Klei Aê Diê Blŭ: Klei Bi Hriêng 20:30; Hêbrơ 12:4-11
Êlan kliăng: “Klei brăm êka keh bi doh klei jhat ƀai, leh anăn klei čăm bi doh anôk hgăm hlăm lam ai tiê” (Klei Bi Hriêng 20:30)
Klei êmuh ksiêm mĭn: Klei Bi Hriêng 20:30 ya čiăng lač? Ya klei kñăm čiăng kơ klei mkra mjuăt? Ya klei bi mđĭ ai ih tơdah tŭ klei Khua Yang mkra mjuăt?
Hŏng Klei Bi Hriêng kdrêč 20, Mtao Y‑Salômôn brei thâo Aê Diê ƀuh jih klei soh ti anôk hgăm hlăm lam ai tiê mnuih leh anăn Ñu ƀuah mkra digơ̆ (êlan 27). Mtao jing pô kiă kriê lăn čar dôk gŭ ti jhưng mtao phat kđi phung ƀuôn sang (êlan 8), leh anăn bruă klam kơ mtao jing bi luč jih klei jhat hŏng klei bi kmhal phung jhat ƀai (êlan 26). Mtao Y‑Salômôn bi ruĕ kdrêč 20 hŏng klei kñăm čiăng atăt kơ klei bi doh klei soh hŏng klei mkra mjuăt, “Klei brăm êka keh bi doh klei jhat ƀai, leh anăn klei čăm bi doh anôk hgăm hlăm lam ai tiê.”
Boh blŭ “bi doh” čiăng lač kơ klei dhông amâodah kuêh mnơ̆ng čhŏ đuôm ti dlông sa mta mnơ̆ng yua. Êlan 30a yua klei blŭ anăn hŏng klei blŭ bi hriêng čiăng lač kơ klei bi doh hĕ jih jang klei jhat ƀai mơ̆ng klei hdĭp sa čô mnuih. Pruê̆ blŭ “klei čăm bi doh anôk hgăm hlăm lam ai tiê” čiăng lač kơ klei mkra mjuăt djŏ srăng bi doh jih klei soh hlăm anôk hgăm hlăm lam ai tiê mnuih. Snăn yơh, klei mkra mjuăt hŏng klei khăng srăng đru mnuih jhat ƀai lui jih klei ƀai ñu leh anăn jing sa čô mnuih jăk, tăp năng klei bi kmhal srăng bi êka leh anăn ruă ƀiădah klei bi kmhal anăn srăng ƀư̆ mkra mnuih wê jing mnuih doh jăk, kpă ênô.
Tơdah mtô kơ klei Khua Yang mkra, pô čih hră mơĭt kơ phung Hêbrơ ăt mñă msĕ mơh kơ klei kñăm čiăng mơ̆ng klei Khua Yang mkra phung anak čô Ñu jing Ñu khăp kơ drei leh anăn čiăng drei đuĕ kbưi mơ̆ng klei soh. Kyua klei tŭ dưn kơ drei snăn Aê Diê mkra mjuăt drei čiăng kơ drei dưi mâo klei doh jăk Ñu (dlăng thiăm Hêbrơ 12:4-11). Ñu bi mđĭ ai phung anak čô Aê Diê đăm êdu ai ôh tơdah mâo klei mkra mjuăt kyuadah “Êjai tŭ jih jang klei mkra mjuăt mâo klei ruă leh anăn amâo mơak ôh; ƀiădah êdei mâo boh klei êđăp ênang kbiă hriê mơ̆ng klei kpă kơ phung tŭ leh klei mkra mjuăt anăn” (Hêbrơ 12:11).
Aê Diê drei jing Pô bŏ hŏng klei khăp leh anăn jing Pô doh jăk mơh, kyuanăn amâo djŏ ôh kyua khăp kơ drei snăn Ñu tŭ ư amâodah amâo yap ôh klei soh drei. Hơăi, amâo tuôm mâo klei anăn ôh! Kyuanăn, jing mnuih Aê Diê jao bruă gĭt gai, wăt tơdah hlăm phung ƀuôn sang, Phung Sang Aê Diê hĕ amâodah hlăm gŏ sang pô, brei drei ngă bi djŏ klei mkra mjuăt hŏng klei khăp čiăng bi doh klei soh grăp čô mnuih leh anăn čiăng kơ jih jang mnuih jing doh jăk sơăi. Brei grăp čô drei bi luă gŭ drei pô thâo kral ya klei soh drei ngă leh – leh anăn kmhal hĕ hŏng Khua Yang čiăng dưi mă tŭ klei Ñu pap brei. Tơdah tŭ klei bi kmhal đăm drei êdu ai ôh ƀiădah brei drei thâo kmhal kơ klei soh drei ngă leh. Hlăk anăn kơh, klei hdĭp drei srăng mboh boh klei kpă ênô leh anăn klei êđăp ênang, leh anăn dưi mâo klei doh jăk Aê Diê.
Si ngă drei ngă leh klei mkra mjuăt kơ phung ayŏng adei drei leh anăn kơ drei pô?
Wah lač: Ơ Khua Yang, pap brei kơ kâo đa kyuadah mâo lu blư̆ kâo êdu ai leh anăn kdŭn hlăm klei đăo tơdah tŭ klei Ih mkra mjuăt. Akâo Khua Yang đru kâo mâo klei hdĭp thâo kpĭ mjuăt djŏ klei hdĭp kâo pô leh anăn klei hdĭp phung ayŏng adei kâo čiăng ba hriê klei doh jăk hlăm Sang Ih. Kâo wah lač hlăm anăn Yêsu Krist, Amen.
Dlăng Klei Aê Diê Blŭ hlăm tlâo thŭn: Klei Bi Êdah 1:1-2:7
Klei hriăm mblang mơ̆ng klei hriăm Klei Aê Diê Blŭ grăp hruê mơ̆ng Knơ̆ng bruă mtô mjuăt klei đăo Sang Aê Diê kluôm
Tơdah mâo klei blŭ mguôp, akâo kơ diih mơĭt hră hlăm gmail: elankleisitnik@gmail.com
Kênh Youtube BHKTHN:
