Klei Aê Diê Blŭ: Klei Bi Hriêng 25:21-22; Rôm 12:17-20
Êlan kliăng: “Ƀiădah “tơdah pô roh ih êpa, brei mnơ̆ng ƀơ̆ng huă kơ ñu; tơdah ñu mhao, brei êa mnăm kơ ñu, kyuadah êjai ngă snăn ih srăng mkăm anghar pui ti dlông boh kŏ ñu.” Đăm brei klei jhat dưi hŏng ih ôh, ƀiădah brei klei jăk ih ngă dưi hŏng klei jhat.” (Rôm 12:20-21)
Klei êmuh ksiêm mĭn: Si mblang pruê̆ blŭ “anghar pui ti dlông boh kŏ”? Ya ngă brei phung anak ƀuôn sang Aê Diê dôk hdĭp hlue si hnơ̆ng čuăn mă klei jăk dưi hĭn hŏng klei jhat ƀai? Si drei dôk hdĭp hŏng phung bi kdơ̆ng hŏng drei?
Brei phung anak ƀuôn sang Aê Diê ngă klei jăk, dôk hdĭp hlue si hnơ̆ng čuăn mă klei jăk dưi hĭn hŏng klei jhat ƀai, wăt kơ phung roh hŏng pô. Sa rup klă sĭt êmĭt Mtao Y-Salômôn yua čiăng bi msĕ klei brei phung roh ƀơ̆ng tơdah diñu êpa, brei diñu mnăm tơdah mhao êa hŏng klei mkăm hdăng ngur ti dlông boh kŏ diñu.
Pruê̆ blŭ “anghar pui ti dlông boh kŏ ñu” khăng mblang mâo dua êlan thâo săng: Tal sa, “anghar pui” čiăng lač “klei ruă ênguôt kyua klei hêñ” kơ sa čô mnuih thâo kral tơdah diñu mă tŭ klei wĭt ngă jăk kơ klei jhat ƀai diñu ngă leh. Leh anăn klei hêñ mnuih jhat ƀai jing mmông găl atăt kơ klei hƀlŏk leh anăn kmhal. Tal dua, “anghar pui” čiăng lač kơ klei bi kmhal, leh anăn klei bi kmhal hŏng hdăng hrah ngur jing klei bi kmhal knhal tuč pioh kơ pô hngah kmhal klei soh, hngah kơ klei bi grăng wăt tơdah ñu mă tŭ leh klei arăng wĭt ngă jăk kơ klei jhat ƀai ñu ngă leh. Hlăm Klei Bi Mguôp Mrâo, Khua ƀĭng kna Y-Pôl hrêč mă yua dua êlan Klei Bi Hriêng ti dlông anăn mbĭt hŏng klei mblang: “Đăm brei klei jhat dưi hŏng ih ôh, ƀiădah brei klei jăk ih ngă dưi hŏng klei jhat.” (dlăng Rôm 12:17-21). Klei ngă brei klei jăk dưi hŏng klei jhat bi mơak kơ Aê Diê, kyuadah drei lui klei ngêñ kơ Aê Diê leh anăn drei đăo klei rŭ ênua jing bruă Aê Diê, Aê Diê srăng bi wĭt klei năng. Kyuanăn tơdah dôk hdĭp hlue si hnơ̆ng čuăn brei klei jăk dưi hŏng klei jhat, Yêhôwa srăng brei klei mưn (Klei Bi Hriêng 25:22).
Phung anak ƀuôn sang Aê Diê amâo dưi dôk hdĭp hŏng mnuih mkăn tui si klei diñu dôk hdĭp hŏng drei ôh, amâo bi wĭt tui si klei năng arăng ngă kơ pô ôh, ƀiădah brei dôk hdĭp tui si klei doh jăk, klei khăp Aê Diê. Khua Yang Yêsu mtô: “Khăp bĕ kơ phung roh diih, leh anăn wah lač brei kơ phung ngă jhat kơ diih, čiăng kơ diih dưi jing phung anak Ama diih hlăm adiê;” (Y-Mathiơ 5:44-45). Khua Yang Yêsu djiê leh ti kyâo bi kal čiăng tla brei nư klei soh kơ grăp čô drei, amâo djŏ kyuadah knhuah hdĭp drei, bruă ngă drei kpă ênô ôh, ƀiădah kyua klei Khua Yang khăp kơ drei. Knhuah hdĭp sa čô đăo kơ Krist brei jing msĕ hŏng Khua Yang hĭn nanao grăp hruê, dôk hdĭp doh jăk, thâo khăp. Akâo kơ Khua Yang brei knhuah hdĭp “brei klei jăk ih ngă dưi hŏng klei jhat” drei srăng dưi đru phung jhat ƀai thâo kral klei soh diñu, thâo kmhal, leh anăn tui duah klei pap brei klei soh mơ̆ng Khua Yang, Aê Diê brei hjăn kơ mnuih kpă ênô wăt kơ mnuih jhat ƀai msĕ mơh, Ñu čiăng kơ jih jang mnuih kmhal kơ klei soh, tlaih kơ klei rai luč leh anăn klei bi kmhal hlŏng lar. Mbĭt hŏng klei anăn, brei drei dôk kjăp, đăm mĭn kơ drei jing luč liê, ênguôt hnĭng tơdah ngă klei jăk kơ phung roh pô, kyuadah Khua Yang srăng brei klei mưn kơ drei. Dôk kjăp bĕ!
Si ngă drei dôk hdĭp hlue si hnơ̆ng čuăn brei klei jăk dưi hŏng klei jhat leh mơ̆?
Wah lač: Ơ Khua Yang, bi mni kơ Ama pap brei leh, leh anăn bi mtlaih kâo. Akâo kơ Ama brei kâo gưt asăp Ama mtô, dôk hdĭp ngă klei jăk hŏng jih jang mnuih, wăt kơ phung roh hŏng kâo. Akâo kơ Ama đru kâo grăp hruê dưi jing msĕ si Ama hĭn. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Čŏk Hia 5
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
