Klei Aê Diê Blŭ: Klei Mtô Mñă Klei Bhiăn 7:1-6
Êlan kliăng:
“Đăm bi mđua knông hŏng phung amâo đăo ôh. Kyuadah ya klei bi mguôp dưi mâo klei kpă hŏng klei wê? Amâodah ya klei bi mguôp klei mngač dưi mâo hŏng klei mmăt? Ya klei bi mguôp Krist dưi mâo hŏng yang Bêlial? Amâodah ya pô đăo dưi mâo mbĭt hŏng pô amâo đăo ôh?” (II Kôrantô 6:14-15).
Klei êmuh ksiêm mĭn: Jing phung ƀuôn sang doh jăk Yêhôwa, ya bruă klam brei kơ phung ƀuôn sang Aê Diê ngă, hlăk diñu čhuang mŭt hlăm ƀuôn Aê Diê ƀuăn? Ya ngă? Ya bruă klam kơ drei tơdah dưi jing phung ƀuôn sang doh jăk Aê Diê?
Y-Môis brei phung ƀuôn sang Aê Diê thâo kơ diñu jing phung ƀuôn sang doh jăk kơ Aê Diê (êlan 6), mblang jing phung ƀuôn sang Israel jing sa phung ƀuôn sang Aê Diê ruah pioh hjăn kơ Ñu pô. Kyuadah jing phung ƀuôn sang doh jăk kơ Aê Diê kyuanăn diñu dưi dưn lu klei pap mơ̆ng Aê Diê. Ƀiădah ti djiêu klei pap anăn, diñu ăt mâo dŭm bruă klam sĭt êmĭt brei ngă hŏng bruă mdưm jing phung ƀuôn sang doh jăk. Hlăm kdrêč Klei Aê Diê Blŭ anei, drei ƀuh phung ƀuôn sang Israel brei ngă hĕ klei mtă mtrŭn sĭt êmĭt pioh hjăn kơ phung ƀuôn sang doh jăk hlăk Aê Diê atăt diñu mŭt hlăm ala čar srăng mă tŭ ngăn dưn. Anăn yơh jing brei diñu bi rai jih phung găp djuê mkăn hlăm čar, bi klưh čăm rai hĕ knưl ngă yang, leh anăn rup yang. Phung ƀuôn sang Aê Diê kăn dưi ngă klei bi mguôp, bi dôk ung mô̆ hŏng phung găp djuê mkăn rei (êlan 2-5).
Brei drei thâo ala čar Kanaan hlăk anăn klei hdĭp knhuah kpă phung mnuih wăt klei đăo dlưh trŭn kjham kjhuê̆, kyuanăn tơdah ngă klei bi mguôp, bi dôk ung mô̆, amâodah ăt djă pioh si klei jing êlâo msĕ knưl ngă yang wăt rup yang, sui hruê srăng atăt kơ klei bi hmăi jhat kơ phung ƀuôn sang doh jăk Aê Diê. Ti djiêu năn, kyuadah phung ƀuôn sang Israel jing phung ƀuôn sang pioh hjăn kơ Aê Diê, kyuanăn diñu khut khat amâo dưi ngă ya mta klei bi mguôp hŏng phung găp djuê mkăn ôh. Kyuadah hlăm bruă ngă klei bi mguôp khăng kñăm kơ klei tŭ dưn kđi čar jih dua nah tĭng, snăn brei bi tŭ ư đơ mta čuăn leh anăn klei bhiăn mơ̆ng dua nah tĭng. Wăt klei bi dôk ung mô̆ hŏng phung tue gar brei kăm mơh, kyua klei bi mguôp anăn srăng đoh ktŭng ƀrư̆ ƀrư̆ phung anak čô kơ êlan kkuh kơ rup yang, lui wir Aê Diê snăn diñu srăng mă tŭ boh mơ̆ng klei Yêhôwa ăl ngêñ.
Aê Diê brei Yang Krist mjing leh kơ drei klei kpă ênô, klei doh jăk leh anăn klei bi tui čiăng kơ drei dưi jing phung ƀuôn sang doh jăk kơ Ñu (I Kôrantô 1:30). Kyuanăn, brei drei myơr klei hdĭp drei kluôm dhuôm kơ Khua Yang, khut khat amâo mâo bi mguôp hŏng lăn ala, amâo bi mguôp klei kpă hŏng klei wê, amâo bi lŭk klei mngač hŏng klei mmăt, amâo mâo kdrêč mbĭt hŏng phung amâo mâo đăo ôh (II Kôrantô 6:14-15). Grăp čô drei brei hdĭp leh anăn bi leh bruă klam sa phung ƀuôn sang doh jăk kơ Khua Yang, năng hŏng anôk mdưm Aê Diê brei. Hlăk klei Aê Diê ngêñ srăng truh kơ phung ƀuôn sang Israel tơdah diñu amâo gưt asăp, snăn srăng truh kơ drei msĕ snăn mơh, “Kyuadah jih jang drei srăng dôk ti anăp jhưng phat kđi Yang Krist, čiăng kơ grăp čô dưi mă tŭ tui si ñu ngă leh klei jăk amâodah klei jhat êjai ñu dôk hdĭp hlăm asei mlei anei.” (II Kôrantô 5:10).
Si ngă drei uêñ mĭn čiăng ngă bi leh bruă klam sĭt êmĭt hŏng anôk mdưm jing ƀuôn sang doh jăk Aê Diê mơ̆?
Ơ Khua Yang, bi mni kơ Ih kyua anôk mdưm yuôm bhăn Ih brei leh kơ kâo. Akâo kơ Ih đru kâo dưi bi leh jih ênŭm bruă klam Ih jao kơ sa čô ƀuôn sang doh jăk hŏng jih ai tiê, čiăng kơ Anăn Ih dưi mâo klei guh kơang găn hŏng klei hdĭp kâo.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đaŏ Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
