Klei Aê Diê Blŭ: II Klei Yăl Dliê 30:21-22
Êlan kliăng: “Y-Hêsêkia blŭ klei bi mđĭ ai kơ jih jang phung Lêwi bi êdah klei knhâo hlăm bruă kơ Yêhôwa” (II Klei Yăl Dliê 30:22a)
Klei êmuh ksiêm mĭn: Ya bruă phung Lêwi, phung khua ngă yang, leh anăn phung Israel ngă hlăm hruê knăm? Mtao Hêsêkia blŭ klei bi mđĭ ai kơ hlei pô? Si ngă srăng ngă klei bi mđĭ ai hdơ̆ng phung đăo hlăm Phung Sang Aê Diê?
Dua êlan Klei Aê Diê Blŭ anei yăl dliê klah čŭn kơ klei phung Israel hdơr mpŭ kơ Knăm Ƀơ̆ng Kpŭng Amâo Mâo Kpei êjai kjuh hruê. Digơ̆ hdơr mpŭ kơ hruê knăm hŏng klei hơ̆k mơak êdimima, kyuadah digơ̆ dưi dôk ti anăp Aê Diê bŏ hŏng klei pap leh sui thŭn amâo lŏ kkuh mpŭ kơ Aê Diê ôh. Êjai kjuh hruê phung Lêwi leh anăn phung khua ngă yang mmuñ bi mni kơ Aê Diê hŏng jih ai ktang diñu. Phung Lêwi, hlăm anăn mâo phung khua ngă yang, ƀơ̆ng mnơ̆ng ngă yang jing mnơ̆ng pioh kơ diñu ƀơ̆ng. Msĕ mơh, diñu myơr mnơ̆ng myơr kơ klei êđăp ênang leh anăn mnơ̆ng myơr bi mni kơ Yêhôwa, Aê Diê phung aê diñu. Mnơ̆ng myơr kơ klei êđăp ênang arăng khăng myơr čiăng bi mni kơ Aê Diê, čiăng ngă klei ƀuăn amâodah myơr hŏng klei čang hmăng (Bruă Lêwi 7:11-18). Phung khua ngă yang ƀơ̆ng mnơ̆ng myơr kơ klei êđăp ênang mbĭt hŏng phung myơr čiăng bi êdah klei bi mguôp hdơ̆ng digơ̆, hơ̆k mơak kyua klei êđăp ênang digơ̆ mâo hdơ̆ng digơ̆ leh anăn hŏng Aê Diê (Klei Mtô Mñă Klei Bhiăn 27:7). Ƀơ̆ng Knăm Klei Găn amâodah ƀơ̆ng knăm klei êđăp ênang jing klei arăng khăng ngă êjai hdơr mpŭ kơ Knăm Ƀơ̆ng Kpŭng Amâo Mâo Kpei.
Mtao Hêsêkia amâo djŏ knŏng mâo klei khăp, leh anăn pap brei ôh kơ klei kƀah phung Israel hriê mơ̆ng čar dưr amâo ngă djŏ tui si klei bhiăn, kyuadah mơ̆ng sui digơ̆ amâo tuôm thâo ôh si klei kkuh mpŭ kơ Aê Diê jing (II Klei Yăl Dliê 30:19), ƀiădah wăt ñu “blŭ klei bi mđĭ ai”, si tô hmô bi mni lač jăk kơ jih jang phung Lêwi, hlăm anăn mâo phung khua ngă yang mâo klei thâo săng klă kơ bruă kkuh mpŭ kơ Yêhôwa. Phung anei bi mguôp hŏng jih ai ktang mă bruă kơ Aê Diê leh anăn bi êdah klei digơ̆ thâo săng hlăm hruê bi kƀĭn anei (II Klei Yăl Dliê 30:16-17).
Jih jang ênuk msĕ sơăi, klei đru bi mđĭ ai jing yuôm bhăn snăk čiăng mâo “klei bi mđĭ ai” kơ jih jang phung mă bruă kơ Aê Diê hŏng lu bruă mdê mdê hlăm Phung Sang Aê Diê. Klei blŭ bi mđĭ ai, bruă phung đăo ngă bi êdah klei hdơr knga hlăm Phung Sang Aê Diê srăng đru phung mă bruă kơ Aê Diê wơr hĕ klei suăi, klei dleh dlan, leh anăn mâo klei hur har hĭn hlăm klei mă bruă. Drei khăng ngă klei soh jing klih klei blŭ bi mni ƀiădah kmah klei blŭ mưč kơ phung mă bruă hlăm Phung Sang Aê Diê. Ênưih snăk drei ƀuh klei soh điêt dhiêt ƀiădah wơr hĕ kơ bruă prŏng phung ayŏng adei ngă leh. Akâo Khua Yang đru drei thâo blŭ klei bi mđĭ ai hdơ̆ng drei, bi mni kơ Aê Diê leh anăn bi mni hdơ̆ng drei, đăm blŭ klei bi êdu ai phung dôk mă bruă kơ Aê Diê hŏng jih ai tiê ôh.
Drei khăng blŭ klei bi mđĭ ai hĕ hdơ̆ng drei amâodah duah klei soh čiăng bi mưč hdơ̆ng drei?
Wah lač: Ơ Khua Yang, kâo bi mni kơ Ih kyua Ih brei kơ Phung Sang Aê Diê mâo lu mnuih mă bruă, Đru kâo ƀuh nanao bruă digơ̆ ngă, klei digơ̆ săn asei kơ phung biăp Ih čiăng kâo dưi blŭ klei bi juh leh anăn bi mđĭ ai jih jang phung dôk mă bruă kơ Ih hŏng jih ai tiê. Kâo wah lač hlăm Anăn Khua Yang Yêsu Krist. Amen.
Dlăng Klei Aê Diê Blŭ hlăm tlâo thŭn: Y-Êsai 10
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
