Klei Aê Diê Blŭ: Hêbrơ 6:13‑18
Êlan kliăng: “Snăn msĕ mơh Aê Diê čiăng bi êdah hŏng klei klă hĭn kơ phung srăng dưn klei Ñu ƀuăn klei Ñu amâo bi mlih ôh klei Ñu čiăng ngă, Ñu bi sĭt hŏng klei Ñu kat asei.” (Hêbrơ 6:17)
Klei êmuh ksiêm mĭn: Ya klei Aê Die ƀuăn leh anăn ya klei Ñu kat asei hŏng Y‑Abraham? Brei thâo klei Y‑Abraham ngă mdjŏ leh anăn boh tŭ dưn ñu mă tŭ? Klei Aê Diê bi sĭt klei ƀuăn kơ Y‑Abraham ya jing klei yuôm kơ drei?
Lu blư̆ Aê Diê tuôm ƀuăn leh hŏng Y‑Abraham kơ klei Ñu srăng bi lar êngŭm anak čô gơ̆, mjing digơ̆ jing sa găp djuê prŏng (Klei Mphŭn Dơ̆ng 12:2; 17:5‑6; 18:18). Aê Diê ƀuăn čiăng lač Ñu ƀuăn rơ̆ng srăng ngă djŏ tui si klei Ñu blŭ leh. Hlăm klei bi mguôp hdơ̆ng mnuih, mâo lu klei arăng bi ƀuăn, ƀiădah boh nik gơ̆, “bi ƀuăn lu mơh, amâo bi sĭt klei ƀuăn lu mơh” tơl arăng amâo lŏ bi yuôm ôh kơ klei ƀuăn. Kyuanăn, mâo lu mnuih yua klei kat asei. Mkă hŏng klei ƀuăn, klei kat asei mâo klei mpŭ hĭn, bi êdah klei sĭt kơ klei ƀuăn rơ̆ng. Tơdah ƀuăn, arăng dưi ƀuăn mang ƀiădah tơdah kat asei, arăng srăng bâo kơ anăn phung yang, anăn phung aduôn aê amâodah ya mta mnơ̆ng yuôm bhăn hĭn pioh rơ̆ng kjăp.
Hlăm êlan 14, kyuadah amâo mâo ôh pô myang leh anăn prŏng hĭn, snăn Aê Diê yua Anăn Ñu pô kat asei hŏng Y‑Abraham snei: “Ñu lač, ‘Sĭt nik Kâo srăng brei klei jăk jĭn kơ ih, leh anăn Kâo srăng bi lar êngŭm anak čô ih.’ ” Thâo klă kơ knuih Aê Diê “Snăn leh ñu gĭr, Y‑Abraham ƀuh klei Aê Diê ƀuăn truh.” (Hêbrơ 6:15) Boh klă gơ̆, ñu dôk guôn truh kơ 25 thŭn čiăng ƀuh klei klei Aê Diê ƀuăn leh, anăn jing hlăk mô̆ ñu kkiêng kơ Y‑Isak ñu mâo 100 thŭn leh. Wăt tơdah mâo blư̆ ñu êdu awăt čuăn ngă mă tui si klei ñu pô čiăng msĕ si klei kkiêng kơ Y‑Ismael, ƀiădah Y‑Abraham ăt đăo kơ klei Aê Diê ƀuăn, kdlưn hĭn jing klei ñu tŭ ư myơr Y‑Isak jing mnơ̆ng myơr hdĭp čiăng bi êdah klei ñu đăo kluôm dhuôm kơ Aê Diê (Klei Mphŭn Dơ̆ng 22). Aê Diê jing Pô sĭt suôr, amâo djŏ Ñu knŏng lui Y‑Isak hdĭp ôh, ƀiădah wăt Ñu bi lar êngŭm mơh anak čô gơ̆ brei jing sa găp djuê prŏng. Kơ anăp, dưi mă tŭ čar Kanaan jing ngăn dưn. Amâo djŏ knŏng dŭm anăn ôh, Khua ƀĭng kna Y‑Pôl brei thâo jih jang hlei pô đăo kơ Yêsu Krist jing anak čô Y‑Abraham sơăi (Galati 3:29). Aê Diê ƀuăn leh, kat asei leh hŏng Y‑Abraham, leh anăn Ñu bi sĭt leh. Ñu jing Aê Diê amâo dưi blŭ luar ôh. Kyuanăn yơh, “phung drei đuĕ dăp leh hlăm Ñu dưi mâo klei bi mđĭ ai ktang čiăng djă pioh klei čang hmăng Aê Diê ƀuăn leh kơ drei.” (êlan 18b). Khua Yang Yêsu jing anôk drei đuĕ dăp, hlăm Ñu, jih jang klei soh drei mâo klei pap brei, leh anăn mâo klei rơ̆ng kjăp kơ klei bi mtlaih. Kyuanăn, drei mâo klei bi juh prŏng, leh anăn djă pioh kjăp klei čang hmăng kơ sa hruê êdei anăp drei srăng dôk mbĭt Khua Yang hlăm ƀuôn ala mtao hlŏng lar Ñu.
Hruê anei, ti ya klei Aê Diê ƀuăn drei srăng dôk dơ̆ng čiăng dưi mâo klei bi mđĭ ai ktang leh anăn djă pioh kjăp klei čang hmăng?
Wah lač: Ơ Aê Diê, kâo lač jăk kơ Ih kyuadah Ih jing Pô sĭt suôr, amâo tuôm mlih ôh, leh anăn sĭt nik Ih srăng bi sĭt klei Ih ƀuăn leh kơ kâo. Đru kâo grăp hruê dôk kjăp hlăm klei Ih ƀuăn leh, leh anăn amâo mâo kdŭn ôh hlăm klei đăo, ƀiădah đăo ktang hĭn, dôk kjăp sĭt suôr hlŏng kơ knhal tuč.
Dlăng Klei Aê Diê Blŭ hlăm tlâo thŭn: Y‑Ôsê 1:1‑2:13
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
