Daniyees 9:20-23
Nqe cim:
“Txhua zaus uas kuv thov Nws, Nws mloog kuv tej lus thov” (Phau Ntawv Nkauj 116:2).
Lus nug rau sawvdaws xav: Thaum tus cevlus Daniyees thov Vajtswv, muaj yam dabtsi tshwmsim? Tus Tswv teb Daniyees tej lus thov thaum twg? Yam dabtsi qhia rau Daniyees paub, thov Vajtswv yog sib tham tsis yog tham ib leeg? Peb tau txais qhov kev thov Vajtswv ciaj sia rau ob seem zoo li cas?
Peb tsis paub tus cevlus Daniyees thov Vajtswv ntev pestsawg, tiamsis nws qhia hais tias thaum “kuv thov Vajtswv”, “thaum kuv tseem thov” ces tus Tswv txib timtswv Khali-ees los teb nws tej lus thov (nqe 20-21). Yog peb saib ntu ua ntej, Daniyees lees txim thiab thov Vajtswv pab, ces nqe 22-27 yog Daniyees tos tus Tswv teb nws tej lus thov. Hauv nqe 23, timtswv Khali-ees qhia paub “Thaum koj pib thov Vajtswv, Nws twb teb koj tej lus thov lawm”. Yog li ntawd, Daniyees thov Vajtswv yog tham qhia rau tus Tswv thiab mloog raws li Nws qhia. Raws li Daniyees, thov Vajtswv yog qhia tas siab, kev xav rau tus Tswv thiab mloog Nws lus, ua raws li Nws qhia, Nws lub siab nyiam. Rau qhov tus Tswv yog tus uas ciaj sia, yog li thov Vajtswv tsis yog tham ib leeg, yus rov hais rau yus tus kheej, xav hauv yus lub siab. Thov Vajtswv yog nrog Nws sib txuas lus, qhia siab, kev xav tagnrho rau Vajtswv, tos mloog Nws qhia rau yus.
Tus uas sau Phau Ntawv Nkauj 115 hais txog lwm haivneeg nug cov neeg Yixalayees tus Vajtswv nyob qhov twg? Lwm haivneeg muaj mlom pe, tiamsis cov neeg Yixalayees tus Vajtswv ntsia tsis pom, “Vajtswv nyob saum ntuj” (nqe 3) thiab Nws tsis pub tibneeg pehawm Nws zoo pe tej mlom (Khiavdim 20:4). Tus uas sau Phau Ntawv Nkauj zeem paub hais tias, “Tej mlom ntawd muaj qhovncauj, muaj qhovmuag, tiamsis tsis pom kev; muaj pobntseg, tiamsis tsis hnov lus; … ua tsis tau suab nrov hauv qa tuaj li” (Phau Ntawv Nkauj 115:5-7), tiamsis Vajtswv yog tus uas muaj sia nyob, Nws mloog thiab teb Nws cov menyuam tej lus thov (Yelemis 33:3).
Ntau tus tibneeg los cuag tus Tswv thov Nws pab tas tsis mloog tus Tswv tej lus qhia. Thov Vajtswv tsis yog tham ib leeg tiamsis yog peb nrog tus Tswv sib tham ua ke. Thaum peb thov Vajtswv, Nws mloog peb tej lus thov thiab Nws qhia rau peb dhau los ntawm Vajtswv Txojlus, Nws yuav qhia rau peb ib nqe Vajluskub, ntawm lwm tus ntseeg lossis cov qhia Vajtswv Txojlus, dhau tej lus ntawd ua rau peb muaj txojkev kaj siab uas Vaj Ntsujplig pub, thiab peb ua tau neeg qhia siab, qhia txhua yam kev nyuaj siab rau tus Tswv…
Thov Vajtswv pab rau peb txhua tus, qhia tagnrho yus lub siab rau tus Tswv thiab tos mloog Nws qhia rau peb.
Thov Vajtswv,
Tus Tswv, nyuam yaus ua Koj tsaug uas Koj pub nyuam yaus muaj feem tau nrog Koj sib tham. Thov Koj pab kom nyuam yaus muaj lub siab ncaj ncees thov Vajtswv thiab mloog Koj qhia txhua hnub. Amees.
Raws li nej txhua tus, thov Vajtswv yog tham ib leeg lossis yog sib tham?
Nyeem Vajluskub hauv peb lub xyoos: Yaxayas 1:1-20
Kênh Youtube BHKTHN:
