Klei Aê Diê Blŭ: Y‑Mathiơ 19:13-15
Êlan kliăng: “Ƀiădah Yêsu lač, “Brei phung hđeh hriê kơ kâo, đăm ghă digơ̆ ôh; kyuadah ƀuôn ala mtao adiê pioh kơ phung msĕ si digơ̆.” (Y‑Mathiơ 19:14)
Klei êmuh ksiêm mĭn: Tơdah arăng ba phung hđeh kơ Khua Yang Yêsu, si phung ƀĭng kna ngă? Ya ngă diñu ngă snăn? Ya klei hriăm drei mâo mơ̆ng ai tiê Khua Yang Yêsu hŏng phung hđeh?
Phung Yuđa khăng ba phung hđeh nao kơ phung Rabi čiăng mâo klei hơêč hmưi hlăm knăm hdơr hruê kkiêng tal êlâo. Hlăm êlan 13, phung amĭ ama anei mpŭ kơ Khua Yang snăn diñu čiăng kơ Khua Yang ênă kngan wah lač kơ anak čô diñu, anei jing sa klei bhiăn jăk siam. Phung ƀĭng kna lŏ huĭ ngă kpăk kơ Khua Yang amâo mâo mmông mdei anăn ƀuah digơ̆. Boh blŭ “phung hđeh” lač kơ phung hđeh mrâo kkiêng truh kơ mrâo thâo êbat, phung ƀĭng kna bi mĭn phung hđeh điêt anei bi tuôm hŏng Khua Yang Yêsu ăt kăn mâo ya klei tŭ dưn kơ digơ̆ ôh ƀiădah lŏ ngă kơ Khua Yang Yêsu luč hruê mmông kyua phung hđeh điêt anăn.
Hlăk phung ƀĭng kna dôk ƀuah phung amĭ ama ba phung hđeh snăn Khua Yang Yêsu lač, “Ƀiădah Yêsu lač, “Brei phung hđeh hriê kơ kâo, đăm ghă digơ̆ ôh; kyuadah ƀuôn ala mtao adiê pioh kơ phung msĕ si digơ̆ ” (êlan 14). Khua Yang čiăng mtô phung ƀĭng kna sa klei hriăm kơ ênoh yuôm phung hđeh anei tơdah Ñu bi msĕ klei mâo mơ̆ng phung hđeh hŏng phung jing dŏ Ƀuôn Ala Mtao. Mâo knuih drei ƀuh hlăm phung hđeh, anăn jing klei êngeh, gưt asăp, jưh knang, huĭ mpŭ leh anăn đăo knang. Anei ăt jing klei yuôm bhăn brei mâo mơ̆ng sa čô mnuih năng hŏng Ƀuôn Ala Mtao. Khua Yang Yêsu pŭ phung hđeh (Y‑Markôs 10:16) leh anăn ênă kngan hơêč hmưi kơ digơ̆.
Klei yăl dliê anei brei ƀuh Khua Yang bi êdah klei khăp, klei mđing uêñ Ñu hŏng jih jang mnuih wăt tơdah anăn knŏng jing sa čô hđeh điêt. Ai tiê Khua Yang mñă drei, phung hđeh hlăm gŏ sang leh anăn hlăm Sang Aê Diê hruê anei čiăng snăk mâo klei mđing uêñ čiăng mtô Klei Aê Diê Blŭ, mtô phung hđeh khăp kơ Khua Yang, thâo wah lač…Sĭt nik mtô phung hđeh brei luč lu hruê mmông, ai tiê, klei gĭr ƀiădah drei srăng ƀuh boh tŭ năng mđĭ ai jing “Bi hriăm hđeh thâo êlan ñu srăng tui hlue, leh anăn tơdah ñu mduôn ñu amâo srăng weh ôh mơ̆ng êlan anăn” (Klei Bi Hriêng 22:6). Leh anăn Phung Sang Aê Diê srăng mâo phung hriê kơ prŏng hlăm klei đăo čiăng mă bruă msĕ si Y‑Timôthê mphŭn dô, “mơ̆ng hlăk hđeh klei čih doh jăk dưi bi hriăm ih kơ klei bi mtlaih hŏng klei đăo hlăm Krist Yêsu” (II Y‑Timôthê 3:15). Tơdah drei mđing kơ phung hđeh leh anăn mtô Klei Sĭt Nik kơ diñu, drei ăt mâo klei găl lŏ ksiêm dlăng klei hdĭp mngăt pô klă sĭt doh êngeh mơ̆? Dôk gưt asăp Aê Diê kluôm ênŭm mơ̆? Dôk knang kluôm dhuôm hlăm Khua Yang mơ̆? Dôk klă sĭt huĭ mpŭ kơ Aê Diê leh anăn jao djăp mta klei hlăm kngan Khua Yang leh mơ̆ ka?
Drei dôk mđing uêñ kơ bruă mtô kơ klei đăo kơ phung hđeh hlăm gŏ sang pô leh anăn hlăm Sang Aê Diê mơ̆?
Wah lač: Ơ Khua Yang, akâo kơ Ih đru kâo amâo ngă ngơi mang, dlăng hơăi mang bruă atăt phung hđeh nao kơ Khua Yang ôh, akâo kơ Ih đru kâo ksiêm dlăng nanao pô čiăng mâo klei đăo hlăm Khua Yang doh êngeh, knang kluôm dhuôm hlăm Khua Yang msĕ si hđeh điêt. Kâo wah lač hlăm Anăn Khua Yang Yêsu Krist, Amen.
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Dlăng Klei Aê Diê Blŭ hlăm tlâo thŭn: II Y-Samuel 16
Kênh Youtube BHKTHN:
