Klei Aê Diê Blŭ: II Klei Yăl Dliê 27:1-9
Êlan kliăng: “Đăm mŭt ôh hlăm êlan phung ƀai, leh anăn đăm êbat ôh hlăm êlan phung jhat” (Klei Bi Hriêng 4:14).
Klei êmuh ksiêm mĭn: Phung aê leh anăn ama Mtao Y-Jôtham si phung mtao digơ̆ jing? Ya ngă Aê Diê brei kơ Mtao Y-Jôtham mâo klei ktang? Si drei ngă čiăng amâo tŭ klei bi hmăi mơ̆ng klei mưng jhat hlăm lăn ala ôh?
Mtao Y-Jôtham mâo dua pluh êma thŭn tơdah ñu dơ̆ng kiă kriê. Kyuadah Mtao Y-Usia, ama ñu djŏ phŭng kyuanăn Y-Jôtham kiă kriê bruă sang mtao tơl truh hruê ama ñu djiê. Êlâo tinăn ama ñu jing sa čô mnuih huĭ mpŭ kơ Aê Diê, ƀiădah tơdah ñu jing ktang leh, ñu dơ̆ng mgao, mŭt hlăm sang Aê Diê čuh mnơ̆ng ƀâo mngưi tui si ñu pô čiăng. Boh kơ klei anăn jing ñu tŭ klei Aê Diê bi kmhal hŏng klei djŏ phŭng. Aê Mtao Y-Jôtham jing Y-Amasia, tal êlâo ăt jing sa čô mtao jăk mơh, ƀiădah tơdah ñu dưi leh hŏng klei bi blah snăn ñu lŏ kkuh mpŭ leh anăn myơr mnơ̆ng ƀâo mngưi kơ rup yang phung Êđôm, kyuanăn ñu lă leh anăn tŭ klei phung lhiăr bi mdjiê (II Klei Yăl Dliê 25:14). Ama aê ñu jing Mtao Y-Jôas tal êlâo ăt jing sa čô mtao jăk leh anăn mâo klei čăt đĭ mơh, ƀiădah êdei tinăn ñu lŏ kkuh mpŭ kơ rup yang kyuanăn ñu tŭ klei phung roh hriê bi blah, plah mă leh anăn bi rai, leh anăn phung dĭng buăl bi mdjiê ñu ti jhưng ñu pĭt (II Klei Yăl Dliê 24:23-25).
Mdê hŏng ama leh anăn phung aê ñu, wăt tơdah Aê Diê brei kơ ñu klei čăt đĭ, Mtao Y-Jôtham amâo mâo klei bi mlih jhat ôh. Ñu ngă klei djŏ ti anăp ală Yêhôwa tui si jih jang klei ama ñu Y-Usia ngă leh hlăk ka ngă soh hŏng Aê Diê. Klei Aê Diê Blŭ brei thâo msă mơh “knŏng ñu amâo mŭt hlăm sang Yêhôwa ôh” kyuadah ñu amâo čiăng ngă klei soh msă si ama ñu ngă leh ôh. Wăt tơdah phung ƀuôn sang ăt tui hlue bruă soh kyuadah tŭ lu klei bi hmăi mơ̆ng bruă soh phung mtao êlâo tinăn, ƀiădah bi Mtao Y-Jôtham amâo mâo ôh.
Mtao Y-Jôtham jing ktang kyuadah ñu tui hlue êlan djŏ ti anăp Yêhôwa (êlan 6). Kyuanăn Aê Diê brei klei jăk jĭn kơ ñu hlăm bruă mkŏ mjing. Ñu mdơ̆ng lu boh ƀuôn hlăm čar kngư Yuđa leh anăn kđông kahan. Tơdah ama ñu mdơ̆ng sang tum hlăm ƀuôn Yêrusalem leh anăn hlăm kdrăn tač, snăn ară anei, ñu mdơ̆ng thiăm sang tum hlăm kmrơ̆ng. Msă mơh, Aê Diê brei kơ ñu klei dưi hlăm klei bi blah, ñu dưi hŏng phung Amôn tơl digơ̆ tuh jia kơ ñu tlâo thŭn. Aê Diê brei klei jăk jĭn kơ Mtao Y-Jôtham jih hruê ñu dôk hdĭp.
Hruê anei, drei ăt hdĭp hlăm anôk ngă “bruă soh”, mâo lu mnuih, boh nik nak phung hlăk ai bi tui hdơ̆ng găp ngă klei knhŭk knhul. Diñu bi mni kơ diñu pô hdĭp tui si klei mĭn lu mnuih. Klei hriăm mơ̆ng Mtao Y-Jôtham mñă kơ drei amâo djŏ ôh arăng ngă klei jhat, ngă klei ƀai snăn drei tui ngă klei jhat, klei ƀai mơh tơl tŭ klei Aê Diê bi kmhal. Brei drei knang kơ Klei Aê Diê Blŭ mtrang mngač, hdĭp hŏng klei thâo mĭn msă si Mtao Y-Jôtham mphŭn dô, ăt “tui hlue êlan djŏ ti anăp Yêhôwa Aê Diê ñu” hŏng klei hriăm leh anăn ngă tui si klei Khua Yang mtă čiăng kơ klei hdĭp drei amâo tui hlue bruă soh lăn ala ôh.
Drei dôk dơ̆ng ƀơ̆ng huă tui si klei mĭn lăn ala hă amâodah tui si Klei Aê Diê Blŭ mtă?
Wah lač: Ơ Khua Yang, bi mtlaih kâo mơ̆ng klei dôk dơ̆ng ƀơ̆ng huă tui si lăn ala amâodah phung amâo mâo đăo hdĭp amâo bi mơak kơ Khua Yang ôh, Đru kâo hdĭp nanao tui si klei Ih mtă leh anăn ngă klei bi hmô jăk jih hruê kâo dôk hdĭp. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Yôsuê 24
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
