Mathais 5:23-25
Nqe cim:
“koj cia li tso plhuav tej khoom fij rau ntawm hauv ntej lub thaj, koj cia li rov qab mus hais kom neb sib haum tso, koj mam li rov qab tuaj muab koj tej khoom fij rau Vajtswv” (Mathais 5:24)
Lus nug rau sawvdaws xav:
– Tswv Yexus qhia dab tsi txog kev sib haum ua ntej yuav muab khoom fij?
– Qhov no qhia txog kev sib haum tseemceeb npaum li cas?
– Peb yuav zoo li cas yog tias peb tseem khaws tseg kev cibnyeej rau peb cov kwv tij?
Vajtswv qhia nws haivneeg kom siv zog nrhiav kev los sib haum nrog lwm tus ua ntej uas yuav ua ib yam dab tsi twg hauv txoj kev ntseeg. Hauv cov Yudais, txoj kev fij khoom rau Vajtswv ntawm lub thaj mas yog ib qho tseemceeb thiab cheemtsum. Tiamsis ntawm no, Tswv Yexus hais meej tias theem kev fij khoom rau Vajtswv. Yuav tsum mus daws tej kev tsis sib haum ua ntej nrog kwvtij tso mas coj khoom mus fij rau Vajtswv sib haum nrog Nws. Tib neeg yeej tsis muaj qhov uas hais tias tsis sib haum nrog kwvtij tiamsis ho sib haum nrog Vajtswv. Tswv Yexus qhia hais tias qhov uas zoo tshaj yuavtsum sib raug zoo kiag, tus uas muaj txim yuavtsum thov txim thiab sib raug zoo nrog nws ua ntej uas nws yuav kom yus mus rau hauv tsev tu plaub thiab yus yuav raug kaw rau hauv tsev lojcuj (nqe 25).
Peb yeej xaiv tsis tau fij khoom rau Vajtswv yog peb tsis sib haum nrog lwm tus ua ntej. Cia kom peb ceev tau kev sib txuas nrog Vajtswv, peb kuj yuavtsum ceev txoj kev sib txuas sib haum nrog lwm tus. Tsis hais lub sijhawm twg thiab thaum muaj txoj kev tsis sib haum twg Vajtswv cov menyuam yuavtsum siv zog ua kom rov sib haum, tshwjxeeb yog cov uas koom kev ntseeg. Timthawj Paulus kuj nqua hu hauv Loos 12:18 “Nej yuav tsum ua txhua yam zoo raws li nej paub ua, nej thiaj yuav nrog sawvdaws nyob sib haum”.
Kev hais sib haum mus tau deb dua kev zam txim. Kev sib haum ua rau nyob thajyeeb thiab ua neej sib raug zoo nrog lwm tus. Tus ntseeg yuav tsum coj kev thajyeeb, kev hlub thiab kev zam txim hauv txhua txoj kev sib txuas nrog rau txhua tus uas koom kev ntseeg, txawm yuav muaj kev sib txawv los xij. No yog tes haujlwm uas tuag qhov uas saib yus tus kheej loj dua. Thaum uas peb txeev cib nyeej rau lwm tus, qhov ntawd yuav ua tshuaj lom peb. Kev txhaum coj kev puastsuaj los, tiamsis mloog lus ua rau muaj zog puv npo. Timthawj Paulus ntuas, “Yog li ntawd, nej yuav tsum zam txim rau tus ntawd thiab ua tib zoo ntuas nws, nyob tsam nws tej kev nyuaj siab ntawd ua rau nws tso Vajtswv tseg. Yog li ntawd, kuv thov nej ua tib zoo hais rau nws paub hais tias nej hlub nws” (2 Kauleethaus 2:7-8).
Thaum peb tseem cib nyeej rau peb cov kwvtij hauv tus Tswv yeej tsis tsimnyog peb sib txuas nrog Vajtswv. Kev hlub thiab kev zam txim zoo dua khoom fij. Qhov uas peb siv zog txo hwjchim kom hais sib haum yuav yog ib qho khoom fij ua pa tsw qab rau Vajtswv. Vajtswv xav kom peb dhau los ua tus neeg tsis chim sai, zam txim nrawm thiab pheej siv zog hais sib haum nrog lwm tus. Cia li ruaj siab hais tias hauv txhua txoj kev sib txuas yeej hais sib haum ua ntej mus pehawm Vajtswv lawm.
Thov Vajtswv,
Vajtswv, thov zam txim rau nyuam yaus vim nyuam yaus tsis tau siv zog ua neej nyob sib haum nrog lwm tus. Yog hais tias nyuam yaus muaj kev tsis sib haum nrog leejtwg, thov Koj pab nyuam yaus kom muaj kev hlub thiab muaj lub siab tawv los hais sib haum tam sim ntawd, kom nyuam yaus tsim nyog los cuag thiab pe hawm Koj. Nyuam yaus tuav Tswv Yexus Khetos lub npe thov. Amees.
Peb puas tseem cib nyeej rau lwm tus? Peb daws li cas?
Nyeem Vajluskub hauv peb lub xyoos: 2 Vajntxwv 24
Kênh Youtube BHKTHN:
