Klei Aê Diê Blŭ: Hêbrơ 6:4-8
Êlan kliăng: “…tơdah diñu lĕ, amâo dưi lŏ atăt diñu kơ klei kmhal ôh, kyuadah kơ diñu pô, diñu lŏ pơ̆ng ti kyâo bi kal Anak Aê Diê, leh anăn brei arăng mưč kơ gơ̆.” (Hêbrơ 6:6).
Klei êmuh ksiêm mĭn: Pô čih hră Hêbrơ hưn êlâo brei răng hŏng hlei pô? Ti knhal tuč kơ pô lui wir si srăng jing? Si ngă čiăng đăm êbat mŭt hlăm êlan lui wir?
Pô čih hră Hêbrơ hưn êlâo brei răng hŏng phung đăo Israel “tuôm mâo leh klei mngač sa blư̆, tuôm djiêl leh mnơ̆ng brei mơ̆ng adiê, tuôm mâo sa kdrêč bruă Yang Mngăt Jăk, tuôm djiêl leh klei jăk hlăm klei Aê Diê blŭ, leh anăn klei myang kơ ênuk srăng truh” (êlan 4-5). Diñu jing phung tuôm hmư̆ leh, thâo leh, wăt bi knal leh mơh klei myang leh anăn klei jăk jĭn mơ̆ng Klei Mrâo Mrang Jăk. Boh blŭ “lĕ” čiăng lač kơ klei lŏ wĭt kơ klei đăo Yuđa hlăk êlâo, hngah kơ mnơ̆ng brei klei bi mtlaih hŏng klei Khua Yang Yêsu djiê ti kyâo bi kal ƀiădah knang kơ klei kpă ênô tui si klei bhiăn. Mâo sa klei jing sĭt năng ênguôt lu drei tuôm ƀuh leh, mâo đa pô tuôm sĭt suôr nao bi kƀĭn, wăt hur har hlăm bruă Aê Diê, đa mâo wăt anôk bruă hlăm Phung Sang Aê Diê, ƀiădah êdei jing hĕ kdŭn tluôn hlăm klei đăo, hưn ñu amâo lŏ jing phung đăo ôh!
Phung lĕ msĕ snăn “amâo dưi lŏ atăt diñu kơ klei kmhal ôh, kyuadah kơ diñu pô, diñu lŏ pơ̆ng ti kyâo bi kal Anak Aê Diê leh anăn brei arăng mưč kơ Gơ̆.” (êlan 6). Khua Yang Yêsu djiê leh ti kyâo bi kal čiăng bi mtlaih diñu kbiă mơ̆ng jih jang mta klei hđăp êlâo kă kơ̆ng leh diñu, jing klei soh leh anăn klei bhiăn, jing klei mgao leh anăn klei mĭn gĭr ktưn čiăng dưi bi mtlaih diñu pô. Khua Yang Yêsu dưm leh Ñu pô hlăm anôk năng jing anôk kơ diñu, čiăng mdưm diñu kơ anôk diñu amâo năng dưn ôh, jing klei dưi jing anak Aê Diê. Tơdah diñu čuăn ruah hngah kơ Khua Yang, boh tŭ srăng jing klei rai luč nanao hlŏng lar kyuadah diñu amâo lŏ mâo myun lŏ dưi kmhal kơ klei soh ôh.
Čiăng kơ đăm lĕ, êlâo hĭn brei thâo kral klei hdĭp klei đăo drei pô msĕ si khua ƀĭng kna Y-Pôl thâo ƀuh leh, “kyuadah êjai jing awăt, hlăk anăn kâo jing ktang” (II Kôrantô 12:10b). Sa klei bhiăn klă mngač snăk Khua Yang Yêsu ktrâo leh snei “dlăng kơ boh thâo kral phŭn ana”. Hlăm dua êlan 7-8, pô čih hră Hêbrơ ăt yua dua klei bi hmô kơ dua mta lăn: lăn čăt jing boh mnga, tŭ dưn kơ pô ngă hma jing lăn jăk, mâo ênoh yuôm; lăn knŏng čăt êruê amâo mâo ênoh ôh năng lui hĕ. Mnuih đăo sĭt kơ Aê Diê brei mâo boh mơ̆ng Yang Mngăt Jăk, klei hdĭp mâo klei bi mlih leh anăn mâo boh tŭ dưn kơ Khua Yang grăp hruê hŏng klei đĭ hriê kơ prŏng hlăm mngăt ai tiê amâo djŏ ôh “si hlăk đưm jing, ară anei ăt msĕ snăn mơh”. Mnuih đăo sĭt kơ Aê Diê srăng kă klei hdĭp mngăt ñu hlăm Khua Yang nanao, leh anăn Yang Mngăt Jăk srăng răng kriê ñu amâo êbat mŭt hlăm êlan lui wir ôh.
Si ngă klei hdĭp mngăt drei dôk bi êdah boh Yang Mngăt Jăk sa čô mnuih mâo klei đăo sĭt mơ̆?
Ơ Khua Yang, bi mni kơ Khua Yang kyua klei Ih ƀuăn, klei Ih bi mđĭ ai hlăm Klei Aê Diê Blŭ, leh anăn wăt klei hưn êlâo brei răng čiăng đru kâo lŏ dlăng wĭt klei đăo kâo, čiăng kâo thâo huĭ boh tŭ huĭ mduĭ kyua klei lui wir. Brei kâo kă bi kjăp nanao mngăt kâo hlăm Khua Yang čiăng amâo tuôm dôk kbưi hŏng Ih ôh.
Dlăng Klei Aê Diê Blŭ hlăm tlâo thŭn: Y-Êsêkiêl 31:1-32:6
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
