Klei Aê Diê Blŭ: Klei Bi Hriêng 20:17
Êlan kliăng: “Kpŭng mâo hŏng klei soh jing mmih kơ mnuih, ƀiădah êdei ƀăng êgei ñu bŏ hŏng čuah êga.” (Klei Bi Hriêng 20:17)
Klei êmuh ksiêm mĭn: Ya klei čiăng lač mơ̆ng klei blŭ “Kpŭng mâo hŏng klei soh”? Si boh jhat mơ̆ng klei ngă soh? Ya bruă ngă amâodah klei mĭn diih akâo kơ Aê Diê bi mlih čiăng kơ klei hdĭp jing doh jăk?
Klei Bi Hriêng 20:17 bi êdah klei mdê dua pruê̆ blŭ čiăng bi êdah klei mâo leh anăn luč mơ̆ng klei hdĭp duah mplư. Klei bi hriăm anei brei ƀuh hlăm klei hdĭp, phung mâo klei tŭ dưn kyua mplư, luar khăng ktư̆ juă pô kăn srăng amâo dưi krơ̆ng sui ôh. Kpŭng bi hmô kơ mnơ̆ng ƀơ̆ng huă (Klei Bi Hriêng 20:13). Hĭn mơh, kpŭng hlăm êlan anei ăt bi hmô kơ ngăn drăp amâodah klei tŭ dưn dưi mâo. Pruê̆ blŭ “Kpŭng mâo hŏng klei soh” jing duah prăk hŏng klei amâo djŏ amâodah prăk mah mâo mơ̆ng bruă ngă soh. Khădah snăn, dŭm boh mnga mâo mơ̆ng bruă ngă soh, wăt tơdah tal êlâo amâodah hlăm sa wưng bhiâo tal êlâo ngă kơ anak mnuih ƀuh “mmih” hơ̆k mơak, ƀiădah amâo sui ôh êdei anăn klei mmih anăn jing khăng msĕ si boh tâo amâo dưi lun ôh. Arăng amâo srăng ƀuh ôh hlăm “kpŭng” klei mmih, tŭ jăk, ƀiădah hrô kơ anăn jing “čuah êga”, ba klei êka, klei ruă (dlăng hlăm Y‑Yôp 20:14).
Mtao thâo mĭn Y‑Salômôn čiăng bi hriăm anak tơdah anak ngă soh hŏng pô mkăn, hŏng Khua Yang snăn amâo dưi ñĕ ôh kơ boh jhat ruă snăk leh anăn anak srăng amâo dưi wơr ôh tơl jih klei hdĭp. Phung ƀai amâo dưi hơĭt ai tiê dưi dưn nanao boh tŭ mơ̆ng bruă ƀai ba wĭt (dlăng hlăm Y‑Yop 20:12-29).
Ala ƀuôn ƀrư̆ đĭ kyar, anak mnuih ƀrư̆ mĭn lu hĭn mnêč čiăng bi mplư hdơ̆ng pô. Ăt mâo leh lu phung mdrŏng, hing ang kyua bruă hiu mplư luar, ƀiădah êdei anăn luč jih ngăn drăp, lĕ hlăm klei krư̆ kđăl, luč jih jang mnơ̆ng. Wăt tơdah grăp čô thâo sơăi ngăn drăp êbeh yua amâo jih, truh djiê ăt kăn dưi ba mbĭt rei, leh anăn ăt thâo mơh boh jhat huĭ snăk mơ̆ng klei mplư luar ƀiădah lu mnuih ăt lĕ hlăm klei soh kyua prăk mah, klei knhông leh anăn klei soh. Mta kñăm kơ phung đăo jing klei hđĭp lă lar, anăn ară anei brei hdĭp sa klei hdĭp bi guh kơang Anăn Aê Diê, brei ñĕ kơ klei khăp kơ prăk, mplư luar, klei soh. Khua ƀĭng kna Y‑Pôl mtô: “Ti knhal tuč hră anei, kâo mtă kơ diih, Ơ phung ayŏng adei, ya klei jing sĭt nik, ya klei jing năng mpŭ, ya klei jing kpă, ya klei jing êngeh, ya klei jing năng khăp, ya klei mâo hing ang jăk, tơdah mâo klei jăk hĭn, leh anăn tơdah mâo klei năng bi mni, brei diih dôk mĭn kơ klei anăn. Ya klei diih hriăm leh, mă tŭ leh, hmư̆ leh, leh anăn ƀuh leh hlăm kâo, brei diih ngă msĕ mơh, leh anăn Aê Diê klei êđăp ênang srăng dôk mbĭt hŏng diih.” (Philip 4:8-9). Akâo kơ Khua Yang đru grăp čô drei hdĭp hlue si Klei Aê Diê Blŭ čiăng dưi hưn klei jăk mơak hlăm Khua Yang nanao.
Knuih hdĭp, hdră duah prăk drei kpă ênô, doh jăk mơ̆?
Wah lač: Ơ Khua Yang, akâo kơ Ih pap brei kơ kâo kyua lu blư̆ kâo khăp kơ mnơ̆ng hlăm lăn ala anei kƀah klei kpă ênô hŏng mnuih, hŏng Ih. Akâo kơ Ih đru kâo hdĭp kpă ênô hlue si Klei Aê Diê Blŭ mtô čiăng hdĭp bi guh kơang Anăn Ih.
Dlăng Klei Aê Diê Blŭ hlăm tlâo thŭn: Bruă Phung Khua Ƀĭng Kna 10:44-11:30
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
