Klei Aê Diê Blŭ: Klei Mtô Mñă Klei Bhiăn 33:8-10
Êlan kliăng: “Ñu mtô klei Ih mtă kơ Yakôp, leh anăn klei bhiăn Ih kơ Israel, ñu myơr mnơ̆ng ƀâo mngưi ti anăp Ih, leh anăn mnơ̆ng myơr čuh ênŭm ti dlông knưl Ih” (Klei Mtô Mñă Klei Bhiăn 33:10)
Klei êmuh ksiêm mĭn: Si klei Y-Môis hơêč hmưi kơ găp djuê Lêwi lŏ bi hdơr kơ bruă klam prŏng digơ̆? Klei hriăm anei brei ƀuh si ngă bruă klam prŏng drei jing phung mă bruă kơ Khua Yang?
Phung Lêwi jing phung găp djuê arăng mdưm pioh mă bruă kơ Aê Diê, leh anăn klei Y‑Môis hơêč hmưi lŏ bi hdơr kơ digơ̆ tlâo mta bruă klam prŏng brei digơ̆ ngă bi jăk, anăn jing: Ngă klei bi hmô hlăm klei gưt kluôm ênŭm kơ Klei Aê Diê Blŭ, mtô bi djŏ Klei Aê Diê Blŭ, leh anăn bi guh kơang kơ Aê Diê hŏng bruă digơ̆ ngă hlăm klei kkuh mpŭ kơ Aê Diê. Anei jing bruă klam ktrŏ snăk, kyuadah hlăm Čar Aê Diê Ƀuăn kơ phung ƀuôn sang Ñu srăng dôk, êngao kơ mâo mnơ̆ng ƀơ̆ng huă mnăm êbeh dlai, digơ̆ srăng tuôm hŏng lu klei mplư mơ̆ng phung rup yang phung tue. Čiăng kơ phung Israel amâo lĕ ôh hlăm klei kkuh mpŭ kơ rup yang, phung Lêwi srăng mtô Klei Aê Diê Blŭ hŏng klei sĭt, mtô bi djŏ “klei Aê Diê mtă”, “klei bhiăn Aê Diê” amâo dưi lŏ thiăm amâodah bi hrŏ tui si klei mĭn digơ̆ pô ôh (êlan 10). Boh nik nak hlăm klei hdĭp grăp hruê brei phung Lêwi bi hmô hlăm klei gưt kơ Klei Aê Diê Blŭ leh anăn djă pioh klei Aê Diê bi mguôp (êlan 9). Tơdah amâo ngă snăn ôh, jih jang klei digơ̆ mtô srăng jing hơăi mang kyuadah digơ̆ knŏng blŭ ƀiădah amâo ngă ôh.
Hŏng bruă čuăn jing phung myơr mnơ̆ng ngă yang kơ Aê Diê msĕ si “myơr mnơ̆ng ƀâo mngưi ti anăp Aê Diê”, “myơr mnơ̆ng čuh ênŭm ti dlông knưl Aê Diê” (êlan 10), phung Lêwi srăng ngă hŏng jih ai tiê mpŭ kơ Aê Diê, dưm Aê Diê êlâo hĭn kơ jih jang klei hlăm klei hdĭp digơ̆, wăt amĭ ama leh anăn phung anak čô digơ̆ hlăm gŏ sang. Hlăm êlan 9, “Pô lač kơ ama leh anăn amĭ ñu, ‘Kâo amâo uêñ kơ digơ̆ ôh;’ ñu amâo thâo kral phung ayŏng adei ñu ôh, leh anăn amâo uêñ ôh kơ phung anak ñu…” lŏ bi hdơr kơ klei yăl dliê bŏ hŏng klei ênguôt hlăk phung Israel kkuh mpŭ kơ êđai êmô mah. Aê Diê mtă kơ Y-Môis iêô bi kƀĭn jih jang phung Lêwi ăt dôk sĭt suôr hŏng Aê Diê, leh anăn tiŏ nao digơ̆ brei bi mdjiê hĕ jih jang phung ngă leh klei knhông, bi mdjiê wăt ayŏng adei digơ̆, găp digơ̆ leh anăn phung riêng gah digơ̆, leh anăn phung Lêwi ngă tui si klei Y‑Môis mtă leh kơ digơ̆ (Klei Kbiă 32:26-29). Anei jing klei lŏ bi hdơr yuôm bhăn kơ sa klei čih leh hlăm Klei Aê Diê Blŭ snei, “klei gưt asăp jing jăk hĭn kơ klei ngă yang, leh anăn klei dôk hmư̆ jing jăk hĭn kơ prăi biăp knô” (I Y-Samuel 15:22). Brei drei dưm klei gưt asăp kơ Aê Diê jing êlâo hĭn kơ jih jang klei mkăn.
Hruê anei, amâo djŏ knŏng hjăn khua pô mtô, phung khua sang yang ôh jing phung mă bruă kơ Aê Diê, ƀiădah Khua Yang Yêsu bi tui leh grăp čô drei mơ̆ng klei jing hlŭn kơ klei soh hŏng ênoh êrah yuôm Ñu pô, leh anăn ară anei “drei jing hlŭn kơ Aê Diê” (Rôm 6:22). Grăp čô drei amâo lŏ jing dĭng buăl mă bruă kơ yang jhat ôh, ƀiădah jing dĭng buăl mă bruă kơ Aê Diê. Kyuanăn yơh brei drei hriăm hĕ Klei Aê Diê Blŭ čiăng mtô bi djŏ Klei Ñu Blŭ, brei thâo bi hmô jăk hlăm klei dôk dơ̆ng ƀơ̆ng huă, leh anăn dưm nanao klei huĭ mpŭ kơ Aê Diê jing êlâo hĭn hlăm klei hdĭp drei.
Si ngă drei ngă bruă kơ Aê Diê djŏ hŏng bruă klam prŏng Ñu jao mơ̆?
Wah lač: Ơ Khua Yang, Pô kâo kkuh mpŭ leh anăn mă bruă. Đru kâo thâo huĭ mpŭ leh anăn gưt kơ Ih hlăm jih jang klei, leh anăn bi guh kơang kơ Anăn Ih jing klei dưm êlâo hĭn hlăm klei hdĭp kâo. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êsai 6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
