Klei Aê Diê Blŭ: Klei Bi Hriêng 25:27-28.
Êlan kliăng: “Kyuadah Aê Diê amâo brei ôh kơ drei mngăt blao, ƀiădah mngăt ktang, thâo khăp, leh anăn thâo dôk djŏ hnơ̆ng” (II Y-Timôthê 1:7)
Klei êmuh ksiêm mĭn: Boh blŭ “kiă kriê” ya čiăng lač? Si klei hriăm hruê anei kñăm kơ klei djŏ hnơ̆ng? Si srăng ngă čiăng kơ drei dưi hdĭp hŏng klei djŏ hnơ̆ng hĭn hlăm djăp mta klei hlăm klei hdĭp?
Boh blŭ “kiă kriê” mblang mơ̆ng boh blŭ phŭn klei Grek jing enkrateia, lŏ mblang jing thâo hñăn, thâo kiă kriê pô, răng leh anăn dôk djŏ hnơ̆ng. Dua êlan Klei Bi Hriêng anei kñăm kơ tlâo mta klei djŏ kơ klei djŏ hnơ̆ng hlăm klei hdĭp. Êa hnuê jing jăk dưn ƀiădah ƀơ̆ng lu đei amâo jăk ôh. Gĭr hriăm čiăng duah klei thâo kơ pô dê jing jăk, ƀiădah duah đei klei bi mni mơ̆ng lăn ala ăt srăng jing jhat mơh. Sa čô mnuih amâo thâo kiă kriê ôh ai tiê ñu pô ăt srăng tŭ klei bi rai, msĕ si sa boh ƀuôn prŏng amâo mâo mnư̆ amâo dưi gang ôh phung roh hriê plah mă.
Tal sa, pruê̆ blŭ “ƀơ̆ng lu đei êa hnuê” (êlan 27) čiăng lač kơ klei amâo djŏ hnơ̆ng, amâo thâo ư̆ ăn hlăm klei ƀơ̆ng mnăm. Khua Yang lač, huă ƀơ̆ng mnăm lu đei drei srăng kƀah klei dôk răng (Y-Luk 21:34). Ƀơ̆ng mnăm lu đei leh anăn êgao hnơ̆ng bi êdah kơ pô dôk ƀơ̆ng mnăm amâo mâo uêñ ôh, kăn ƀuh rei bruă klam đru bi mbha kơ pô mkăn. Hlăm Galati 5:19-25, Khua ƀĭng kna Y-Pôl mtô kơ bruă ngă mơ̆ng kđeh leh anăn boh mơ̆ng Yang Mngăt Jăk, hlăm knuih siam “klei djŏ hnơ̆ng” jing knuih mơ̆ng Yang Mngăt Jăk. Klei thâo kiă kriê hlăm klei hdĭp dưi săng jing klei djŏ hnơ̆ng, mdê hŏng klei kpiê ruă, leh anăn klei ƀơ̆ng mnăm êgao hnơ̆ng, jing klei răk leh mbĭt hŏng anăn jih jang bruă ngă mơ̆ng kđeh. Tal dua, duah đei klei bi mni kơ pô srăng atăt kơ klei kƀah klei thâo răng mgang pô ti anăp klei mplư mơ̆ng êngao. Tơdah sa čô amâo dưi kiă kriê ôh klei tluh, knuih leh anăn klei čiăng jhat ñu, snăn klei soh srăng kiă kriê pô anăn. Klei kñăm čiăng kơ klei hdĭp phung đăo kơ Krist amâo djŏ duah klei guh kơang ti lăn ala anôk jưh bhiâo anei ôh, ƀiădah duah klei hdĭp hlŏng lar kơ pô dê. Knhal tuč, boh blŭ “kiă kriê” lŏ mblang jing “răng” mơh. Kƀah klei djŏ hnơ̆ng srăng atăt truh kơ boh jhat kjham jing kƀah klei thâo răng kơ phung roh mơ̆ng êngao, msĕ si sa boh ƀuôn prŏng amâo mâo mnư̆ răng mgang. Khua ƀĭng kna Y-Pôl mtă brei phung đăo dôk răng čiăng guôn hruê Khua Yang Yêsu lŏ hriê: “Snăn đăm brei drei pĭt ôh msĕ si phung mkăn, ƀiădah brei drei dôk răng leh anăn dôk êngal” (I Têsalônik 5:6). Hlăm djăp mta klei brei răng kơ bi klei kdơ̆ng mơ̆ng klei soh.
Hŏng phung đăo kơ Krist, boh mơ̆ng Yang Mngăt Jăk ba hriê klei êngal, klei djŏ hnơ̆ng (Galati 5:22). Gưt kơ Yang Mngăt Jăk srăng đru drei mă tŭ klei myang mơ̆ng Khua Yang čiăng hdĭp djŏ hnơ̆ng. Khua ƀĭng kna Y-Pôl lač, “Kyuadah Aê Diê amâo brei ôh kơ drei mngăt blao, ƀiădah mngăt ktang, thâo khăp, leh anăn thâo dôk djŏ hnơ̆ng” (II Y-Timôthê 1:7).
Si ngă drei knang leh kơ Khua Yang hŏng jih ai tiê čiăng dôk djŏ hnơ̆ng hlăm djăp mta klei hlăm klei hdĭp?
Wah lač: Ơ Khua Yang, kâo bi mni kơ Ih kyuadah Ih khăp leh anăn brei leh klei pap kơ kâo. Akâo Yang Mngăt Jăk đru kâo thâo djŏ hnơ̆ng hlăm jih jang klei hlăm klei hdĭp čiăng kơ kâo bi êdah klei khăp Ih leh anăn bi guh kơang kơ Anăn Ih. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Ôsê 7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
