Klei Aê Diê Blŭ: Y-Yêrêmi 37:17-21
Êlan kliăng: “Kyuadah sa ênuk srăng truh hlăk anăn arăng amâo lŏ čiăng hmư̆ ôh klei mtô sĭt, ƀiădah kyua diñu čiăng hmư̆ klei mơak diñu srăng ruah phung khua pô mtô tui si diñu pô khăp. Diñu srăng hngah hmư̆ klei sĭt nik leh anăn wir tui hlue klei yăl dliê đưm amâo sĭt ôh” (II Y‑Timôthê 4:3‑4).
Klei êmuh ksiêm mĭn: Ya klei Mtao Sêdêkia čiăng êmuh Khua pô hưn êlâo Y-Yêrêmi? Si klei Khua pô hưn êlâo Y-Yêrêmi êmuh mtao Sêdêkia? Si Mtao Sêdêkia wĭt lač klei ñu akâo? Ya klei dleh dlan dôk ngă gun kpăk drei amâo jhŏng hưn klei sĭt nik?
Leh tlă anăp hŏng phung khua leh anăn tŭ klei diñu čăm đĭ ai ngêñ, Khua pô hưn êlâo Y-Yêrêmi dưi atăt ba bi tuôm hŏng Mtao Sêđêkia. Klei bi blŭ hrăm knŏng mkŏ mjing plah wah mtao leh anăn khua pô hưn êlâo kyua mtao mâo klei čiăng êmuh hjăn Khua pô hưn êlâo Y-Yêrêmi. Klei Mtao Sêdêkia mđing leh anăn čiăng hmư̆ mơ̆ng êlâo truh ară anei ăt knŏng jing Yêhôwa lač phung kahan Baƀilôn srăng amâo nao blah ôh ƀuôn Yêrusalem leh anăn lăn anei! Khădah snăn, klei Khua pô hưn êlâo Y-Yêrêmi wĭt lač ngă kơ mtao luč klei čang hmăng leh ñu ăt êlâo êdei msĕ si sa klei bi mklă: “Arăng srăng jao ih kơ kngan mtao Ƀaƀilôn.” (êlan 17). Leh anăn, Khua pô hưn êlâo Y-Yêrêmi êmuh mtao kơ mta phŭn arăng mă kơ̆ng pô, dŭm klei êmuh ñu ba mdah ăt jing klei wĭt lač: ñu amâo mâo klei soh hŏng mtao, hŏng phung dĭng buăl mtao, leh anăn phung ƀuôn sang mtao ôh (êlan 18). Khua pô hưn êlâo Y-Yêrêmi ăt ktrâo lač kơ mtao ƀuh klei bi kmhal kơ phung khua pô hưn êlâo mgưt hiu hưn klei mtao khăp hmư̆ (êlan 19). Leh anăn knhal tuč Khua pô hưn êlâo Y-Yêrêmi kwưh, amâo djŏ akâo tlaih kơ klei krư̆ kđăl ôh ƀiădah akâo đăm ba wĭt ñu kơ sang Khua čih hră Y-Jônathan ôh. Klei akâo anei mâo mtao tŭ ư. “Snăn Mtao Sêdêkia mtă brei arăng ba Y-Yêrêmi kơ wăl phung kahan gak, leh anăn arăng brei kơ ñu grăp hruê sa klŏ kpŭng mơ̆ng êlan phung ngă kpŭng dôk tơl ƀuôn anăn jih kpŭng…” (êlan 21).
Hĭn kơ pô mkăn, Khua pô hưn êlâo Y-Yêrêmi thâo săng klă klei dleh dlan pô dôk tlă anăp jing kyua ñu sĭt suôr hiu hưn Klei Mrâo Mrang Jăk Aê Diê. Amâo djŏ msĕ si gưl Y-Phashur mă kơ̆ng ôh, Khua pô hưn êlâo Y-Yêrêmi mâo leh klei êmuh hŏng Aê Diê, ƀuah ăl kơ hruê kkiêng pô (Y‑Yêrêmi 20: 1‑18). Ƀiădah hruê anei, găn leh lu thŭn mlan tui hlue Aê Diê, ñu thâo leh lu hĭn leh anăn klă mngač hĭn kơ Aê Diê Kpă Ênô jing Pô dôk păn kjăp klei hdĭp ñu, kyua anăn ñu gưt, amâo ƀuah ăl ôh. Khua pô hưn êlâo Y-Yêrêmi dưi lač klei mtao khăp hmư̆ čiăng duah klei êđăp ênang êjai kơ pô, ƀiădah ñu amâo ngă snăn ôh. Wăt tơdah dôk hlăm klei dleh dlan, dôk hlăm anôk war mnă mmăt ƀiădah ñu ăt hưn klei sĭt nik jing klei blŭ mơ̆ng Aê Diê.
Khua ƀĭng kna Y-Pôl bi hriăm: “mtô klei Aê Diê blŭ, brei ih gĭr thâodah mông găl amâodah amâo găl ôh, mblang bi klă, ƀuah, mđĭ ai, đăm kƀah ôh klei gĭr leh anăn klei mtô” (II Y-Timôthê 4:2). Akâo kơ Aê Diê brei drei đăm ôh kyua klei kpĭ mkhư̆ hĕ drei hiu hưn klei sĭt nik Aê Diê kơ mnuih ƀuôn sang.
Drei jhŏng hưn klei sĭt nik mơ̆ng Aê Diê mơ̆?
Wah lač: Ơ Aê Diê kpă ênô! Klei bi hmô mơ̆ng Khua pô hưn êlâo Y-Yêrêmi amâo uêñ klam klei dleh dlan leh anăn blŭ klei sĭt nik mơ̆ng Aê Diê jing klei mñă leh anăn mđĭ ai kâo tui hlue. Akâo kơ Ih đru kâo huĭ mpŭ kơ Aê Diê hĭn kơ huĭ kơ klei dưi ti lăn ala.
Dlăng Klei Aê Diê Blŭ hlăm tlâo thŭn: Y‑ Êsai 14:1‑27
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
