Yelemis 44:1-10
Nqe cim:
“Nej tsis nco txog tej kev phem kev qias uas nej cov yawgkoob, cov vajntxwv uas kav tebchaws Yudas thiab lawv cov pojniam, nej thiab nej tej pojniam tau ua nyob hauv tebchaws Yudas thiab ntawm tej kev hauv lub nroog Yeluxalees lawm los?” (Yelemis 44:9).
Lus nug rau sawvdaws xav:
– Tus Tswv haivneeg tsis nco yam dab tsi?
– Nuj nqis ntawm qhov tsis nco yog li cas?
– Vim li cas peb yuav tsum nco ntsoov yam ua txhaum rau tus Tswv lawm?
Tus Tswv tej lus no yog hais rau cov neeg Yudas nyob hauv tebchaws Iziv ntawm tej nroog uas yog “Minkedaus, Tapahes, Meefis, thiab sab qab teb” (nqe 1). Tus Tswv xav ntuas kom cov neeg Yudas uas nyob hauv tej nroog ntawd nco ntsoov txog lub roog Yeluxalees thiab tej nroog hauv tebchaws Yudas raug puatsuaj tas yog vim lawv tej kev txhaum uas tawv ncauj tsis mloog tus Tswv lus,“rau qhov cov neeg uas nyob hauv tej nroog ntawd ua kev phem kev qias ua rau kuv chim. Lawv tua tsiaj hlawv fij rau luag tej vajtswv thiab pe tej vajtswv uas tsis hais lawv lossis nej thiab nej cov yawgkoob tsis tau pe dua li” (nqe 3). Tus Tswv hais tias, nws haiv neeg tsis lees txim, tsis tso lawv tej kev txhaum tseg thiab tsis nco txog lawv cov yawgkoob, cov thawjcoj thiab lawv tej kev txhaum,“tsis nco txog tej kev phem kev qias uas nej cov yawgkoob, cov vajntxwv uas kav tebchaws Yudas thiab lawv cov pojniam, nej thiab nej tej pojniam tau ua nyob hauv tebchaws Yudas …” tau ua dhau los (nqe 9).
Vim tsis nco tej kev phem uas tau ua los, lawv thiaj ua lub neej tawm tsam tus Tswv tej lus qhia tsis mloog cov cev Vajtswv lus hais. Ib lo lus hais hauv nqe 5 hais tias:“tsis” yog hais txog tus Tswv haiv neeg kev tawv ncauj, lub siab tsis txawj xav hnub thaud thiab tiam ntawd: “tsis quavntsej mloog, tsis tig ntsej mloog, tsis tso kev phem qias tseg” (nqe 5). “tsis txo fwjchim los txog niaj hnub nimno, tsis fwm kuv, tsis ua lub neej raws li kuv tej kevcai” (nqe 10). Vim li ntawd, nuj nqis lawv tau txais yog raug Vajtswv rau txim phim rau tej kev txhaum uas lawv ua tsis hais “…cov txivneej, cov pojniam, cov hluas thiab cov menyuam mos raug kev puastsuaj kom tsis seem ib tug li” (nqe 7).
Tsis nco hais tias, lub siab rov qhuas tus kheej, tsis paub nco txiajntsig yog tibneeg tus yam ntxwv khav txiv. Thaum tsis nco txog yam phem qias tau ua tawm tsam Vajtswv, peb pheej ua neej tawm tsam tsis paub ntshai, tsis lees txim thiab tsis tso kev txhaum tseg tig rov los cuag tus Tswv. Nuj nqis ntawm lub neej tawm tsam tus Tswv ces yeej yuav tau txais Vajtswv rau txim, vim nws twb ceebtoom lawm: “Nej txhob xav yuam kev, yeej tsis muaj ib tug yuav dag tau Vajtswv, txhua tus nyias yuav tau sau raws li tej uas nyias tseb. Tus uas tseb tej uas neeg lub siab nyiam, tus ntawd yeej yuav tau sau kev ploj kev tuag raws li tej uas nws tseb. Tiamsis tus uas tseb tej uas Vaj Ntsujplig nyiam, tus ntawd yuav tau sau txojsia ntev dhawv mus ibtxhis” (Kalatias 6:7-8). Thov kom peb txhob tsis nco tej kev txhaum uas tau ua tawm tsam tus Tswv los lawd ib yam li Vajtswv haiv neeg hnub thaud, tiamsis paub ceevfaj mloog tus Tswv lus qhuab ntuas thiab txawj tso kev txhaum tseg.
Thov Vajtswv,
Vajtswv ntuj tus paub txhua yam! Tsis muaj ib yam dab tsi uas koj tsis paub. Thov pab nyuam yaus txhob zais kev txhaum thiab txhob tsis nco tej kev txhaum uas tau ua tawm tsam koj lawd, kom paub tig rov los lees txim rau koj thiab tso kev txhaum tseg, thiaj muaj nqis rau tus Tswv koj. Amees.
Peb puas nco txog tej kev txhaum uas tau ua tawm tsam tus Tswv lawm, txawj los lees txim rau tus Tswv thiab tso kev txhaum tseg?
Nyeem Vajluskub hauv peb lub xyoo: Mathais 24:36-25:30
Kênh Youtube BHKTHN:
