Yelemis 32:1-15
Nqe cim:
“Kev ntseeg yog qhov uas peb paub tseeb hais tias peb yuav tau tej uas peb cia siab rau thiab yog qhov uas peb cia siab ntsoov rau tej uas peb qhovmuag tsis pom.” (Henplais 11:1).
Lus nug rau sawvdaws xav:
- Tus cev lus Yelemis tau tus Tswv txib kom ua dabtsi?
- Thaum ua tej no, Yelemis tabtom nyob rau lub tsamthawj zoo licas?
- Lub zog twg pab Yelemis ua raws li yam uas zoo li tsis haum neeg kev xav ntawd?
- Peb kawm tau dabtsi txog tes haujlwm tshwm hauv kev ntseeg tuaj ntawm Yelemis?
Ib tsoom cov uas mloog txhua tus,
Ncaj rau hnub xiab ib, hli kaum, xyoo tim cuaj uas Xedekiyas ua vajntxwv, Nenpukajnexales uas yog tus vajntxwv kav tebchaws Npanpiloos txhij tub rog tuaj tua lub nroog Yeluxalees, lawv tsuam yeej, xov ntsa yeej thiab vij lub nroog mus txog xyoo tim kaum ib Xedekiyas ua vajntxwv, ua rau lub nroog muaj kev tshaib nqhis loj kawg li (II Vajntxwv 25:1-3). Nyob rau ntu sijhawm ntawd, ncaj rau xyoo tim kaum uas Xedekiyas ua vajntxwv, txhais tau hais tias ncaj rau ib lub xyoos tomqab uas lub nroog Yeluxalees raug cov tub rog Npanpiloos tuaj vij, ces tus Tswv txawm hais kom tus cev lus Yelemis yuav nws ib tug kwvtij npe hu ua Hanamees thaj teb (Yelemis 32:1, 6, 7). Tej lus uas tus Tswv hais rau Yelemis yog nyob rau thaum nws tabtom raug kaw rau hauv vajntxwv lub loog vim nws tau cev lus hais tias vajntxwv Xedekiyas thiab cov pejxeem hauv lub nroog yuav raug swb thiab raug ntes mus ua cev qhev vim tus Tswv twb muab lawv cob rau tus vajntxwv Npanpiloos txhais tes lawm, nws hais kom lawv tsis txhob tawmtsam cov Npanpiloos, txawm yog tawm tsam los yeej yuav kov tsis yeej (nqe 2-5).
Los ntawm tibneeg lub qhov muag saib pom, mas qhov uas tus cev lus Yelemis yuav teb rau lub sijhawm ntawd yog ib qhov uas txawv heev, tsis haum li tibneeg txojkev xav. Ib tug neeg tabtom raug kaw thiab paub tseeb hais tias lub tebchaws yuav raug txeeb, raug tseg nyob ua tiaj suab puam, los tseem kam yuav teb hauv Anathaus yog qhov chaw uas twb raug cov Npanpiloos txeeb tau lawm, tiamsis nws tseem raug them nyiaj mus yuav thaj teb ntawd thiab! Tiamsis Yelemis paub tseeb hais tias ntawd yog tus Tswv tej lus samhwm kom nws yuavtsum ua. Tus Tswv siv qhov no los ua lub cim qhia rau sawvdaws paub hais tias, muaj ib hnub twg, tus Tswv haivneeg yuav tau rov qab los, yuav vaj yuav tsev, yuav liaj yuav teb, thiab yuav vaj txiv hmab nyob hauv lub tebchaws no dua (nqe 14-15). Tus Tswv tej lus samhwm no yog ib txojkev sim siab pub rau Yelemis. Tiamsis los ntawm txojkev ntseeg ruaj khov rau ntawm tus Tswv tau pab rau Yelemis kam nqis tes los ua tej yam txawv tibneeg txojkev xav thiab txhawb nws lub zog rau kev mloog tus Tswv lus txawm yog lub sijhawm ntawd nws tsis tau pom muaj tiav raws li tus Tswv tau hais tseg. Yelemis tes haujlwm tshwm hauv txojkev ntseeg tuaj txhawb tau cov neeg uas yuav raug poob mus ua cev qhev lub zog ntau kawg nkaus li.
Tus Tswv coglus pub rau peb tau txhua yam uas peb cheemtsum thaum uas peb xub los nrhiav tus Tswv thiab pehawm Nws (Mathais 6:33) tiamsis Vajtswv cov menyuam muaj coob leej tseem tsis tau txais txoj koobhmoov no vim lawv tsis kam xub los nrhiav tus Tswv zoo li Vajtswv Txojlus qhia ua ntej, lawv pheej txhawj xeeb rau qhov uas yuav noj dabtsi, haus dabtsi, hnav dabtsi! Peb yuav txais tsis tau ib yam dabtsi hauv lubneej yog tias peb pheej tsis ua tshwm tej haujlwm tawm hauv kev ntseeg tuaj. Yuavtsum kawm Yelemis tus qauv, ua lubneej qhia tshwm kev ntseeg tuag nthi rau tus Tswv tej lus cogtseg.
Thov Vajtswv,
Vajtswv tus uas ncajncees! Nyuam yaus zoo siab vim tau pom Koj tus tub qhe Yelemis tus qauv. Thov pab kom nyuam yaus kam qhia tshwm txojkev ntseeg los ntawm tej haujlwm, kom xwv nyuam yaus tau pom txog Koj txojkev ncajncees thaum Koj ua tiav raws li Koj tej lus cogtseg. Amees.
Ib tsoom cov uas mloog hmov thiab tshua,
Peb txojkev ntseeg Vajtswv ua qhia tshwm sab nraud zoo licas?
Nyeem Vajluskub hauv peb lub xyoo: Yauj 30
Phab Xa Suab Lus nrog rau Phab Cob Qhia Tus Ntseeg koom tes txhim muaj.
Txhua yam kev pab tswvyim txhim kho, thov nej sau ntawv xa rau lub chaw: kawmvajluskubtxhuahnub@gmail.com
Tshooj Youtube BHKTHN: https://www.youtube.com/c/bhkthn
