Klei Aê Diê Blŭ: Y-Mathiơ 17:9-13
Êlan kliăng: “Leh anăn Yêsu lač kơ diñu, “Nao bĕ tar ƀar lăn ala leh anăn mtô klei mrâo mrang jăk kơ jih jang găp djuê mnuih.” (Y-Markôs 16:15)
Klei êmuh ksiêm mĭn: Êjai trŭn mơ̆ng čư̆, ya klei phung ƀĭng kna êmuh Khua Yang? Khua Yang Yêsu đru diñu ƀuh ya klei mơ̆ng klei hưn êlâo leh hlăm Klei Bi Mguôp Hđăp? Ya klei mñă kơ drei kơ bruă klam phung đăo mơ̆ng klei hriăm anei?
Êjai trŭn mơ̆ng čư̆ phung ƀĭng kna ƀuh leh Khua pô hưn êlâo Y-Êli blŭ hrăm hŏng Khua Yang Yêsu, kyua anăn diñu êmuh Khua Yang kơ klei hưn êlâo hlăm Y-Malaki 4:5-6, kyua hlue anăn snăn Khua pô hưn êlâo Y-Êli hriê êlâo leh anăn Krist srăng hriê. Phung khua ƀĭng kna Y-Pêtrôs, Y-Yôhan leh anăn Y-Yakơ đăo Khua Yang Yêsu jing Yang Mêsi hlăm Klei Bi Mguôp Hđăp lač leh ƀiădah diñu lŏ bi mĭn ya ngă Khua pô hưn êlâo Y-Êli ară anei hriê amâo djŏ hriê êlâo kơ Khua Yang Yêsu mphŭn ngă bruă klam ôh. Khua Yang Yêsu bi mklă klei sĭt nik mơ̆ng klei hưn êlâo hlăm hdruôm hră Y-Malaki, Ñu lač, “Sĭt nik Y-Êli srăng hriê čiăng mkra jih jang mnơ̆ng”, leh anăn Ñu ăt brei phung ƀĭng kna thâo klă, “Y-Êli truh leh” (êlan 11-12), Khua Yang čiăng lač kơ Y-Yôhan pô ngă ƀaptem “nao ti anăp Khua Yang hŏng ai mĭn leh anăn klei myang Y-Êli” (Y-Luk 1:17) amâo djŏ jing Khua pô hưn êlâo Y-Êli lŏ hdĭp msĕ si lu mnuih bi mĭn ôh. Ƀiădah bruă klam mơ̆ng Y-Yôhan Pô ngă ƀaptem tŭ klei phung khua gĭt gai klei đăo Yuđa bi kdơ̆ng leh anăn mdjiê. Khua Yang Yêsu ăt brei phung ƀĭng kna thâo Ñu ăt srăng tŭ klei phung khua gĭt gai klei đăo Yuđa bi kdơ̆ng, hngah leh anăn bi mdjiê mơh, “Anak Mnuih srăng tŭ klei knap mñai mơ̆ng kngan diñu” (êlan 12).
Y-Yôhan pô ngă ƀaptem jing leh pô mkra êlan čiăng mprăp kơ Khua Yang sa phung ƀuôn sang srăng tŭ jum Yang Krist tơdah Ñu ngă bruă klam. Hruê anei, grăp čô phung đăo brei tui hriăm klei ñu bi hmô. Drei ăt dôk mâo Khua Yang jao bruă klam hiu hưn Anăn Khua Yang êlâo kơ hruê Khua Yang lŏ hriê. Khua Yang lač leh hlăm Y-Yôhan 14:3, “Leh anăn tơdah kâo nao mkra sa anôk kơ diih, kâo srăng lŏ hriê leh anăn mă diih kơ kâo pô, čiăng kơ ti anôk kâo dôk diih dưi dôk msĕ mơh.” Khua Yang Yêsu klă sĭt srăng lŏ hriê, bi drei dôk bi leh bruă klam jing phung hiu hưn kơ ñu mơ̆? Brei drei hdĭp djŏ hŏng klei sĭt nik, hdĭp đru kơ phung riêng gah pô thâo kral klei soh diñu čiăng kmhal wĭt kơ Khua Yang, mbĭt anăn ăt srăng tŭ klei dleh dlan, bi kdơ̆ng boh nik arăng ngă jhat kyua hdĭp djŏ tui si Klei Aê Diê Blŭ leh anăn mă bruă kơ Ñu. Ară anei “hruê Yêhôwa prŏng leh anăn bi huĭ ka truh” (Y-Malaki 4:5) ƀiădah dŭm klei bi knăl mơ̆ng hruê knhal tuč anăn hlăk ƀrư̆ klă mngač, akâo kơ Khua Yang brei grăp čô phung đăo, grăp Phung Sang Aê Diê ktang hĭn hlăm bruă hiu hưn Klei Mrâo Mrang Jăk, mđing hiu hưn klei bi mtlaih Khua Yang kơ lu mnuih kyua adôk lu snăk mnuih ka mâo klei bi mtlaih.
Drei dôk gĭr jih ai ktang bi leh bruă klam Khua Yang jao êlâo kơ hruê Khua Yang Yêsu lŏ hriê mơ̆?
Wah lač: Ơ Khua Yang Yêsu, Ih ƀuăn klă sĭt srăng lŏ hriê čiăng ba hlei phung đăo kơ Khua Yang wĭt dôk hŏng Ih. Akâo kơ Ih đru kâo thâo bruă klam hiu hưn Klei Mrâo Mrang Jăk Ih jao kơ kâo čiăng jih ai tiê bi leh bruă klam êlâo kơ hruê Khua Yang lŏ hriê. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Mtô Mñă Klei Bhiăn 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
