Henplais 6:13-18
Nqe cim:
“Vajtswv xav kom cov uas yuav tau tej uas Vajtswv coglus tseg lawm paub tseeb hais tias Vajtswv yeej tsis hloov tej uas nws yuav ua, Vajtswv thiaj hais ib lo lus tseemceeb ntxiv rau lo lus uas nws tau cog tseg lawm.” (Henplais 6:17).
Lus nug rau sawvdaws xav:
- Vajtswv coglus thiab hais rau Anplahas dabtsi?
- Thov qhia paub qhov Anplahas ua thiab nqi zog nws tau txais?
- Qhov uas tus Tswv ua raws li Nws cov lus cog tseg rau Anplahas muaj nqis li cas rau peb?
Vajtswv coglus rau Anplahas ntau zaus hais tias Nws yuav ua rau Anplahas muaj xeebntxwv coob, ua tau ib haivneeg (Chivkeeb 12:2; 17:5-6; 18:18). Tus Tswv coglus txhais tau hais tias Nws ua tabpov raws li qhov uas Nws hais tseg. Hauv tej kev sib raug zoo hauv lub ntiajteb no, muaj ntau lo lus cog tseg, tiamsis qhov tseeb “coglus xwb tsis ua raws”, thiaj ua rau lwm tus saib tej lus cog tseg tsis muaj nqis. Yog li, ntau leej siv lus twv. Muab piv rau kev coglus, lus twv hais hnyav dua, qhia paub kev coglus ruaj khov. Thaum coglus, tus coglus hais lus xwb tsis ua kuj tau, tiamsis thaum twv lawm, tus neeg siv ib tug tswv, pogyawg lossis ib yam dabtsi muaj hwjchim lub npe los twv ua tabpov.
Hauv nqe 14, vim tsis muaj leejtwg muaj hwjchim loj, Vajtswv thiaj siv Nws lub npe los coglus tseg rau Anplahas hais tias: “Kuv coglus tseg rau koj hais tias kuv yuav foom koob hmoov rau koj thiab kom koj cov xeebntxwv huamvam coob.” Paub meej Vajtswv tus yamntxwv, yog li “Anplahas ua siab ntev tos nws thiaj tau tej uas Vajtswv coglus tseg.” (nqe 15). Tseeb tiag, Anplahas tos tau 25 xyoo yam uas tus Tswv coglus tseg mus txog thaum nws muaj 100 xyoo mam yug Ixaj. Txawm yog muaj qee lub sijhawm qaug zog thiab txiav siab ua raws li neeg nyiam xws li qhov uas yug Yisamayees, los Anplahas tseem ntseeg tus Tswv tej lus cog tseg, qhov timkhawv yog nws txaus siab hlo muab Ixaj ua khoom fij rau tus Tswv, qhov no qhia tawm nws txojkev ntseeg tus Tswv (Chivkeeb 22). Tus Tswv ncaj ncees, Nws tsis yog tseg Ixaj txojsia xwb, nws tseem ua rau Anplahas cajces coob heev, tom qab no nyob hauv lub tebchaws Kana-as. Tsis yog li ntawd xwb, Timthawj Paulus tseem qhia paub tagnrho cov neeg uas ntseeg Tswv Yexus puavleej yog Anplahas xeebntxwv (Kalatias 3:29).
Vajtswv coglus tseg rau Anplahas thiab Nws ua tiav li ntawd. Nws yog Vajtswv tsis hais dag. Yog li, “Peb cov uas khiav dim kev puastsuaj los nrog Vajtswv nyob lawm, peb thiaj yuav ua taus siab ntev tos yam uas peb cia siab hais tias yav tom ntej no peb yuav tau.” (nqe 18b). Tswv Yexus yog peb qhov chaw nkaum, nyob hauv Nws peb tej kev txhaum tau zam huvsi thiab peb tau txojkev cawm dim ibtxhis. Yog li, peb muaj txojkev txhawb zog, muaj kev cia siab ruaj khov ib hnub peb yuav tau nrog tus Tswv nyob hauv Nws lub tebchaws mus ibtxhis.
Thov Vajtswv,
Tus Tswv, nyuam yaus ua Koj tsaug vim Koj yog tus ncaj ncees, tsis hloov, thiab ua tiav raws li Koj coglus tseg rau nyuam yaus. Thov Koj pab kom nyuam yaus nyob ruaj khov hauv Koj tej lus cog tseg tsis thim rov, ntseeg mus txog hnub kawg. Amees.
Hnub no, peb yuav nyob hauv tus Tswv cov lus cog tseg twg kom peb muaj kev txhawb zog thiab muaj kev cia siab ruaj khov?
Nyeem Vajluskub hauv peb lub xyoo: Hauxeyas 1:1-2:13
Kênh Youtube BHKTHN:
