phung ƀuôn sang ngă bruă hŏng jih ai tiê sơăi (êlan 6). Tơdah ƀuh bruă đĭ kyar, phung roh lŏ ăl ngêñ ktang hĭn êjai, diñu bi trông čhai ksŭng blah čiăng ngă bi rŭng ƀuôn. Lŏ sa blư̆ dơ̆ng, Y-Nêhêmi leh anăn phung ƀuôn sang dôk gĭr wĭt ngă hŏng klei wah lač, leh anăn wăt hŏng klei thâo mĭn ñu dăp mbha mnuih gak hruê leh anăn mlam kăp bi kdơ̆ng hŏng phung roh (êlan 7-9).
Y-Nêhêmi lui brei kơ drei sa klei bi hmô dưm klei wah lač êlâo hĭn kơ jih jang klei, dôk gĭr hlăm klei wah lač, mbĭt hŏng jih ai tiê đăo knang kơ Khua Yang êjai dôk tlă anăp hŏng klei bi kdơ̆ng mơ̆ng phung roh. Khua Yang čiăng kơ drei knang kơ Ñu tơdah tlă anăp hŏng klei arăng bi kdơ̆ng, leh anăn êlan hdră jăk hĭn bi êdah klei drei knang kơ Khua Yang jing klei wah lač. Phung đăo kơ Krist hruê anei tơdah dôk hdĭp tui si klei iêô ăt amâo tlaih ôh mơ̆ng klei arăng ngă jhat, bi kdơ̆ng mơ̆ng hlăm lam truh ti êngao. Rup bi hmô mơ̆ng Y-Nêhêmi brei ƀuh, tơdah drei ăt đăo knang leh anăn dôk gĭr kwưh akâo kơ Khua Yang hrô kơ klei rŭ ênua wĭt ngă, Khua Yang srăng brei klei thâo mĭn kơ drei dưi tlă anăp leh anăn wăt bi leh bruă klam Khua Yang jao.
Si ngă drei dưm êlâo hĭn leh anăn dôk gĭr wah lač mơ̆ tơdah tuôm hŏng klei bi kdơ̆ng mơ̆ng phung roh?
Wah lač: Ơ Khua Yang, akâo Ih đru kâo jih ai tiê hlăm klei wah lač dưm êlâo hĭn leh anăn dôk gĭr wah lač tơdah tlă anăp hŏng klei bi kdơ̆ng. Akâo Khua Yang brei kơ kâo klei thâo mĭn, ai tiê jhŏng leh anăn đăo knang kơ Khua Yang khut khat, čiăng kơ kâo knŏng êran phă anôk bi kčah, čiăng dưi bi leh bruă klam Khua Yang jao. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Êsai 40
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
