Yelemis 37:17-21
Nqe cim:
“Rau qhov tshuav tsis ntev yuav tsis muaj neeg xav mloog Vajtswv Txojlus lawm. Lawv yuav ua raws li lawv lub siab nyiam xwb, thiab lawv yuav mus nrhiav ntau tus xibhwb los qhia tej zaj uas sawvdaws nyiam mloog. Lawv yuav tsis nyiam mloog Vajtswv Txojlus lawm. Lawv tsuas nyiam mloog tej dabneeg xwb” (II.Timautes 4:3-4).
Lus nug rau sawvdaws xav: Vajntxwv Xedekiyas xav nug tus cevlus Yelemis yam dabtsi? Tus cevlus Yelemis hais li cas rau Vajntxwv Xedekiyas? Yelemis cov lus thov tau Vajntxwv Xedekiyas teb li cas? Tej kev tawmtsam twg ua rau peb qhia tsis tau txojlus tseeb?
Tom qab uas ntsib cov nomtswv thiab raug lawv ntaus, lawv coj Yelemis mus cuag Vajntxwv Xedekiyas. Qhov kev sib cuag no tsuas yog vajntxwv thiab Yelemis nkaus xwb, vim vajntxwv muaj lus xav nug Yelemis tshwjxeeb. Qhov uas Vajntxwv Xedekiyas xav paub thiab xav hnov, yog saib tus Tswv puas hais rau cov tubrog Npanpiloos yuav tsis tuaj tua lub nroog Yeluxalees thiab lub tebchaws no lawm! Txawm nug li ntawd los, Yelemis lo lus teb ua rau vajntxwv poob siab, Yelemis hais li nws ibtxwm hais: “Tus Tswv hais tias Nws yuav muab koj cob rau tus vajntxwv uas kav tebchaws Npanpiloos” (nqe 17). Txuas ntxiv, Yelemis rov qab hais rau vajntxwv: Kuv ua txhaum dabtsi rau koj thiab koj cov nomtswv lossis koj cov pejxeem (nqe 18). Yelemis kuj qhia rau vajntxwv paub txog cov cevlus cuav uas vajntxwv nyiam lub neej (nqe 19). Thiab thaum kawg Yelemis thiaj muaj lus thov, tsis yog thov kom dim hauv tsev lojcuj tiamsis thov tsis txhob xa nws rov mus kaw hauv Yaunathas lub tsev lawm. Cov lus thov tau vajntxwv pom zoo. “Vajntxwv Xedekiyas thiaj kom luag muab kuv kaw rau hauv nws lub loog ib chav uas muaj tubrog zov, thiab nws kom cov neeg cub ncuav ntawm ntug kev nqa ncuav tuaj rau kuv noj txhua hnub nyob qhov ntawd mus txog thaum tsis muaj ncuav nyob hauv lub nroog li lawm” (nqe 21).
Txawv li lwm tus cevlus, Yelemis paub meej tej kev txomnyem uas nws tabtom ntsib, vim nws twb ncaj ncees qhia Vajtswv Txojlus. Tsis zoo li thaum raug Pasehus ntes, Yelemis muaj lus nug Vajtswv, cem nws hnub yug (Yelemis 20:1-18). Tiamsis nimno, nrog tus Tswv mus ntau xyoo, Yelemis paub meej Vajtswv tus uas ncaj ncees tabtom tswj tuav nws lub neej, yog li Yelemis mloog lus, tsis cem lawm. Yelemis yeej hais tau yam uas vajntxwv nyiam mloog kom vajntxwv muaj kev kaj siab, tiamsis Yelemis tsis ua li ntawd. Txawm yog tabtom ntsib kev txomnyem, nyob hauv tsev lojcuj tsaus ntuj nti los Yelemis yeej yuav qhia cov lus tseeb uas yog Vajtswv cov lus.
Timthawj Paulus qhia hais tias: “Koj yuav tsum muab siab rau qhia Vajtswv Txojlus, tsis hais lub sijhawm twg los koj yuav tsum qhia. Koj yuav tsum ua siab ntev qhuab qhia. Koj yuav tsum ua siab ntev qhuab ntuas sawvdaws, yaum sawvdaws los ntseeg thiab txhawb sawvdaws lub zog” (II.Timautes 4:2). Thov Vajtswv pab, tsis txhob cia ib yam kev nyuaj siab twg thaiv peb txojkev qhia cov lus tseeb uas tus Tswv kom peb qhia rau cov tsis tau ntseeg.
Thov Vajtswv,
Vajtswv tus uas ncaj ncees! Yelemis tus qauv uas txaus siab hlo qhia cov lus tseeb thaum ntsib kev txomnyem, ntuas thiab txhawb nyuam yaus kawm xyaum. Thov Koj pab kom nyuam yaus hwm Koj thiab qhia tej lus tseeb. Amees.
Peb puas kam hais cov lus tseeb uas Vajtswv kom peb hais?
Nyeem Vajluskub hauv peb lub xyoos: Yaxayas 14:1-27
Kênh Youtube BHKTHN:
