Klei Aê Diê Blŭ: Galati 6:1
Êlan kliăng: “Ơ phung ayŏng adei, diih phung mâo klei hdĭp myang, tơdah diih ƀuh sa čô lĕ hlăm klei soh, hŏng klei êdu êun mkra brei ñu wĭt ngă klei djŏ. Răng bĕ kơ diih pô msĕ mơh, huĭdah mâo klei mplư truh kơ diih” (Galati 6:1)
Klei êmuh ksiêm mĭn: Ya mta klei brei mnuih “mâo Yang Mngăt Jăk” răng tơdah tlă anăp hŏng klei soh mnuih mkăn? Ya ngă? Thâo săng klei anei, si knuih brei drei mâo tơdah đru pô lĕ hlăm klei soh?
Hlăm Galati 6:1 hưn mdah ƀiă êdi mâo 6 knuih siam mơ̆ng Yang Mngăt Jăk, anăn jing klei khăp, klei êđăp ênang, klei thâo gĭr, klei jăk, klei êmhač, klei êdu êun hlăm klei hdĭp phung đăo kơ Krist êjai tlă anăp hŏng ayŏng amai adei drei lĕ hlăm klei soh. Tơdah amâo mâo ôh boh tŭ dưn mơ̆ng bruă Yang Mngăt Jăk bi mjing leh anăn bi mđĭ hriê kơ prŏng jih jang knuih siam myang anei, snăn amâo mâo pô dưi ngă ôh tui si klei mtô hlăm êlan Klei Aê Diê Blŭ ti dlông anei.
Boh blŭ “mkra” jing boh blŭ hlăm bruă mdrao gŭn, čiăng lač kơ bruă păn guôm anôk êka amâodah lŏ dăp klang mčah mnuih ruă, boh blŭ anei lač kơ wưng dôk hlao leh anăn bi hlao. Anei yơh jing bruă Yang Mngăt Jăk ngă hlăm klei bi mjing sa čô đăo jing doh jăk găn hŏng phung đăo mkăn mâo klei hdĭp myang. Phung đăo amâo dưi ôh “mkra” sa čô lĕ hlăm klei soh hŏng klei amâo mâo klei khăp, ƀiădah brei mâo klei khăp čiăng dưi thâo săng klei ruă knap leh anăn boh jhat mơ̆ng klei soh ba kơ pô lĕ anăn, leh anăn wăt klei khăp čiăng thâo kral klei bi mguôp sa asei mlei hlăm Yang Krist. Êngao kơnăn, brei mâo ai tiê hmăng hmưi čiăng đru pô lĕ hlăm klei soh dưi lŏ bi grăng hŏng Khua Yang, leh anăn ăt dôk hlăm klei bi mguôp hlăm klei khăp Phung Sang Aê Diê. Čiăng dưi ngă bruă mkra anei, phung đăo kơ Krist brei mâo klei êdu êun, klei êmhač, klei thâo gĭr, mbruă, kyua hŏng klei anăn yơh, dưi lŏ ba wĭt mnuih lĕ hlăm klei soh kơ Aê Diê leh anăn kơ Klei Blŭ Ñu, đru diñu thâo săng klei doh jăk mbĭt hŏng klei pap Khua Yang čiăng bi ti gŭ pô leh anăn kmhal kơ klei soh.
Khua ƀĭng kna Y-Pôl mñă kơ phung đăo kơ Krist brei mâo Yang Mngăt Jăk, ƀiădah ăt brei răng kơ drei pô msĕ mơh “huĭdah mâo klei mplư truh kơ diih msĕ mơh”. Tơdah drei amâo răng ôh kơ drei pô hlăm Yang Mngăt Jăk leh anăn hlăm Klei Aê Diê Blŭ, snăn drei ăt srăng lĕ hlăm klei soh msĕ snăn mơh. Klei thâo săng anei atăt drei truh kơ klei luă gŭ ti anăp Khua Yang leh anăn ti anăp phung ayŏng amai adei, êjai drei dôk ngă bruă “mkra” mnuih mkăn. Brei hdơr, drei êlưih snăk lĕ hlăm klei mplư jing mgao hlăm klei hdĭp myang, dlăng kơ drei pô yơh jing doh jăk hĭn kơ pô lĕ hlăm klei soh, msĕ si klei sa čô êkei Pharisi wah lač: “‘Ơ Aê Diê, kâo bi mni kơ Ih kyuadah kâo amâo jing msĕ si phung mnuih mkăn ôh. Diñu jing phung ƀơ̆ng ngăn, phung wê, phung tlĕ piu amâodah msĕ si pô rĭng jia anei.” (Y-Luk 18:11). Mnuih msĕ snăn, hrô kơ klei thâo săng brei kơ mnuih lĕ hlăm klei soh, snăn jing hĕ pô hơ̆k kdơ̆k hrăp ai kyua ƀuh mnuih anăn lĕ hlăm klei soh. Hrô kơ ênguôt hnĭng kyua klei soh, snăn lŏ hơ̆k mơak hĕ kyua mĭndah pô yơh jing jăk kdlưn hĭn kơ pô mkăn. Lu blư̆ drei amâo mâo klei mĭn msĕ snăn ôh, ƀiădah klei soh bŏ hŏng mnêč jhat tơl drei amâo thâo kral ñu ôh, leh anăn klei mgao, klei hưn ktưn mni kơ pô jing ktang hĭn kơ klei drei bi mĭn kơ ñu.
Si drei dôk tlă anăp hŏng klei soh mnuih mkăn?
Wah lač: Ơ Khua Yang, brei kâo mâo ai tiê thâo khăp tơdah dôk ti anăp phung ayŏng amai adei lĕ hlăm klei soh, leh anăn brei kâo mâo ai tiê klei mĭn luă gŭ, čiăng knang nanao kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: Y-Mika 2
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail:elankleisitnik@gmail.com
Kênh Youtube BHKTHN:
