Blŭng a 1:28-31
“Kră Yang ‘Bok Kei-Dei ăn pŭn hiôk kơ kon bơngai păng khan thoi âu: Athei pơjing chek lar rai lơ, wă kơ ‘bĕnh jơ̆p kơ teh; athei pơm ăn kơ teh đak chu yom, athei pơgơ̆r lu ka lăm đak dơsĭ, khŭl sem păr kơpal plĕnh păng đĭ-đăng kon sem brem adrŏ kơpal teh.” (Blŭng a 1:28)
Nơ̆r jet tơchĕng pơwao:
– Đơ̆ng rŏng kơ pơjing kon bơngai, Kră Yang đei bơtho pơkă tơdrong kiơ kơ lu sư?
– Sư asong ăn kơ tơdrong arih kon bơngai thoi yơ?
– Bơ̆n athei arih hăm tơdrong jang Kră Yang pơjao thoi yơ?
Đơ̆ng rŏng kơ pơjing, Kră Yang đei pơjao ăn kơ kon bơngai, pơđĭ kơ drŏnglo păng drŏkăn minh tơdrong jang: “Athei pơm ăn kơ teh đak chu yom, athei pơgơ̆r lu ka lăm đak dơsĭ, khul sem păr kơpal plĕnh păng đĭ đăng kon sem brem adrŏ kơpal plĕnh” (trong 28). Lăm tơdrong jang ‘nâu, lu bơ̆n lăng ‘bôh: Mă mônh, kon bơngai đei pơjing kon hơ’lơ̆p, chek lar rai lơ păng oei jơ̆p jang kơ teh đak. Mă ‘bar, kon bơngai athei pơm ăn kơ teh đak chu yom păng pơgơ̆r teh đak. ‘Noh jơ̆ minh tơdrong tơproh ‘lơ̆ng lăm teh đak âu. Jơ̆ minh tơdrong đei yua ăn kơ dôm tơmam gơh wơ̆ tŏk. Mă pêng, kon bơngai athei pơgơ̆r đĭ đăng tơmam, wă khan athei wei lăng, bơwei wă kơ tơdrong wơ̆ tŏk đĭ đăng tơproh ‘lơ̆ng dôm tơmam đei pơjing lăm teh đak âu.
Kră Yang ưh kơ sĭ pơjao ăn kơ kon bơngai minh tơdrong jang đĕch, Sư oei ăn pŭn hiôk păng hơmet ăn kơ lu sư dôm tơdrong kăl. Lăm tơdrong pŭn hiôk Kră Yang, Sư kư̆m tơgŭm ăn tơmam sa rong arih kon bơngai (trong 9). ‘Noh ưh kơ sĭ tơmam sa wă rong tơdrong arih rim năr đĕch ôh. Mălei kăl hloh dơ̆ng, jơ̆ tơ’bôh tơdrong kon bơngai lăm tơdrong wei lăng păng wei rong đơ̆ng Tơ’ngla Pơjing. ‘Noh jơ̆ năr pơjing mă tơdrâu, păng Kră Yang ‘bôh ‘lơ̆ng tơpă
Kră Yang wă kơ lu bơngai mă hơbŏ thoi rup Kră Yang athei tang măt Sư wă pơm tơ’ngla plei teh, pơgơ̆r đĭ đăng tôm tơmam, bơwei teh đak âu ưh kơ sĭ wă kơ oei ‘lơ̆ng hơnơ̆ng đĕch ôh mă kư̆m oei wơ̆ tŏk hơnơ̆ng. Đơ̆ng noh, Kră Yang ‘Bok Kei-Dei jơ̆ Tơ’ngla ‘lơ̆ng rŏ. ‘Nâu jơ̆ trŏ kơ nơ̆r tơ’blŏk hơnơ̆ng kơ rim ‘nu lu bơ̆n ling lang arih trŏ kơ bơngai pơgơ̆r, wei lăng păng wang pơjing tơiung teh đak âu ưh kơ sĭ kơ bơngai băt kơ yua iŏk đĕch ôh. Đơ̆ng dôm tơdrong jang pơm hmă đĕch thoi kơ ưh kơ tuh hla đuih đăm kư̆ kă, ưh kơ pơhuach kư̆ kă, bơwei tơdrong arih ‘lơ̆ng rơgoh, truh tơ dôm tơdrong jang lăm tơdrong mă bơ̆n gơh thoi kơ pơm thây bơtho, pơm kơmăi, jang lăm teh đak, jang sa mir ‘ba, pơm thây pơgang… rim ‘nu athei jang tơdrong kiơ mă ‘lơ̆ng hloh wă kơ đei dôm tơdrong gĭt kăl ăn kơ teh đak mă Kră Yang ăn ‘Noh jơ̆ dôm tơdrong kăl tơpă wă kơ bơ̆n pơm đơ̆ng Kră Yang athei wei pơgơ̆r păng pơjing tơiung teh đak Kră Yang đei pơjing bơih.
Ơ Kră Yang, inh bơnê kơ Ih yua kơ inh đei pơjing hăm Ih athei wei pơgơ̆r păng tơiung teh đak âu. Apinh Ih tơgŭm inh rim năr lăm tơdrong jang, lăm tơdrong arih, lăm tơdrong tơ’bưh băl wă kơ tôm tơdrong wang pơjing tơiung teh đak mă Kră Yang đei pơjing bơih. Hơpơi tơdrong arih inh ling lang arih trŏ hăm tơdrong jang Kră Yang pơjao wă kơ teh đak âu rai ‘lơ̆ng hloh, păng Anăn Sư đei ưang jơ̆p kơ teh đak. Krao khan yua anăn Kră Yang Yêsu Krist, Amen.
Lu bơ̆n oei bơwei pơgơ̆r teh đak âu thoi yơ lăm tơdrong arih bơ̆n rim năr?
Đŏk Sơ̆p Hla bơar ‘Bok Kei-Dei lăm pêng sơnăm: Jêrêmi 9.
Kênh Youtube BHKTHN:
