Klei Aê Diê Blŭ: Y-Yêrêmi 32:1-15.
Êlan kliăng: “Klei đăo jing klei thâo kjăp kơ mnơ̆ng arăng čang hmăng, klei bi sĭt kơ mnơ̆ng arăng amâo ƀuh ôh.” (Hêbrơ 11:1).
Klei êmuh ksiêm mĭn: Ya klei Khua pô hưn êlâo Y-Yêrêmi tŭ mă mơ̆ng Yêhôwa? Ya boh klei ñu dôk găn hlăk êjai ngă klei anei? Ya boh kdrŭt đru ñu hlue ngă klei msĕ si mklăk anăn? Ya klei hriăm drei mâo mơ̆ng bruă ngă kyua klei đăo mơ̆ng Khua pô hưn êlâo Y-Yêrêmi?
Hlăm hruê sa mlan pluh thŭn tal 9 ênuk mtao Y-Sêdêkia kiă kriê, Mtao Y-Nebukatnetsar čar Ƀaƀilôn ba kahan nao blah mmiă ƀuôn prŏng Yêrusalem, mjing sang čhiăm, mdơ̆ng mnư̆ mnang leh anăn kwang dar ƀuôn pŏng sui truh thŭn tal pluh sa ênuk Y-Sêdêkia, ngă kơ hlăm ƀuôn prŏng mâo klei ư̆ êpa prŏng snăk (II Bruă Mtao 25:1-3). Hlăm wưng anăn, hlăm thŭn tal pluh Mtao Y-Sêdêkia, jing leh sa thŭn ƀuôn prŏng Yêrusalem mâo phung kahan êgar Dưr kwang dar snăn Yêhôwa mtrŭn asăp kơ Khua pô hưn êlâo Y-Yêrêmi blei lăn lŏ mơ̆ng sa čô găp djuê mâo anăn Y-Hanamel (Y-Yêrêmi 32:1, 6, 7). Klei Yêhôwa blŭ truh hŏng Khua pô hưn êlâo Y-Yêrêmi hlăk êjai ñu dôk hlăm klei jing mnă hlăm sang mtao Yuđa kyua ñu jhŏng lač klei hưn êlâo Mtao Y-Sêdêkia hŏng phung ƀuôn sang ƀuôn prŏng Yuđa srăng dlưh rai leh anăn jing mnă nao ti êgar Dưr kyua Yêhôwa jao leh diñu hlăm kngan mtao Ƀaƀilôn, kyua anăn đăm lŏ bi kdơ̆ng ôh kyua klei anăn srăng jing hơăi mang (êlan 2-5).
Hŏng klei mĭn anak mnuih snăn bruă Khua pô hưn êlâo Y-Yêrêmi blei lăn lŏ hlăm wưng anei jing klei bi mklă. Sa čô mnuih dôk tŭ klei arăng krư̆ hlăm sang mnă leh anăn thâo klă lăn čar srăng luič leh anăn jing kriêp êyăng, bi kdrăn lŏ ti Anathôt hlăk dôk hlăm kngan êpul kahan Ƀaƀilôn plah mmiă, ƀiădah ñu lŏ bi liê hlăm bruă blei lăn lŏ anăn! Ƀiădah Khua pô hưn êlâo Y-Yêrêmi thâo klă anăn jing asăp Yêhôwa mtă. Ñu yua klei anei mjing sa klei bi knăl kơ grăp čô mnuih ƀuh sa hruê êdei, phung ƀuôn sang Aê Diê srăng wĭt leh anăn djăp klei blei sang dôk, lăn lŏ, đang boh kriăk ƀâo srăng lŏ wĭt msĕ si aguah tlam (êlan 14-15). Asăp Aê Diê mtă jing sa klei lông dlăng kơ Khua pô hưn êlâo Y-Yêrêmi. Ƀiădah klei đăo kơ Yêhôwa đru leh Khua pô hưn êlâo Y-Yêrêmi jhŏng ngă bruă mdê hŏng wưng ênuk leh anăn mtrŭt ñu gưt asăp Aê Diê wăt tơdah ênuk ară anei nu ăt ka ƀuh ôh klei Aê Diê ƀuăn dưi jing sĭt. Bruă ngă kyua klei đăo mơ̆ng Khua pô hưn êlâo Y-Yêrêmi mđĭ ai phung dơ̆ng nao jing hlŭn.
Aê Diê srăng brei djăp mta klei drei čiăng tơdah drei mđing tui duah Aê Diê leh anăn kkuh mpŭ kơ Ñu êlâo hĭn (Y-Mathiơ 6:33) ƀiădah lu phung ƀuôn sang Aê Diê ăt ka thâo ôh klei jăk anei hlăk êjai amâo jhŏng mđing tui duah Aê Diê msĕ si Klei Aê Diê Blŭ mtô ƀiădah knŏng bi mĭn ya mnơ̆ng ƀơ̆ng, ya mta mnăm, ya mta hơô! Hlăm djăp mta bruă hlăm klei hdĭp, drei srăng amâo dưi mâo ôh klei Aê Diê ƀuăn tơdah lăm lui bruă ngă mơ̆ng klei đăo. Brei drei tui hlue Y-Yêrêmi, hdĭp kyua klei đăo kluôm ênŭm hlăm klei Aê Diê ƀuăn.
Si ngă klei đăo drei kơ Aê Diê bi êdah hlăm bruă ngă?
Wah lač: Ơ Aê Diê sĭt suôr! Kâo mơak kyua dưi ƀuh klei đăo hlăm phung dĭng buăl sĭt suôr Ih. Akâo kơ Ih đru kâo jhŏng bi êdah klei đăo kâo kơ Ih hlăm bruă ngă klă klơ̆ng, čiăng mâo thiăm mông găl thâo klei sĭt suôr Ih leh klei Ih ƀuăn dưi jing sĭt.
Dlăng Klei Aê Diê Blŭ hlăm tlâo thŭn: Y-Yôp 30
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
