Klei Aê Diê Blŭ: Y-Mathiơ 5:23-25
Êlan kliăng: “Lui hĕ mnơ̆ng ih myơr ti anăp knưl leh anăn nao lŏ bi grăng hŏng ayŏng adei ih êlâo; leh anăn kơh ih dưi hriê myơr mnơ̆ng ih” (Y-Mathiơ 5:24)
Klei êmuh ksiêm mĭn: Ya klei Khua Yang Yêsu mtô kơ klei bi grăng êlâo kơ myơr mnơ̆ng ngă yang? Klei anei brei ƀuh ya jing klei yuôm kơ klei bi grăng? Si drei srăng jing tơdah ăt djă pioh klei mĭn jhat hŏng ayŏng adei pô?
Khua Yang mtô kơ phung anak ƀuôn sang Ñu brei hŏng jih ai tiê gĭr bi grăng hŏng mnuih mkăn êlâo kơ ngă ya mta bruă klei bhiăn klei đăo. Hŏng phung Israel, klei myơr mnơ̆ng ngă yang ti knưl jing bruă bhiăn brei ngă leh anăn yuôm bhăn snăk. Ƀiădah tinei, Khua Yang Yêsu kñăm bruă myơr mnơ̆ng ngă yang brei mjưh hĕ kyuadah êlâo hĭn brei nao bi grăng hŏng ayŏng adei pô, bi msir mkra hĕ klei amâo bi djŏ hŏng ayŏng adei êlâo kơ myơr mnơ̆ng ngă yang êđăp ênang kơ Khua Yang. Arăng amâo dưi ôh, mâo klei amâo bi djŏ hŏng ayŏng adei pô ƀiădah dưi mâo hĕ klei êđăp ênang hŏng Khua Yang. Khua Yang Yêsu mtô snei, ênhă êlan jăk hĭn jing nao bi grăng mtam, pô mâo klei soh brei akâo klei pap leh anăn bi grăng hŏng pô drei mâo klei, êlâo kơ pô anăn nao kčŭt kơ khua phat kđi, leh anăn khua phat kđi jao drei kơ khua mnă, leh anăn mă krư̆ drei (êlan 25).
Drei amâo dưi ôh ruah klei myơr mnơ̆ng ngă yang kơ Khua Yang ƀiădah amâo lăm lui hĕ ôh klei amâo bi djŏ hŏng mnuih mkăn. Čiăng djă pioh klei bi mguôp hŏng Khua Yang, brei drei djă pioh msĕ mơh klei bi mguôp êđăp ênang hdơ̆ng phung drei. Phung anak ƀuôn sang Aê Diê brei gĭr hŏng jih ai tiê bi grăng mtam tơdah hbĭl mâo ya mta klei amâo bi djŏ ôh hlăm djăp mta klei bi mguôp, boh nik nak hŏng hdơ̆ng phung đăo. Khua ƀĭng kna Y-Pôl iêô mthưr msĕ mơh hlăm Rôm 12:18, “Tơdah dưi, gĭr bĕ, dôk êđăp ênang hŏng jih jang mnuih.”
Klei bi grăng yuôm kdlưn hĭn kơ klei pap brei. Klei bi grăng dưi bi mjing klei êđăp ênang leh anăn dôk hdĭp hnŭk ênang hŏng mnuih mkăn. Phung đăo kơ Krist brei ba hriê klei êđăp ênang, klei khăp leh anăn klei pap brei hlăm jih jang klei bi mguôp hdơ̆ng phung đăo, wăt tơdah si klei jing grăp čô mdê mdê dưn. Anei jing sa kdrêč hlăm klei bi mdjiê hĕ knuih hđăp. Tơdah drei rông pioh klei mĭn jhat hŏng mnuih mkăn, klei anăn yơh srăng bi jhat drei pô. Klei soh knŏng ba hriê klei bi rai nanao yơh, êjai anăn klei gưt asăp ba hriê klei hdĭp jăk mơak êbeh dlai. Khua ƀĭng kna Y-Pôl mtă mtăn, “Snăn jing djŏ diih pap brei leh anăn bi juh ñu, huĭdah ñu srăng ênguôt đei tơl amâo dưi tŭ ôh. Snăn, kâo kwưh kơ diih lŏ bi sĭt klei diih khăp kơ ñu.” (II Kôrantô 2:7-8).
Drei amâo năng ôh bi mguôp hŏng Khua Yang tơdah adôk rông pioh nanao klei mĭn jhat hŏng ayŏng adei pô hlăm Khua Yang. Klei khăp leh anăn klei pap brei jing jăk hĭn kơ mnơ̆ng myơr ngă yang. Jih jang klei gĭr bi luă gŭ pô čiăng bi grăng srăng jing mnơ̆ng myơr ƀâo mngưi myơr kơ Khua Yang nanao. Ñu čiăng kơ drei jing mnuih amâo djăl ăl ôh, ƀiădah djăl pap brei leh anăn gĭr bi grăng nanao hŏng mnuih mkăn. Rơ̆ng bĕ hlăm jih jang klei bi mguôp, brei drei bi msir mkra hĕ êlâo kơ drei dôk ti anăp kkuh mpŭ kơ Khua Yang.
Si ngă drei dôk rông pioh klei mĭn jhat hŏng hlei pô mơ̆? Si drei bi msir mkra klei anăn?
Wah lač: Ơ Khua Yang, pap brei kơ kâo kyuadah kâo amâo gĭr dôk hdĭp êđăp ênang hŏng mnuih mkăn ôh. Tơdah mâo klei amâo djŏ hŏng hlei pô, akâo Ih đru kâo mâo djăp klei khăp, jhŏng nao bi grăng mtam čiăng kơ kâo dưi dôk ti anăp kkuh mpŭ kơ Khua Yang. Kâo wah lač hlăm Anăn Khua Yang Yêsu Krist, Amen.
Dlăng Klei Aê Diê Blŭ hlăm tlâo thŭn: II Bruă Mtao 24
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm.
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
