Nehemis 4:1-9
Nqe cim:
“Tiamsis peb thov peb tus Vajtswv thiab tso neeg zov nruab hnub hmo ntuj, tawmtsam lawv tsis pub kom tuaj tau ti peb hlo li” (Nehemis 4:9)
Lus nug rau sawvdaws xav:
– Haivneeg Yudas tabtom ntsib txoj kev tawmtsam twg?
– Nehemis ua li cas?
– Peb kawm tau dab tsi dhau los ntawm Nehemis tus qauv ua siab ntev thov Vajtswv?
Ib tsoom mloog txhua tus,
Xanpalas yog ib tus nom muaj hwjchim hauv cheebtsam Xamalis thiab lub nroog Yeluxalees. Thaum uas hnov hais tias Nehemis rov los thiab nqua hu cov Yudas rov qab pib txhim kho tej ntsa yeej dua tshiab ces ua rau Xanpalas chim heev. Nws txob thuam thiab nrhiav kev tav cov Yudas. Lub sijhawm, thaum pom lawv pib ua haujlwm Xanpalas haj yam chim heev thiab txob thuam lawv kawg li. Nws tseem muaj Taunpias uas yog neeg Amoos sawv ntawm nws ib sab, nkawm ob leeg nrhiav kev ua rau cov Yudas hnyav siab los ntawm lawv tej lus cem txob thuam thiab hem uas tsis zoo mloog li.
Sawv ntawm yeebncuab kev ua saib tsis taus thiab tawmtsam, Nehemis tsis nrog lawv sib cav, tsis hais dab tsi li. Yeebncuab tej lus hem thiab tes haujlwm ntawd yeej ua tsis tau li cas rau Nehemis. Nws paub hais tias tawmtsam nrog tus uas txob thuam nws yuav ua rau nws ua tsis tau tes haujlwm uas tabtom ua. Nws kawg thov Vajtswv xwb. Nyob rau hauv Nehemis kev thov Vajtswv tsis yog hais tias kawg kev lawm tiamsis yog lub zog xubthawj rau nws. Nehemis teb lawv tej txoj kev tawmtsam los ntawm kev thov Vajtswv kawg siab ntsws. Nws thov Vajtswv pab nws haivneeg tawmtsam yeebncuab, thiab nws teb tej kev tawmtsam los ntawm kev ua siab ntev hauv kev ua haujlwm, tsis pub nres thiab tsis tso tseg li. Nws paub hais tias Vajtswv hu nws ua tes haujlwm ntawd, nws yeej tsis cia leejtwg lossis ib yam dab tsi twg tav tau nws tes haujlwm uas Vajtswv xav kom nws ua. Thaum thov Vajtswv nws faib tibneeg ua haujlwm kom yog chaw mus ntxiv. Nws txhawb lawv zog thiab coj lawv ua haujlwm puab tus ntsia yeej thiab tagnrho tej pejxeem sawvdaws puavleej ua haujlwm kawg siab ntsws (nqe6). Thaum pom tes haujlwm ntawd tiav zuj zus, yeebncuab haj yam npautaws heev, lawv nrhiav kev nrhiav tswvyim tuaj ntaus lub nroog Yeluxalees thiab ua kom muaj kev kub ntxhov. Tiamsis ib zaus ntxiv, Nehemis thiab cov pejxeem sawvdaws rov ua siab thov Vajtswv thiab tso neeg zov nruab hnub hmo ntuj, tawmtsam yeebncuab tsis pub kom tuaj tau ti lawv hlo li (nqe 7-9).
Nehemis tseg tau tus qauv txog kev thov Vajtswv yog yam tseemceeb ua ntej, thiab kev ua siab ntev thov Vajtswv kawg siab ntsws ntawm yeebncuab tej kev tawmtsam rau peb. Vajtswv xav kom peb vamkhom Vajtswv thaum ntsib kev tawmtsam, thiab qhov uas peb qhia tshwm kev vamkhom Vajtswv yog kev thov Vajtswv. Niaj hnub nim no ib tug ntseeg Vajtswv thaum ua neej kawg siab ntsws li Vajtswv hu yeej yuav ntsib ntau yam kev tsim txom sab hauv mus txog sab nraum. Nehemis tus qauv qhia pom hais tias yog peb txeev vamkhom Vajtswv thiab ua siab ntev thov Vajtswv, tsis ua pauj rov, Vajtswv yuav pub kev txawjntse rau peb tiv thaiv thiab ua tau tiav tes haujlwm uas Vajtswv cob lawm.
Thov Vajtswv,
Vajtswv, thov pab nyuam yaus saib kev thov Vajtswv yog yam uas tseemceeb ua ntej, thiab ua siab ntev thov Vajtswv kawg siab ntsws thaum ntsib kev tawmtsam. Thov pub kev txawjntse, lub siab tawv thiab paub vamkhom Vajtswv Koj txhua sijhawm rau lub homphiaj ua kom tiav tes haujlwm Koj cob lawm. Nyuam yaus tuav Tswv Yexus Khetos lub npe thov, Amees.
Peb puas saib kev thov Vajtswv yog yam tseemceeb ua ntej thiab ua siab thov Vajtswv thaum raug yeebncuab tawmtsam?
Nyeem Vajluskub hauv peb lub xyoos: Yaxayas 40
Kênh Youtube BHKTHN:
