Klei Aê Diê Blŭ: Y-Đaniel 9:20-23
Êlan kliăng: “Kyuadah Ñu mđing leh knga Ñu kơ kâo, kâo srăng iêô wah lač kơ Ñu jih hruê kâo dôk hdĭp” (Klei Mmuñ Hđăp 116:2).
Klei êmuh ksiêm mĭn: Êjai khua pô hưn êlâo Y-Đaniel dôk wah lač, ya klei truh ? Hlăk hbĭl Khua Yang wĭt lač kơ klei ñu wah lač? Ya mta klei brei ƀuh, hŏng ñu wah lač jing blŭ hrăm amâo djŏ blŭ hjăn ôh? Si drei bi knal kơ klei wah lač hdĭp, jih dua nah tĭng?
Drei amâo thâo ôh dŭm sui leh khua pô hưn êlâo Y-Đaniel dôk wah lač, ƀiădah ñu yăl dliê wĭt snei “êjai kâo blŭ”, “êjai kâo ăt dôk blŭ hlăm klei wah lač” snăn mâo dĭng buăl jăk Y-Gabriel Khua Yang tiŏ hriê čiăng wĭt lač kơ klei ñu wah lač (êlan 20‑21). Tơdah drei ƀuh hlăm kdrêč tal êlâo, ñu myơr klei hưn klei soh leh anăn akâo kơ Khua Yang, bi hlăm êlan 22‑27, ñu mđing hmư̆ klei Khua Yang wĭt lač kơ ñu. Hlăm êlan 23, dĭng buăl jăk Y-Gabriel brei thâo “tơdah ih dơ̆ng wah lač, mâo leh sa klei wĭt lač”. Snăn, hŏng khua pô hưn êlâo Y-Đaniel, wah lač jing blŭ hrăm hŏng Khua Yang leh anăn mđing hmư̆ klei Khua Yang lač. Hŏng ñu, wah lač jing tuh êyuh ai tiê, klei khăp ñu pô kơ Khua Yang leh anăn mđing hmư̆ hdră êlan, klei Ñu čiăng. Kyua Khua Yang jing sa čô hdĭp, kyuanăn wah lač amâo djŏ jing blŭ hjăn păn hŏng pô ôh, bi juh ai tiê hjăn pô amâodah bi êmuh ai tiê kpă hjăn pô ôh. Wah lač jing klei blŭ hrăm kpă sĭt, jing tuh êyuh klei mĭn, klei bluh ai, klei ai tiê čuăn čiăng hlăm êlam lĭn jih kơ Aê Diê, mbĭt anăn mđing hmư̆ klei Ñu lač hŏng drei.
Pô čih Klei Mmuñ Hđăp 115 lač kơ klei phung ƀuôn sang tue êmuh ti anôk Aê Diê phung Israel dôk? Năng ai kyuadah phung ƀuôn sang tue mâo rup yang diñu mdơ̆ng, bi Aê Diê phung Israel amâo mâo rup thâo ƀuh ôh, “Aê Diê drei dôk hlăm adiê” (êlan 3) leh anăn Ñu kăm ghă phung kkuh mpŭ kơ Ñu amâo dưi ngă rup krah ôh (Klei Kbiă 20:4). Khădah snăn, pô čih thâo săng snei “rup yang mâo ƀăng êgei ƀiădah amâo thâo blŭ ôh; mâo ală ƀiădah amâo thâo ƀuh ôh; mâo knga ƀiădah amâo thâo hmư̆ ôh… kăn đŏk digơ̆ thâo bi ênai rei” (Klei Mmuñ Hđăp 115:5-7), bi Aê Diê jing sa čô hdĭp, Pô mđing hmư̆ leh anăn wĭt lač kơ klei phung anak Ñu wah lač (Y‑Yêrêmi 33:3).
Lu mnuih hriê kơ Khua Yang knŏng čiăng myơr kơ Khua Yang klei akâo ƀiădah amâo mđing hmư̆ klei Khua Yang mtô lač mơ̆ng Klei Aê Diê Blŭ ôh. Wah lač hŏng Khua Yang amâo djŏ jing blŭ hjăn păn ôh ƀiădah jing klei blŭ hrăm ti krah drei hŏng Khua Yang. Tơdah drei wah lač, Khua Yang mđing hmư̆, mbĭt anăn Ñu mtô lač kơ drei hŏng Klei Aê Diê Blŭ hŏng lu êlan, Ñu ktrâo kơ drei sa êlan Klei Aê Diê Blŭ, mñă kơ drei hdơr mơ̆ng klei sa čô atăt gai huĭ mpŭ kơ Aê Diê mtă mtăn, hmư̆ klei mtô mblang amâodah klei hriăm Klei Aê Diê Blŭ wĭt lač kơ klei drei êmuh, hŏng asăp ênai êdu êun ƀiădah kčŭt ƀuah nanao hlăm ai tiê, hŏng klei êđăp ênang mơ̆ng Yang Mngăt Jăk bŏ dlai hlăm ai tiê hlăk drei tuh êyuh jih klei rŭng ênguôt drei kơ Khua Yang, …
Akâo kơ Khua Yang brei drei hŏng ai tiê kpă sĭt tuh êyuh jih ai tiê klei mĭn drei kơ Khua Yang leh anăn mđing hmư̆ kơ klei Ñu mtô lač nanao.
Si ngă klei wah lač, hŏng diih jing klei blŭ hjăn păn amâodah jing klei blŭ hrăm?
Wah lač: Ơ Khua Yang, bi mni lač jăk kơ Ih kyua Ih jing Aê Diê khăp blŭ hrăm hŏng phung anak Ih. Akâo Ih đru kâo hŏng jih ai tiê wah lač leh anăn kriêp ñăt kăp mđing hmư̆ klei Ih mtô lač kơ kâo mơ̆ng Klei Aê Diê Blŭ grăp hruê.
Dlăng Klei Aê Diê Blŭ hlăm tlâo thŭn: Y‑Êsai 1:1‑20
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
