Klei Aê Diê Blŭ: Klei Bi Hriêng 17:21-25
Êlan kliăng: “Sa čô anak êkei mluk bi ênguôt ama ñu, leh anăn brei klei phĭ kơ mniê kkiêng kơ ñu leh” (Klei Bi Hriêng 17:25).
Klei êmuh ksiêm mĭn: Si Mtao Salômôn lač kơ klei ênguôt amĭ ama sĭt anak mluk? Jing amĭ ama, drei mđing dlăng, si drei mtô bi hriăm anak pô? Jing anak čô, ya klei brei drei kmhal, lăm lui čiăng bi mơak kơ amĭ ama leh anăn bi mơak kơ Aê Diê?
Hlăm 6 êlan đŭt (êlan 21-25), Mtao Salômôn lač kơ klei djŏ tuôm kơ bruă klam leh anăn klei ktưn hưn plah wah amĭ ama leh anăn anak čô. Phung anak tŭ jing ba klei mơak, ktưn hưn kơ amĭ ama; phung anak ngă soh jing klei hêñ, ênguôt hnĭng kơ amĭ ama. Mtao čih: “Sa čô anak êkei mluk bi ênguôt kơ ama ñu, ama sa čô mnuih mluk amâo mâo klei mơak ôh” (êlan 21). Tơdah anak ƀai, amĭ ama kăn mơak rei. Wăt tơdah mâo lu mnơ̆ng ƀơ̆ng huă, ăt kăn ƀuh jăk mơh, wăt tơdah mnăm êa drao ăt kăn hlao mơh klei ruă kyua ênguôt hnĭng nanao hlăm ai tiê. Klei ênguôt hnĭng ngă kơ “klei êdu ai bi thu krô klang”.
Mta phŭn mơ̆ng phung amĭ ama jing mđing bi hriăm anak êlan nao, hdră kñăm leh anăn hdră hdĭp hlăm klei hdĭp. Mtao Salômôn mñă klă: “Mnuih thâo săng ƀuh klei knhâo ti anăp ñu, ƀiădah ală mnuih mluk dlăng kơ knhal lăn ala” (êlan 24). Phung mluk amâo tŭ jing ôh kyua čŏng tă êlan kơ pô dŭm hdră kñăm kbưi đei hrô kơ klei jưh hlăm klei thâo mĭn ti anăp mta čiăng dưi mâo (Klei Bi Hriêng14:6). Klei bi mguôp plah wah êlan 21 leh anăn 25 brei ƀuh hnơ̆ng amĭ ama ênguôt hnĭng đĭ nanao. Mơ̆ng klei amĭ ama ênguôt hnĭng, ară anei jing leh klei amĭ phĭ ai tiê leh anăn ama êdu ai. Klei ênguôt rŭng răng snăk leh ƀuh anak amâo tŭ jing.
Phung đưm mâo klei blŭ: “anak mluk amĭ ama klam” čiăng lač kơ bruă klam leh anăn klei ênguôt hnĭng sĭt anak ƀai. Khădah snăn, anak ƀai amâo djŏ knŏng bruă klam phung amĭ ôh, ƀiădah jing bruă klam wăt amĭ hŏng ama. Đăm jao ôh bruă mtô bi hriăm kơ sa čô mnuih. Brei amĭ ama bi hriăm anak mơ̆ng hlăk hđeh čiăng diñu thâo ya jing klei soh čiăng ñĕ đuê̆, thâo hră bhiăn Aê Diê, huĭ mpŭ kơ Aê Diê čiăng dưi dưn klei jăk mơak hlăm klei hdĭp ti lăn, leh anăn klei hdĭp lă lar hlăm Ƀuôn Ala Mtao. Mtao Salômôn bi hriăm leh klă klơ̆ng: “Bi hriăm hđeh thâo êlan ñu srăng tui hlue, leh anăn tơdah ñu mduôn ñu amâo srăng weh ôh mơ̆ng êlan anăn” (Klei Bi Hriêng 22:6). Jing phung anak, brei thâo săng klei tŭ jing pô jing klei mơak, klei ktưn hưn kơ amĭ ama. Mklăk wĭt dŭm klei pô ngă soh srăng ba klei ênguôt hnĭng, klei hêñ kơ amĭ ama.
Akâo kơ Khua Yang đru grăp čô drei ƀuh klei bi mguôp plah wah amĭ ama hŏng anak hlăm gŏ sang phung đăo čiăng jih ai tiê huĭ mpŭ kơ Khua Yang, gưt asăp Khua Yang mtô, bi đru hdĭp bi guh kơang Anăn Aê Diê jing Ama hlăm adiê phung drei.
Klei hriăm hruê anei đru drei ya klei hlăm knuih hdĭp hlăm gŏ sang?
Wah lač: Ơ Khua Yang, jing Ama hlăm adiê kâo. Bi mni kơ Ih bi hriăm leh kâo, brei kơ kâo Klei Aê Diê Blŭ. Akâo kơ Ih đru kâo ñĕ kơ klei soh, hdĭp bi mơak amĭ ama, bi guh kơang Anăn Aê Diê. Akâo kơ Ih đru kâo thâo mtô anak čô čiăng kơ diñu mâo klei hdĭp hlŏng lar.
Dlăng Klei Aê Diê Blŭ hlăm tlâo thŭn: Klei Bi Hriêng 26:1‑28
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: radioelansitnik@gmail.com
Kênh Youtube BHKTHN:
